Read Kambera 1 LII NDAI 20 Bible Online

1 LII NDAI 20 - Kambera bible

1 LII NDAI 20

¹La kawunga wandu ma-pandàkingu, la rehi kali pabera-da da hanganji - hanganji, dundilu-nahaka da tanatara-na i Yuàpu hi dawàhi-ya na tana Amungu. La rehi nu engana la Yeruhali i Ndautu nda nalua karia-anja. I Yuàpu dàngu tanatara-na da-nggupulu-ya na paraingu Ramba, hi da-nàhaku-ya dàngu hi da-patàlaru-ya nuna na paraingu.

²Hàlaka nu mai-nanyaka i Ndautu hi napiti banda malanja pa-ribangu kanjupu danguha welingu la paraingu nuna. La hongada nuda da banda da malanja ninya na tubuku àmahu rarana na hanganji Amungu. Na mbotuna nuna na tubuku ràkangu 34 kiluna dàngu pa-padambakungu hau watu kalilangu-ya. Napiti-ya nuna na watu i Ndautu hi natuya la tubuku wikina.

³Tunaka nu karia-nanjaka da mangia-nya na paraingu Ramba paraïna i Ndautu hi nahàni-ha paràma wàngu nggarangganji, pariku dàngu kataka. Na matuna nu jia-mayai na pawàngu la parai - paraingu hawiangu la Amungu. Hàlaka nu beli-nanyaka la Yeruhali i Ndautu dàngu tanatara-na nggubulu-da.

⁴Pi - pirana na rehi ba hàla patuna nu, hili tumbu-nanyai na pabera lawanja da tau Pilitingu la Nggehiru. Nu la pa-kangaburungu nuna i Hipukai tau Huha na-pameti-ya na haàtu tau Pilitingu na mahama milimungga-ya na ma-tamungu Hipaï-ya. Ka kàku-nanyaka na tau Pilitingu.

⁵La hili hau pa-kangaburungu dàngu tau Pilitingu, i Elihanàngu anana i Yairu na-pameti-ya i Làhami angu dedina i Nggoliatu, tau Nggàta. Na ulu nimbuna i Làhami hama tuna ai ngoda kamba tinungu-ya.

⁶La hili pa-kangaburungu hau la Nggàta, ninya na haàtu na mahama milimungga-ya na ma-kanomungu wua lima dàngu wua wihina. Nyuna wàla tau mahama milimungga weli ndaingu-mayaka.

⁷Nyuna na-pakatura-ya na tau Ihirailu, jia-duyaka hi na-pameti-ya paraïna i Yunatàngu anana i Himia, ayana i Ndautu.

⁸Pa-kadua haàtu-da nuda da tau pa-pameti-na i Ndautu dàngu pambana, wàla tau mahama milimungga la Nggàtaha.