Read Kambera 1 LII NDAI 21 Bible Online

1 LII NDAI 21 - Kambera bible

1 LII NDAI 21

¹I kambàliku na-mbuhangu pa-hanggàmaru-ya na tau Ihirailu; jia-duyaka hi narunda-ya i Ndautu la pa-patumbu-ya na diha nggubulu (na sensus).

²Hàla ka panii-nanyaka i Ndautu lai Yuàpu dàngu da ngara parawira tanatara-na, “Patumbu-yawa na diha nggubulu la nggubulu tana Ihirailu lupa la pangia mahudi, ka kupinya jàka piraya nggubulu-na la na rayatu Ihirailu wànggu,” wàna.

³Nahema i Yuàpu, “Màla àru i MIRI ka nabonja - bonjaya na danguna na rayatu Ihirailu, ka na-pahangahu wundangu-mbu welingu la danguna na maninya nàhu. Tamu Umbu ma-mangarangu, ka nda mbàda lohangu-ana ba tangara ndàba-mana-nyaka lai nyumu? Ka nggikina hi patumbu-mayaipa na diha nggubulu? Napa ngeru, rukuna na njala nuna nggubulu-na na banjaru-nda naita-ya na injana,” wàna.

⁴Tàka na hanganji pa-daingu pamàndu-mananya na pareta-na, ka laku-nanyaka i Yuàpu la nggubulu Ihirailu, lupa la mahu - hudiya, tunaka nu ka beli-nanyaka la Yeruhali,

⁵hi na-wàlahu-nya na rukuna na diha nggubulu lai Hanganji Ndautu. Nggubulu-na na mini na mapeku patama la ndihi tanatara tau 1.100.000 (hapàku hangahu rata)-ya na tau la Ihirailu dàngu 470.000-ya na tau la Yahunda.

⁶Tàka na kabihu Lewi dàngu kabihu Mbanyamingu nda datama-a la dihada nuda. I Yuàpu nda nabihu padiha-ha nyuda, nadu ba nda mbuhangu-mananya làti pa-palaku-ya nuna na pareta-na na hanganji.

⁷I Ala nda nambuha-nya nuna na diha nggubulu tàka hi nahuku-nya na tau Ihirailu.

⁸Ka hamayangu-nanyaka i Ndautu lai Ala, “Njala-manggu-nyaka duku! Ou Ala jàma àrungga, nadu na pawunda-nggu ba manduba nda uku-maya,” wàna.

⁹I MIRI napanii-nya na Wunangu Nggàtu, na mali padua-nja i Ndautu dàngu i MIRI,

¹⁰“Luawa kau pekanya i Ndautu, napa Nyungga kuwua-nya tailu ngia ka napindi. Napa kulaku-manya duku nggàra biaya na pa-pindina,” wàna.

¹¹Ka lua-nanyaka i Nggàtu lai Ndautu hi na-patàka-nya na liina i MIRI, “Nggiya na papindi-mu Tamu Umbu:

¹²Natungu na rimbangu la tana yiana la ngala tailu mbua ndaungu, jàka ndia tailu mbua wulangu bau palainya na muhu na make - kehanggau, jàka ndia nggubulu-na yiana na tana tailu mbua lodu mandaina ba na-nàhaku-kunya hapanda i MIRI ba nawàngu patungu na hidu pa-nggàbalangu, dàngu na papalewa-na Nyuna na tàka ngàndiya na meti la nggi - nggini. Bota memaya nàhu jàka nggàraya na pa-patàka-nggunya i MIRI,” wàna.

¹³Nahema i Ndautu, “Ai inai, hanggàmaru-nggunyaka! Welingu ba nahuku-ngga tau pinu tana, narihi hàmupa ka nahuku-ngga i MIRI, nadu ba na-bokulu na paaï pa-namungu-na,” wàna.

¹⁴Ka patàka-madua-nanyaka i MIRI hidu pa-nggàbalungu na tau Ihirailu hi lupa 70.000-ya la hongada nyuda da mameti.

¹⁵Ka paràha-nanyaka paraïna i MIRI na haàtu na papalewa la pa-patàlaru-ya la Yeruhali. Tàka ba natàka-ka nuna na papalewa la lihi ngia pawari puruhu uhu nggàndumu manguna i Arauna tau Yembuhu, panjilu-nanyaka na botangu-na i MIRI la pahuku-nya nuna na banjaru. Napanii-nya na papalewa, “Jiakai duna! Jiaka-wa,” wànanya.

¹⁶I Ndautu naita-maya na papalewa ba na-lindingu la manggawa awangu dàngu pinu tana. Na hapanda jiapa-maya la limana, rimangu-na padua-ka na papalewa la pa-patàlaru-ya la Yeruhali. I Ndautu dàngu da liku uru - liku uru rayatu, da ma-kalambungu karungu la rehi nu tanda pekada halaera, da-marubuku la tana.

¹⁷Ka hamayangu-nanyaka i Ndautu, “Dou Ala, nyungga-maka duku manjala. Nyungga ma-patumbu-ya la pa-paloku-ya na diha nggubulu. Nda ningu ndokua njalana duna yiana na banjaru! Dou MIRI, Alanggu, huku biangga nyungga dàngu kuru umanggu, ba tuna pamarau àruya na pàda hidu yiana welingu la banjaru-mu,” wàna.

¹⁸Hàlaka nu na papalewa-na i MIRI na-paràha-nya i Nggàtu papanii-nya i Ndautu ba lupangu naheima bàdi nyuna la ngia pawari puruhu uhu nggàndumu manguna i Arauna ka na-pahadangu lai nu ngia pawotu maraku ndumana i MIRI.

¹⁹Ka hadangu laku-nanyaka i Ndautu nunjuya na pareta-na i MIRI la ngaruna i Nggàtu.

²⁰Nu la ngia pawari puruhu uhu nggàndumu i Arauna dàngu da anana mini ba dapatu talànga wari puruhu-da uhu nggàndumu. Ba daita-yaka na papalewa, da anana i Arauna ba dapatu palai-danyaka pa-kapàndi.

²¹Ba naita-yaka paraïna i Arauna ba nàmunya i Hanganji Ndautu, lua toma-nanyaka i Ndautu hi na-marubuku la hanggana.

²²Panii-nanyaka i Ndautu lai nyuna, “Pahadangu ngia pawotu maraku lai yiahu wànggu ndumana i MIRI, ka peku pànjangu-na yiana na tàparu. Jia ba tuna dangganya lai nyungga yiana na tana. Peka bia jàka pira wilina, napa ka ku-mbayaru-nya wilina,” wàna.

²³“Ai ha, piti biaya duna, Tamu Umbu,” wànaka i Arauna, “dàngu paloku biaya jàka nggàraya na ma-patikingu la etimu. Yiada da hapi kau tu kameti maraku patunu, dàngu nduma ai pa-mutungu wa bianja yiada da kapambalu pawari puruhu wàngu. Pitimbu duna uhu nggàndumu nduma tanda maraku. Mbuu ndàbada wua jua-manggunja, màtangu-ka duna pa-mbayaru Tamu Umbu,” wàna.

²⁴Tàka nanapa-ya na hanganji, “Àmbu tumu nu! Keiha wàngguma duku dàngu ku-patuba-manja wilida. Nda ku-mbuhangu pawotu-nya tanda maraku lai MIRI ngga - nggàra mangumu jàka ndia nggàra biaya na pangala juangu,” wàna.

²⁵Ka mbayaru-nanyaka i Ndautu lai Arauna 600 àmahu rara ndumana nuna na pa-ngiangu.

²⁶La pa-ngiangu nuna pahadangu-nanyaka i Ndautu hau ngia pawotu maraku ndumana i MIRI, hàla hi nawotu kameti maraku patunu dàngu kameti maraku papeku. Hàlaka nu hamayangu-nanyaka, hi nahema-ya na hamayanguna paraïna i MIRI ba na-papuru-nya na epi welingu la awangu na matunu hàlaha nuda da kameti maraku la pinu ngia pawotu maraku.

²⁷Hàla i MIRI hi na-paràha-nya na papalewa la pa-patiku belinya na hapanda-na, tàka hi na-panamatungu la pareta-na i MIRI na papalewa.

²⁸Ba naita-yaka paraïna i Ndautu nahema-nanya na hamayangu-na paraïna i MIRI rukuda da tanda maraku-na, ka hili wotu-nanyaka kameti maraku nu la pinu ngia pawotu maraku.

²⁹La rehi nuna na Maüna i MIRI na pawulu-na i Muha la maràda telangu, dàngu na ngia pawotu maraku nduma kameti maraku patunu jiapa-yapa la ngia pa-lumungu la Nggimbiungu.

³⁰Tàka i Ndautu nda natoru mbeni palua lai nu papanii dànya i Ala, nadu ba na-mangàdatu-nya na hapanda-na na papalewa-na i MIRI.