Read Kambera 1 LII NDAI 22 Bible Online

1 LII NDAI 22 - Kambera bible

1 LII NDAI 22

¹Natungu liina i Ndautu, “La pangia lai yiahu lupangu-ma ka wulu-niya na Umana i MIRI Ala. Dàngu la ngia pawotu maraku yiana-maka bàdi dawotu niha da kameti maraku patunu-da lai MIRI na tau Ihirailu,” wàna.

²Na-paràhangu i Hanganji Ndautu la pa-pauhi ndàbanya na tau tàka na maninya la tana Ihirailu. Hawiangu welingu lai nyuda na-paràha-nja pa-kahebi watu na pawulu wànya na Umana i MIRI.

³Ka pandoi paku dàngu kaleki-da da pindu bokulu Umana i MIRI, kanjupu danguha da bàhi ba na-pauhingu i Ndautu. Na-pauhi padangu-mbu parunggu, hi lupa nda peku timbanja.

⁴Welingu la tau Tiruhu dàngu Hindungu nakarai hau dangu ai kajuu Limbanongu.

⁵Nu hi na-paloku tuna nu i Ndautu, nadu ba tuna yia na pa-kanandi-na daa la etina, “Lupangu ku-payema hahangu-maka bàdi jàka nggàraha da pawulu wànya na Umana i MIRI. Nadu i Halomu na ananggu na kanguraku-mapa dàngu ndedi nadangu-mapa na pa-manyàmu-na, tàka na Umana i MIRI na pa-pahada-na napa lupangu ma-kanjupu ma-ngarangu-maya bàdi dàngu ka mawuwa-ya la nggubulu pinu tana,” wàna. Ba ndedi nameti-pa, dangu langatàka pawulu wàngu Umana i MIRI pa-payemana i Ndautu.

⁶I Ndautu napaau-nya na anana, i Halomu hi na-paràha-nya pa-pahada-nya Umana i MIRI Ala na palumu-na na banjaru Ihirailu.

⁷I Ndautu napanii-nya i Halomu, “Ha ananggu, mandai-maka ba ku-patikingu pa-pahadangu hau uma na ngia pamaraku-nya i MIRI Alanggu.

⁸Tàka i MIRI napanii-ngga, ba lalu pa-nutakungu-nggu nyungga pa-pabera dàngu danguka tau pambàda pameti-nggu. Jia-duyaka i MIRI hi nda na-pahia-ngga pa-pahada-nya uma ndumana Nyuna.

⁹Na nyuna ba tuna mbàda ràndi-mana-nggaka, ‘Nyumu napa mu-ngalangu haàtu ana na ma-pareta mànjaku napa, nadu napa Nyungga kundula-ya hi lupa nda ningu muhu ma-pabera dànya nyuna. Nyuna napa màta ka Halomu[31]-ya na tamuna, nadu la ngala pereta-na nyuna, napa Nyungga kuwua-nya mambiru dàngu mànjaku la nggubulu Ihirailu.

¹⁰Na anamu nunaka napa na ma-pahadangu uma ndumanggu Nyungga. Nyuna napa ananggu-nyaka tàka Nyungga ama-nanggaka. Na kanjàka hanganji Ihirailu pa-daingu-nanyaka la wàlana lundu nu - nu,’ ” wàna.

¹¹Nahili kareuku i Ndautu, “Nàhu ananggu, màla àruki i MIRI Alamu, ka nandula mànukau. Dàngu màla àruki ka na-hàrangu bau pahada-nya na uma ndumana i MIRI hama tuna na pambàda ràndina.

¹²Dàngu màla àruki i MIRI Alamu ka nawua-nggau kateuru katàraku dàngu kaminaku manggàna, ka peku pareta-munya na Ihirailu na ma-jàngapu la uku - ukuna Nyuna.

¹³Jàka mu-manundu-madunja mbuu ndàbada da uku da pawua-na i MIRI lai Muha ndumana na banjaru Ihirailu, napa nyumu mu-ondungu-ma. Màtawa nyumu kau tara ura kau mbeni mangu. Àmbu mangàdatu la pahangga-nya jiapa nda nggàraya.

¹⁴Jàka jia-yaka na Umana i MIRI dira matiki-maka duku ba ku-pamukarungu la pa-pauhingu 3.400 tòngu àmahu rara dàngu rihi welingu la 34.000 tòngu àmahu bara. Hinggilu-da nuda ni-manjaka da parunggu dàngu da bàhi nda pataü-a padiha-ha. Ai dàngu watu mbàda pamàtu-manggu-njaka, na nyuna nyumu mutunja-pa bàdi anguda.

¹⁵Dadangu-madu da tau maràma lai nyumu. Ningu maràma la ngia paàki watu, ma-tukangu ai, ma-tukangu watu dàngu dangu-maipa ma-karàmaku mamàhi la paràma

¹⁶àmahu rara, àmahu bara, parunggu dàngu bàhi. Màla, pakiri parenggangu-wa! Nyunaka i MIRI ka natula-nggau,” wànanya.

¹⁷Hàla i Ndautu hi na-kamahi-nja mbuu ndàbada da ma-pairungu la Ihirailu la pa-karaha-ya i Halomu.

¹⁸“I MIRI Alami mbàda tula-mana-nggaika, dàngu hi nawua-nggai mbuu ndàbami peku dàngu mànjaku la nggubulu tananda. Nyuna na ma-pakalongga-ka hi kutalu hàlaya na banjaru àmangu na mangia-nya na tana yiana. Nàhu duda nyàku-danyaka lai nyimi dàngu lai MIRI.

¹⁹Jia, màtawa mbuu ndàbami kai pa-atangu wikimi lai MIRI Alami wàngu tolu hamangu-mi. Pa-kiringu-wa pa-pahadangu uma ndumana i MIRI, ka peku pahàmu-ha lai nu na Pàti Pa-ràndingu-na i MIRI dàngu mbuu ndàbada da pakakahu hawiangu da pa-kahaungu pa-lumungu wàngu,” wàna.