Read Kambera 1 LII NDAI 23 Bible Online

1 LII NDAI 23 - Kambera bible

1 LII NDAI 23

¹Ba na-kaweda jàraka i Hanganji Ndautu, wotu-nanyaka i Halomu la pa-hanganji Ihirailu.

²I Hanganji Ndautu pauhi hàla-nanjaka da ma-pairungu Ihirailu, mbuu ndàbada da ratu hamanai da tau Lewi,

³hàlaka nu hi nadiha hàlaha da tau mini kabihu Lewi da matailu kambulu ndaungu lupa da marihi. Mbuu ndàbada tau 38.000-da.

⁴Hàla da 24.000 lai nyuda hi na-patanggu-nja la pa-tanara-ya na paràma la Umana i MIRI, 6.000-ya na matanggu-nya la pa-tulihu dàngu la patanggu timbangu palakara,

⁵4.000-ya na ma-tanggungu la pa-manggangu, dàngu hili 4.000-yai na ma-tanggungu la pawotu-nya i MIRI ba dawàngu pawànja da malingu pambabu wàngu da pambàda pa-yemangu.

⁶I Ndautu nabiwa-ha da tau Lewi tailu mbua kanguhuru-da, tundunya na kalibaru-da, nu na kalibaru Nggerihongu, Kehàtu dàngu Marari.

⁷I Nggerihongu dadua da anana mini: i Landàngu dàngu i Himei.

⁸Da anana mini i Landàngu tau madua haàtu-ha: i Yahialu, i Hetàmu dàngu i Yoilu.

⁹Nyuda ma-pangora-ha la wàlana i Landàngu. (I Halomitu, i Hahialu dàngu i Haràngu anana mini i Himei-ha.)[32]

¹⁰Dapatu da anana mini i Himei tundunya na pandàkingu dedida: i Yahàtu, i Njinja, i Yeuhu dàngu i Mbiria. Da wàlada i Yeuhu dàngu i Mbiria nda dadangu-a, jia hi da-mbulungu kalibaru-da.

¹²I Kehàtu dapatu da anana mini: i Àmuràmu, i Yihàru, i Hemburungu dàngu i Uhialu.

¹³I Àmuràmu, jiayaka na amada i Harungu dàngu i Muha. (I Harungu dàngu da wàlana lundu nu - nu pa-kahaungu-haka la pa-paloku-ha da pa-kakahu pa-lumungu wàngu, patunu-nya dupa i MIRI, palumu-nya i MIRI dàngu la pa-kanyuru-nya na rayatu la tamuna i MIRI.

¹⁴Da anana mini i Muha, atana i Ala pa-papohungu-mbuha daa la kabihu Lewi.)

¹⁵I Muha dadua da anana mini nu i Nggerihomu dàngu i Eliyehiru.

¹⁶Na ma-pairungu la anana i Nggerihomu jiaya i Hembuilu.

¹⁷I Eliyehiru haàtu-ma-ana na anana mini Rehapia-ya na tamuna. I Rehapia dadangu ailulu da anana.

¹⁸I Yihàru, anana i Kehàtu na padua wàda, ninya na anana mini, Halomitu-ya na tamuna; nyuna na ma-pairungu la kalibaru.

¹⁹I Hemburungu, anana i Kehàtu na padua haàtu wàda, dapatu da anana mini: i Yeria na ma-maaya dehi, pa-ndàkingu i Amària, i Yahahialu dàngu i Yekamiamu.

²⁰I Uhialu, na anana i Kehàtu na papatu wàda, dadua da anana mini: i Mika na ma-maaya dehi, dàngu i Yihia.

²¹I Marari dadua da anana mini da ma-tamungu i Màhali dàngu i Muhi. I Màhali dadua da anana mini, i Eliahàru dàngu i Kihi,

²²tàka i Eliahàru nameti dàngu nda ningu anana mini; jiaha da anana kawini-a, da ma-mangoma la ana angu paluhu amada, da anana i Kihi.

²³I Muhi, anana i Marari na padua wàda, datailu da anana mini: i Màhali, i Endiru dàngu i Yeremutu.

²⁴Nudaha da tamuda da wàlana i Lewi, da pa-tulihu tundunya na kalibaru-da dàngu na kuru umada haàtu - haàtu. Nyuda da mambàda dua kambulu ndauda dàngu rihikai ningu-maka ngerada la Umana i MIRI.

²⁵I Ndautu napanii, “I MIRI Ala Ihirailu na-pamanggawa-manyaka na banjaru-na la paluri mànjaku, tàka Nyuna wiki ngiangu-nanyaka la Yeruhali lundu nu - nu.

²⁶Jia-duyaka, na Maüna i MIRI dàngu mbuu ndàbada da pakakahu nduma lumungu nda pahili duku-ahapa paraï tau Lewi,” wàna.

²⁷Palata-nja da pareta - pareta-na la malamiri i Ndautu, mbuu ndàbada da tau Lewi, jàka dua kambulu ndau-naka na matua-na, lupangu-ma ka tulihu-ya na tamuna la pa-paloku.

²⁸Lupangu-ma nyuda ka da-pambapa dànja da ratu wàlana i Harungu la pa-paloku-ya na lii lumungu la Umana i MIRI, la pa-àrapu-ha da kawindu da talora-na dàngu da kuru - kurungu-na nu na Umana i MIRI, dàngu la pamangga hàlanja mbuu ndàbada da pa-kahaungu-ya i MIRI ka àmbu da-iraku.

²⁹Papida nyuda-mbuha da ma-pandàkingu yiada: da roti pawotu lai Ala, da kanguta da pawàngu ka tanda maraku lai MIRI, da kanguta manipihu panda tungu tai wolu, kameti maraku pa-handarangu, dàngu kanguta pa-haürungu mina haitungu. Lupangumbu nyuda datimba-nja dàngu ka da-takaru-ha da pangàndi la Umana i MIRI.

³⁰Hinggilu-da nuda, lupangu-ma daludu nyuda ka wotunya i MIRI nimbihu mbaru dàngu nimbihu rudungu,

³¹dàngumbu la nimbihu rehi jàka ningu kameti maraku patunu-nya i MIRI la lodu Hangahu, la paremi Wulangu Bidi, dàngu la paremi - paremi hawiangu. Na danguna jàka piraya na tau Lewi na ma-paloku handàka - handàka mbàda ningu-maka kalaratu-na. Lupangu-ma da pahàra pangala-nya tau Lewi na wai ngera nuna lundu nu - nu.

³²Pa-wuangu-mbuha wai ngera ba papida nyudaya la pa-àrapu-ya na Maüna i MIRI hamanai na Umana i MIRI dàngu la pa-pambapa dànja da angu dedida, nu da ngara ratu wàlana i Harungu, la pa-paloku-ya na lumungu lai nu.