Read Kambera 1 LII NDAI 26 Bible Online

1 LII NDAI 26 - Kambera bible

1 LII NDAI 26

¹Yiada-haka da maràngga wai ngerada da tau Lewi da mamangga-nya na Uma Ala. Welingu la kalibaru Kora pa-panggànangu-ya i Mihilimia anana i Kori la kuru uma Epuyahàpu.

²Nyuda dapihu da anana mini da patu la huratu tundunya na pa-ndàkingu dedida: i Hakaria, i Yandiyaïlu, i Hambanja, i Yàtinialu,

³i Elàmu, i Yuhanàngu, i Eliyowinai.

⁴Pandàkingu pa-panggànangu-ya i Ombitu-Endumu. Nyuna na-pakanyuru-nya paraïna i Ala ba tau mawalu-ha da anana mini, da patu la huratu tundunya na pa-ndutungu dedida: i Hamaya, i Yuhambàtu, i Yowàhu, i Hakàru, i Netaneyilu,

⁵i Amialu, i Ihakàru dàngu i Piulutaï.

⁶I Hamaya kawunga anana i Ombitu-Endumu danomu da anana mini: i Otuni, i Rapaïlu, i Ombitu, i Elihambàtu, i Elihu dàngu i Hemakia; mbuu ndàbada karohu tau-maha la kalibaru-da nadu ba mini papingi mambeni hanggangu-maha, ri - rihi i Elihu dàngu i Hemakia.

⁸Ndumana na wai ngera la pa-manggangu na kalibaru-na i Ombitu-Endumu na-wuangu tau nomu kambulu madua mini mbeni hanggangu.

⁹Na kalibaru-na i Mihilimia na-wuangu tau hakambulu mawalu mini mbeni hanggangu.

¹⁰La kalibaru Marari pa-panggànangu-ya i Hoha. Nyuna dapatu da anana mini: i Himiri (nyuna nda kawunga ana-aya, tàka natuya ma-pairungu paraïna amana),

¹¹i Hilikia, i Tembalia dàngu i Hakaria. Mbuu ndàbada tau hakambulu madua haàtu-ha da angu kuru umana i Hoha da ma-manggangu la Umana i MIRI.

¹²Da ma-manggangu Umana i MIRI pabiwa-ha la pa - pambada tundunya na kalibaru-da. Nyuda pa-wuangu-mbuha wai ngerada pa-paloku la Uma Ala, hama tuna na anguda pa-Lewi hawiangu.

¹³Nimbihu kalibaru ka kalibaru bokulu-ya ka kalibaru kudu-yakai dayila-mapa undi ka pinya jàka nggi pindu bokulu-ya na ngia padaida.

¹⁴I Helimia nadeni-nya na pindu bokulu pahunga lodu. I Hakaria anana, na makàli wuangu lii panaungu mahàmu, nadeni-nya na pindu bokulu mbara dia.

¹⁵I Ombitu-Endumu nadeni-nya na pindu bokulu mbara luru, tàka da anana nyudaka matanggu daiha da nggundangu pangia malanja.

¹⁶I Hupingu dàngu i Hoha dadeni-nya na pindu bokulu patama lodu dàngu na pindu bokulu Halekitu na maninya la ànda pa-kandekalu. Na wai ngera la pa-manggangu, datàpu haha-maya hi ningu mànuma ma-manggangu la pindu bokulu.

¹⁷Nimbihu lodu tau manomu madai la pahunga lodu, tau mapatu la mbara dia dàngu tau mapatu, la mbara luru. Da nggundangu pangia malanja tau mapatu ma-manggangu: tau madua nduma nimbihu nggundangu.

¹⁸La uma nuana la patama lodu tau mapatu ma-manggangu la ngarangia dàngu tau madua nu la uma nuana.

¹⁹Tuna nu na pa-biwangu-na na wai ngera manggangu-na na kalibaru Kora dàngu kalibaru Marari.

²⁰Da tau hawiangu la kabihu Lewi pa-wuangu-mahai duda ndumada la papinja da banda da malanja la Umana i MIRI dàngu la papinja da nggundangu ngia patuha da pawotu - pawotu lai Ala.

²¹I Landàngu anana mini i Nggerihongu; jiaya na ngia paweli-da da mapira pambada da kalibaru, papohu-nya na kalibaru Yahialu na anana.

²²Da anana i Yahialu nu i Hetàmu dàngu i Yoilu pa-wuangu ndumaha la papinja da nggundangu dàngu da àmahu Umana i MIRI.

²³Da wàlana i Àmuràmu, i Yihàru, i Hemburungu dàngu i Uhialu da-ngalangu-mbu wai ngerada ndumada.

²⁴I Hembuilu welingu la kalibaru Nggerihomu, anana i Muha, jiaya na mamàra hamata-ha da banda da malanja la Umana i MIRI.

²⁵Nua kalembi-mada nyuda dàngu i Halomitu rukuna i Eliyehiru angu dedina i Nggerihomu. Na walaku wàlana i Eliyehiru lundu tàka lai Halomitu tuna nu na pandàkingu-na: i Eliyehiru, i Rehapia, i Yahaya, i Yoràmu, i Hikiri, i Halomitu.

²⁶I Halomitu dàngu da angu dedina jiaha da mapinja mbuu ndàbada da pawotu da pa-maraku wàna i Hanganji Ndautu, da ama boku - ama bokulu la kuru uma, da ma-pairu - pairungu la kalibaru dàngu da ngara parawira ngia dita.

²⁷Nuda da pawotu - pawotu, jia-haka hawiangu da malanja paribangu da pangala-da la pa-kangaburungu dàngu da pawotu-da da pa-panduma panuda-nya na Umana i MIRI.

²⁸Kababa-na, i Halomitu dàngu ihi kuru umana papi hàlada nyudaha mbuu ndàbada da pambàda wotu ka jiaha da pawàngu la Umana i MIRI-ma-a, jiambuha da tanda maraku pawotu-da mali lai Wunangu Hamuilu welingu lai Hanganji Haulu, welingu lai Àpuneru anana i Neru dàngu welingu lai Yuàpu anana i Haruya.

²⁹Da wàlana i Yihàru, i Kenanya lupa da anada pa-pandumangu-ha la patanggu tuha la huratu da mangu nanggara dàngu da wai ngera la pa-timbangu palakara.

³⁰Mbuu ndàbada da pa-paloku la lii lumungu dàngu na pa-paloku la laku pareta la Ihirailu la ngaba patama lodu Luku Yorundangu pa-pakatangu-ya i Hahapia dàngu da 1.700 kalembi-na: mbuu ndàbada tau la ngoraha wàlana Hemburungu-ha.

³¹Na ma-pairungu la wàlana i Hemburungu jiaya i Yeria. La papatu kambulu wàna na ndaungu pareta-na i Hanganji Ndautu, da-patumbu-ya la pa-kanuturu-ha da wàlana i Hemburungu. Nu ba da-kanuturu-ha pi-danyaka ba ninja da panjuri da ma-kaborangu da ma-ngiangu la Yahiru la ngaba Nggiliatu.

³²Mbuu ndàbana na pa-paloku la lii lumungu dàngu na li pareta la Ihirailu pahunga lodu Luku Yorundangu — la ngaba Rumbingu, Nggàtu dàngu hawiangu na kabihu Manahi — da-pakata-nja da tau 2.700 ama bokulu la kuru umana i Yeria, mbuu ndàbada tau la ngora-maha da papindi-na i Hanganji Ndautu.