Read Kambera 1 LII NDAI 28 Bible Online

1 LII NDAI 28 - Kambera bible

1 LII NDAI 28

¹I Hanganji Ndautu na-wuangu pareta ka da-pauhi ndàba da liku uru Ihirailu la Yeruhali. Jia-duyaka hi da-pamàtungu hàla la Yeruhali da ma-pangora la kabihu, da mapawai ngaba la kaloka pareta, da ma-pangora la kalibaru, da ma-hamata-ha da banda da malanja da banda la maràda mangu hanganji hamangui da ma-tanara-ha da ana maràmba — na kababa-na ba hapajia-ha da tau bokulu la uma hanganji, da parawira dàngu da matuku - matuku, da-pauhi ndàba la Yeruhali.

²I Ndautu na-ndolaku la hanggada hi napanii, “Angu dedi, angu banjaru, patingingu! Mandai-maka ba ku-patikingu pawulu-nya Uma ma-padaingu ndumana na Pàti Pa-ràndingu, lata wihina i MIRI Alanda. Mbàda pa-yemangu-mangguka da pa-pahada wànya na Uma ngia pa-maraku-ndanya Nyuna.

³Tàka i MIRI nahiri-ngga palaku-nya nuna, nadu nyungga ba haàtu panjuri-ka, ba dangu-maka wai ria pabunggu.

⁴I MIRI, Ala pa-maraku-na na Ihirailu, napindi-kaka nyungga dàngu wàla wuanggu la pa-pareta la Ihirailu lundu nu - nu. Nyuna napindi-yaka na kabihu Yahunda la pa-ngalangu haàtu ma-pairungu; welingu la kabihu Yahunda i MIRI napindi-ya na kuru umana na amanggu. Welingu la mbuu ndàbada angu kuru umana na amanggu na-orangu-ka papindi-ka nyungga hi natuka nyungga hanganji la Ihirailu nggubulu-na.

⁵Nawua-ngga ana dangunggu, tàka welingu nu la madangu da ananggu napindi-yaka i Halomu la pa-pareta la Ihirailu, na pa-hanganji-na i MIRI.

⁶Tuna yia ba napanii-ngga i MIRI, ‘I Halomu na anamu nyunaka napa na ma-pahada-ngga Uma Nyungga. Kupindi-yaka nyuna la paana-nya, tàka Nyungga napa amana-nggaka.

⁷Jàka weli eti-mana la panunju pangala-nja da ukunggu mbuu ndàbada dàngu da pareta - pareta-nggu hama tuna na pawàna nàhu, napa Nyungga ku-paundu-nya na pahanganjina lundu nu - nu,’ wànangga,” wàna.

⁸Hàla hi na-pangala-nya na paniina i Ndautu, “Jia-duya nàhu, ha dimi rayatu-nggu, la hanggana na Alanda dàngu la hangga pa-màtungu-na mbuu ndàbana na Ihirailu, na banjaru-na i MIRI, nàhu ku-kamahi langatà - tàkanggai kai nunju hàlaha mbuu ndàbada da pareta-na i MIRI Alanda. Ba timi nu jia hi mimangu pangala-nya na tana hàmu yiana dàngu hi mi-pakangeha-nja da wàla wuami ngeru lundu nu - nu,” wànanja.

⁹Hàla hanggangu lai Halomu, napanii i Ndautu, “Ha ananggu, pekawa, ba Ala-munya na Ala pa-maraku-na na amamu. Lupangu-ma kau pa-atangu wikimu lai Nyuna bau weli etingu pa-tuturu manundu lai Nyuna. Nadu ba napi hàla-manya duna na pa-kanandi-nda dàngu na parinju-nda. Jàka muhimbu-ya Nyuna, napa muhunggu-maya duna, tàka jàka mu-dunjaku-nya, napa na-tulaku-makau duna lundu nu - nu.

¹⁰Namu hàmu-maya, i MIRI ba mbàda pindi-nanggauka nyumu la pa-pahada-nya na Uma na pa-panudangu-ya Nyuna. Jiaduya, nàhu ràma-yawa nuna ba wàngu kita hàmuna na etimu,” wànanya.

¹¹Hàlaka nu i Ndautu hi na-pakata-nya i Halomu mbuu ndàbana na pambàda pakaka hahana na hadana na Umana i MIRI, da nggundangu-na, lupa da kuru - kurungu-ka, dàngu na Rowa Mahupu matua ngia pa-jàmangu njala.

¹²I Ndautu na-pakata hàla-mbunya mbuu ndàbana na pambàda pakaka hahana la kanandingu-na, da talora dàngu da kurungu la winggiru-na, dàngu da nggundangu ngia pa-pahàmu malanja pawàngu la Umana i MIRI hamanai da nggundangu ngia pa-pahàmu-ha da pawotu - pawotu lai MIRI.

¹³Dàngumbu na-pakata-nya na pa-kalaratu-na na ngera pa-kalibaru-nanja da ratu dàngu da tau Lewi, na ngera patanggu - patanggu-da ba lupangu-ma da-paloku-ha ba wàna, nu na paràma-da la Umana i MIRI dàngu na ngera àrapu-ha mbuu ndàbada da pawàngu ba lumungu.

¹⁴Na panii-nya ngerangu jàka nggiki hamana ba ràmaha da àmahu rara àmahu bara da pa-pandoi pakaka - pakakahu,

¹⁵nduma nimbihu palita dàngu da tandai palita,

¹⁶ndumada da menja àmahu bara, dàngu ndumada da menja àmahu rara pangia-da da roti pa-payemangu lai Ala.

¹⁷Dàngumbu napanii-nya ngerangu na ngera danguda da àmahu rara ihi mbàngina da pawàngu ba pandoi ranggatu njàkapu, moku dàngu kadihi, na ngera danguda da àmahu bara dàngu àmahu rara da pa-pandoi kawinga,

¹⁸na ngera danguda da àmahu rara ihi mbàngina da pa-pandoi wàngu ngia pawotu maraku pangia patunu dupa dàngu da pa-pandoi wàngu kareta ndumada da kahala hada patau awangu ba dàngu wàlahu-da ruu kàpada la pinu Pàti Pa-ràndingu-na i MIRI.

¹⁹Hàla hi napanii i Hanganji Ndautu, “Mbuu ndàbada nuda ni hàla-manjaka daa la pambàda pakaka hahangu da pambàda tulihu ma-patangangu la ngerangu pawua wiki-nangga nyungga i MIRI,” wàna.

²⁰Tunaka nu i Hanganji Ndautu hi nahili paniinya i Halomu na anana, “Lupangu-ma bàdi nyumu ka na-màndungu la etimu dàngu kau tara uramu. Pakiri-nyawa na paràma, àmbu nggàradu pa-mangàdatu-mu. I MIRI Ala na palumu-nggu napa Nyuna na mandula kau. Nda jia dunjaku-ananggau napa. Napa na-karaha-makau duna hi lupa mu-palundu-nya mbuu ndàbana nuna na paràma.

²¹Na pa-paloku - paloku ba lumungu daa la Uma Ala mbàda pa-kawàri-manjaka wai ngerada da ngara ratu dàngu tau Lewi. Da maràma - maràma-ka da mamàhi la tuba ngerada haàtu - haàtu napa da-pambapa damanggau duda wàngu weli etida, dàngu da ngara ma-pairungu hamanai nggubulu ndàbana na rayatu napa da-karadaku-nya na lii pareta-mu,” wànanya.