Read Kambera 1 LII NDAI 29 Bible Online

1 LII NDAI 29 - Kambera bible

1 LII NDAI 29

¹Hàla panii-nanyaka i Hanganji Ndautu la tau mbuu ndàbana na ma-pauhi lai nu, “Welingu la ana - ananggu-ka i Halomu-ka na papindi-na i Ala. Na nyuna lalu mbana kanguraku-manapa dàngu ndedi nadangu-mapa na pa-mayàmu-na, tàka na paràma yiana lalu mbana bokulu-na. Hinggilunai napa na pa-pahadangu nda uma hanganji angunda patauya, tàka Uma ndumana i MIRI Alaya.

²Mbuu ndàbada da pawulu wànguya nuna na Uma dàngu da kanaingu-na mbàda payema-manggu-njaka tutu ràka pamàka-nggu. Mbàda pa-uhingu-mangguka àmahu marara, mabara, parunggu, bàhi, ai, watu pawilingu, watu mata tawuru, watu ma-huratu hangia - hangia pa-manandangu wàna dàngu dangu langatàka watu pualamu.

³Langatàka paraï ruku mbuha-nggunya na Uma Alanggu kuwotu-mbuhaka da àmahu mabara marara welingu la banda wikinggu:

⁴àmahu rara mahàmu halawàla hangahu tòngu rihida, dàngu àmahu bara ihi mbàngina ràkangu 240 tònguda da patapu wànya na dindina na Umana i MIRI, dàngu ndumada da malanja hawiangu da paràma-da napa da ngara tau da mamàhi paràma. Màla, hili nggamupa nàhu na ma-mbuhangu pa-wuangu pawotu-na lai MIRI dàngu weli etina?” wàna.

⁶Da ngara ma-pangora la kalibaru, da ngora kabihu, da ngara parawira dàngu da mangaba-nja ba papida nyudaha da banda hanganji peka-danyaka ba da-mbuhangu-mai duda nyuda pawotu hungguda.

⁷Ka wuangu-dahaka yiada da patiki pa-ndàkingu ndumana la pa-pahada wànguya na Umana i MIRI: àmahu rara 170 tòngu rihida, àmahu bara 340 tòngu rihida, parunggu tika pa-620 tònguda dàngu bàhi 3.400 rihi tònguda.

⁸Da tau da maningu watu mata tawurungu da-pakata-nya i Yahialu ka na-patama-nja la kanai àmahu Umana i MIRI. (I Yahialu tau Lewi welingu la kalibaru-na i Nggerihongu-ya.)

⁹Wàngu eti-mana duna ba na-wuangu lai MIRI na rayatu, dàngu da-hawola wànguma da etida ba dadangu-maka da pawotu-da. I Hanganji Ndautu na-hawola wàmanyai duna na etina.

¹⁰Nu la hangga tau dangu i Hanganji Ndautu nawotu-nya i MIRI. Napanii, “Dou MIRI Ala na pa-maraku-na i Yakupu boku la mangilu-ma, pa-wotungu-kau Nyumu lundu nu - nu!

¹¹Nyumu ma-bokulu langatàka-kau dàngu mambiha-kau. Nyumu mu-mangunju, mu-bunjuku dàngu mu-bokulu. Mbuu ndàbana na maninya la awangu dàngu la tana mangu-munya. Nyumu hanganji bokulu-kau ma-kuaha-ya mbuu ndàba-naka.

¹²Mbuu ndàbana na pawulu wàngu dàngu na pa-mbokaru wàngu ma-pawelingu lai Nyumuha; Nyumu ma-kuaha-ya mbuu ndàbana wàngu kodi màkamu dàngu rihi mehamu, Nyumu mumbiha jiapa nda nggamuya bau tuya tau bokulu dàngu tau kapàru.

¹³Nàhu, dou Alama, ma-pamalangu-nggau, dàngu mawotu-nya na tamumu na ma-bokulu.

¹⁴Nyungga dàngu yiana na rayatu-nggu langatàka nda mamàka-a duma pawua-nggau Nyumu ana ngga - nggàra, nadu mbuu ndàbana ba pawua-mu Nyumu-maduha dàngu jàka nggàraha da pawua-manggau ba mangumu Nyumu-maduha.

¹⁵Nyumu mupinya dou MIRI, hama tuna ba jia ndàbaha da boku la mangilu-ma, nyumai duma jia-maya ba malaku-nya yiana na luri hama tuna na tau tàka dàngu na tau nàmu-kama. Na lurima nyuma hama tuna na ninu na ma-làpahu, dàngu nda peku-ana nyuma la pamara welingu la meti.

¹⁶Dou MIRI, Alama, mbuu ndàbada yiada da malanja ma-pawilingu hi ma-pauhi-nja màta ka wulu wànya na Uma ndumamu Nyumu, ka pekuna ba ma-maraku-nya na tamumu na ma-matua. Tàka nu mbuu ndàbana ngala-manja welingu lai Nyumu wikima dàngu ba mangu-madumu-njai.

¹⁷Kupi-manya duku nyungga bau kamanya etina haàtu - haàtu na tau dàngu bau mbuhanya na tau na ma-yahangu etina. Dàngu tànji eti-manggu dàngu nggaüru eti-manggu ba kuwotu-ha yiada mbuu ndàbada lai Nyumu. Hakahii wiki-manggu-nyaka nggiki hamana na banjaru-mu na ma-pauhi lai yiahu ba nawotu tanda maraku-na lai Nyumu ba wàngu mbaha eti-mana duna.

¹⁸Dou MIRI Ala, na pa-maraku-da i Ambarahàmu, i Ihàku dàngu i Yakupu, da boku la mangilu-ma, mangga àrunya na banjaru-mu ka na-padaingu la pambuha-nggau Nyumu hama tuna nàhu dàngu ndula àruha ka da-tuturu mànu lai Nyumu.

¹⁹Wua àrunya i Halomu, na ananggu, ka narinju pa-langatàkangu la patundu hàlanja da pareta-mu mbuu ndàbada dàngu la pa-pahada-nggau Uma ngia pa-lumungu, da pa-pahada wànya ba mbàda payema-nggunjaka,” wàna.

²⁰Ba nahàla-ka pa-hamayangu tuna nu, panii-nanyaka i Ndautu la tau dangu na ma-pauhi lai nu, “Wotu-nyawa i MIRI, Alami!” wàna. Mbuu ndàbada nuda da tau wotu haila-danyaka i MIRI, na Ala na pa-maraku-da da boku la mangilu-da. Ka maràbaku-danyaka ba datembi-ya i MIRI dàngu na hanganji.

²¹La lodu hadangu harii rupu-danjaka da banda ba kameti maraku lai MIRI-ha, hàla hi da-paberi-nya na rayatu. Hinggilu-da nuda ningu 1.000-da da hapi mini dàngu 1.000-da da mbimbi mini dàngu 1.000-da da mbimbi kamboka-na da parupu dàngu patunu mangu heungu la pinu ngia pawotu maraku. Da-maraku wàngumbu angguru da karia-mada duda nuda da tanda maraku.

²²La lodu nuna ngangu ngunungu-danyaka ba da-nggaüru la hanggana i MIRI. Hàla, la da-panduangu wàna pakada-danyaka ba nyunaka i Halomu na hanganji. Wànya na tamuna i MIRI pa-karàngi-danyaka ba nyunaka i Halomu na manjadi hanganji tàka i Handuku jiaya na ratu.

²³Ba nyunaka i Halomu na mahilu-ya na amana i Ndautu, mandapu-nanyaka la kanjàka hanganji na pambàda pamàndu-na i MIRI. Nyuna hanganji ma-paura-ya dàngu na-mahumbaru-nya paraïna tau Ihirailu nggubuluna.

²⁴Mbuu ndàbada da mapawai ngaba la pareta dàngu la ma-katangu madàka lupa da a - anana hawiangu i Ndautu da-pajia hàlaya na kuaha-na i Halomu ba hanganji-ya.

²⁵I MIRI na-pawiti-nya mbuu ndàbana na rayatu la pa-mahumbaru-nya i Halomu dàngu natuya i Halomu la pahipu mara - rauha da hanganji - hanganji-ka da mambàda pareta la Ihirailu.

²⁶I Ndautu anana i Ihai na-pareta-ya na Ihirailu nggubulu-na,

²⁷patu kambulu ndaungu mandai-na. La Hemburungu na-pareta pihu mbua ndaungu tàka la Yeruhali tailu kambulu tailu mbua ndaungu.

²⁸Nyuna nawulu dàngu patembi-ya, tàka ba nameti kaweda malundungu-mana-nyaka. I Halomu na anana nyunaka na ma-hanganji hiluya.

²⁹Na ruku lurina i Hanganji Ndautu piti welingu la kawunga-na lundu nanjàpu-na pa-tulihu-mayaka la Mbukuna i Wunangu Hamuilu, i Wunangu Natàngu dàngu i Wunangu Nggàtu.

³⁰La mbuku nuda dapeka-ya na ruku pareta-na, na kuaha-na dàngu mbuu ndàbana na matumbu la ngera wikina, la ngera banjaru Ihirailu dàngu na ngerada da pa-hanganji-ka la winggiru-na na Ihirailu.