Read Kambera 1 LII NDAI 5 Bible Online

1 LII NDAI 5 - Kambera bible

1 LII NDAI 5

¹I Rumbingu kawunga anana i Yakupu-ya. Tàka ba na-pakajari-yaka i Rumbingu na pa-malili wànguya na haàtu na kala wihina na amana, jia-duyaka na ngabana ba kawunga anaya pa-pukalu-yaka hi wuaya lai Yuhupu. Jiapa-kai ba tuna na marihi pa-kapingatu la wàlana i Yakupu nda i Yuhupu-a, tàka jiaya na kabihu Yahunda. Dàngu na ma-kawunga hanganji la banjaru Ihirailu nggubulu-na welina la kabihu Yahunda.

³I Rumbingu kawunga anana i Yakupu, dapatu da anana mini: i Henuku, i Palu, i Hehirungu dàngu i Kàrami.

⁴Yiada-ha da pa-ndàkingu-da da wàlana i Yoilu: i Hamaya, i Nggòku, i Himei, i Mika, i Reaya, i Mbaàlu dàngu i Mbaera. I Mbaera jiaya na ma-pairungu la kabihu Rumbingu na payàpa-na i Tinggulàtu-Pilehiru hanganji Ahuru, hàla hi ngàndiya la ngia patanawangu.

⁷Nu la ndalaru dedi pa-tulihu-mbuha da ama bokulu kalibaru da ma-pandutungu yiada la kabihu Rumbingu, jiaha: i Yeyilu, i Hakaria,

⁸dàngu i Mbela anana i Anjàhu, umbuku-na i Hema welingu la kalibaru Yoilu. Na kabihu Rumbingu na-ngiangu la Arowiru dàngu la ngaba na ma-pakiringu welingu la Arowiru hanàhungu hu dia lundu tàka la Nembu dàngu Mbaàlu-Miungu.

⁹Dadangu ailulu da banda pa-pahàla-da la ngaba Nggiliatu. Jia-duyaka hi dangia-nya la ngaba pahunga lodu lundu la maràda telangu na ma-tawàlahu paràpangu la Luku Epuràtu.

¹⁰Ba ngaru-napa na Hanganji Haulu, na kabihu Rumbingu na-kangaburu-ya hi da-pakàku-ya na paraingu Hàkari la pahunga loduna na Nggiliatu, hàla hi da-mandapu-nya na paraingu nuna.

¹¹La mbara diana na ngaba kabihu Rumbingu na-ngiangu na kabihu Nggàtu la tana Mbahàngu lupa toma la Hàlaka la pahunga lodu.

¹²Welingu la kabihu Nggàtu i Yoilu jiaya na boku la mangilu-na na kalibaru tau ma-pangora, tàka i Hapàmu jiaya na boku la mangilu-na na kalibaru padua wàna. I Yainai dàngu i Hapàtu jiaha da boku la mangilu-da da kalibaru hawiangu la Mbahàngu.

¹³Da tau hawiangu la kabihu Nggàtu datama la pihu mbua kalibaru yiada da mapandutungu: Mikayilu, Mahulàmu, Heimba, Yorai, Yakàngu, Hiya dàngu Embiru.

¹⁴Nyuda wàlana i Ambihaïlu-ha anana i Huri. Na pa-ndutungu dedida welingu lai nyuda hanàhungu la bokuda tuna yia: i Ambihaïlu, i Huri, i Yarua, i Nggiliatu, i Mikayilu, i Yehihai, i Yàhundu, i Mbuhu.

¹⁵Na ama bokulu-da nuda da kalibaru, jiaya i Ahi, anana i Àbandialu, umbuku-na i Ngguni.

¹⁶Nyuda da-ngiangu la ngaba Mbahàngu dàngu Nggiliatu, dàngu la parai - paraingu la ngabana lai nu lupa mbuu ndàbana na maràda ma-parumbangu la Harungu.

¹⁷Na ndalaru dedi yiana paniti-ha ba ngaru-napa i Yotàmu hanganji Yahunda, dàngu i Yerumbiamu hanganji Ihirailu.

¹⁸La kabihu Rumbingu, Nggàtu dàngu kabihu Manahi la pahunga lodu Yorundangu ningu 44.760-ya na panjuri pambàda pa-ndàmangu dàngu ma-manyàmungu pa-kawanangu temingu, hapanda dàngu pana.

¹⁹Nyuda da-pabera papanja da kabihu Yeturu, Napi, dàngu Nondàpu, nu da kabihu la banjaru Hàkari.

²⁰Nuda da panjuri dawaiya i Ala hi dakarai pa-ndulangu lai Nyuna, tàka hi na-patutu-nya na pakarai-da paraïna i Ala, hi nawua-nja patalu wàngu ba hangganja da tau Hàkari.

²¹Nadu nuna na pabera ba pawuku-na i Alaya, jia-duyaka hi nadangu na muhu na pa-pameti-da. Hi da-tanawa-nya na tau 100.000, dawàhi-ha ba 50.000-da da ota, 250.000-da da mbimbi dàngu hi 2.000-da da kalandai. Tunaka nu ka pa-daingu-danyaka la ngabana lai nu lundu tomaya na tanawangu-na dàngu na karia-nya la pawàru-nya[6] na banjaru Ihirailu.

²³Hawiangu da tau kabihu Manahi da-ngiangu la ngaba Mbahàngu lundu la mbara dia lupa toma la Mbaàlu-Herumungu, Heniru dàngu Palindi Herumungu. Parukangu pamandai parukangu-danyaka padangu.

²⁴Yiada-ha da ama bokulu la kalibaru-da: i Hepiru, i Yihei, i Elialu, i Àharialu, i Yerimia, i Haundauya dàngu i Yàhandialu. Nyuda mbuu ndàbada panjuri kaborangu-ha.

²⁵Da tau Ihirailu nda da-tuturu lai Ala na pa-maraku-da da boku la mangilu-da. Da-taluru-ma-anya hi dalua palumu-nja da marapu-da da banjaru pawàngga-na i Ala welingu la Kanaàngu.

²⁶Jia-duyaka i Ala hi najuju-ya na etina i Pulu hanganji Ahuru, ka lua-nanyaka pa-kangaburu-ya nuna na tana. I Pulu, i Tinggulàtu-Pilehiru wàda-mbunya tamuna. Hàla da kabihu Rumbingu, Nggàtu dàngu Manahi la ngaba pahunga lodu Yorundangu palaü-nanjaka pa-tanawangu hi nawàru-nja la Hala, Hamburu, Hara dàngu la hau pangia la lihi Luku Nggohàngu. Lai nu pa-engangu-danyaka hi da-padaingu lundu nàhu.