Read Kambera 2 LII NDAI 1 Bible Online

2 LII NDAI 1 - Kambera bible

2 LII NDAI 1

¹I Halomu na anana i Hanganji Ndautu hanganji-yaka na ma-kapingatu mandapu-na la pa-hanganji Ihirailu. I MIRI na Alana na-pakanyuru-ya hi lupa kanjupu kuaha-ya.

²Mbuu ndàbada da kapala pamba 1.000 dàngu pamba hangahu, mbuu ndàbada da mapawai ngaba la pareta, dàngu mbuu ndàbada da ama bokulu kuru uma la Ihirailu nawua-nja pareta paraïna i Hanganji Halomu

³la palua karia-nya nyuna la ngia pa-lumungu la Nggimbiungu. Ka laku-danyaka lai nàhu, nadu ba lai nuduya na ngia paninya na Maüna i MIRI na pawulu-na i Muha atana i MIRI ba la maràda telangu-hapa. (

⁴Na nyuna na Pàti Pa-ràndingu-na i MIRI ninyaka la Yeruhali la maü pawulu-na i Ndautu ba jiaya na paleli-nanya welingu la Kiriyàtu-Yiaarimu.)

⁵Na ngia pawotu maraku welingu la parunggu na pa-pandoi-na i Mbahalialu anana i Uri umbuku-na i Huru, ni-mbunyapa la Nggimbiungu la hangga Maüna i MIRI. Lai nuyaka i Hanganji Halomu dàngu nggubulu-na na rayatu ba da-maraku-nya i MIRI.

⁶La hanggana nuna na Maü nawotu maraku na hanganji la pinu ngia pawotu maraku parunggu 1.000 ngiu banda ka kameti maraku patunu-ha ndumana i MIRI.

⁷La rudungu nuna na-paitangu wikina i Ala lai Halomu na mapanii dànya, “Karaiwa nggàra bia pambuha-mu hi Halomu, napa kuwua-manggau duku,” wànanya.

⁸Nahema i Halomu, “Dou Ala, Nyumu pa-itangu-mamu-nyaka ba kanjupu mbuha-munya na amanggu i Ndautu, tàka mbàda wotu-munggaka nyungga la pa-hanganji hiluya nyuna.

⁹Nàhu dou MIRI Ala, màla àruki kau patutu-nya na paràndi-mu la amanggu. Mbàda wotu-munggaka nyungga la pa-hanganji-nya na banjaru bokulu na panda taü padiha-ya na danguna.

¹⁰Jiaya nu wua àrungga kateuru katàraku kaminaku manggàna la pa-kapipi wànja nyuda. Jàka nda tuna nu nggikina wànggu-aka ka kumàka pa-pareta-ya na banjaru-mu na madangu tuna yia?” wàna.

¹¹Nahema i Ala lai Halomu, “Na pakaraï-mu mahàmu-ya. Nyumu ndau karai wulu, jàka ndia banda, jàka ndia wuwa tamu, jàka ndia ka dameti da muhumu jàka ndia luri ma-lundungu nduma wikimu, tàka karaï-munya na manggàna dàngu na pingu ndumana la pa-pareta-ya na banjaru-nggu na pa-pakata-nggu lai nyumu.

¹²Jia-duya napa kuwua-nggaunya na manggàna dàngu na pingu. Hinggilu-na nu napa ku-panduma-nggaunya na rihi mbokaru, na rihi wulu dàngu na rihi wuwa tamu welingu la nggi hanganji biaya ka àmangu-kai jàka ndia ka ngerukai,” wànanya.

¹³Tunaka nu dunjaku-nanyaka paraïna i Halomu na ngia pa-lumungu la Nggimbiungu la ngia paninya na Maüna i MIRI, hàla beli-nanyaka la Yeruhali. Welingu lai nu ba na-pareta-ya na Ihirailu.

¹⁴Na-pamàtu-nya na kanguhuru pabera-na wàngu 1.400 kareta pabera dàngu 12.000 njara pabera. Hawiangu natuha la Yeruhali, tàka hawiangu da marihi natuha la parai - paraingu hawiangu.

¹⁵La rehi pareta-na i Halomu, da àmahu rara da àmahu bara banda malanja pa-ndàmangu-ma-ahaka la Yeruhali, hama tuna da watu; tàka da ai kajuu Limbanongu kanjupu danguha hama tuna da ai kapilitu pakàli ndàmangu.

¹⁶Palindi lulunja da mini danggangu ma-pambapa dànya na hanganji patama ngàndiha da njara welingu la Mehiru dàngu welingu la Kewi,

¹⁷dàngu kareta - kareta pabera patama ngàndi welingu la Mehiru-ha, hàla hi hili paluhu ngàndiha la hanganji - hanganji Heti dàngu Hiria, 150 àmahu bara heu njara, dàngu 600 àmahu bara hau kareta pabera.