Read Kambera 2 LII NDAI 10 Bible Online

2 LII NDAI 10 - Kambera bible

2 LII NDAI 10

¹I Rehambiamu nalaku la Hikimu nadu mbuu ndàbana na tau Ihirailu la ngaba mbara dia mbàda pauhi-daka lai nu màta ka katua-ya nyuna la pa-hanganji ba wàda.

²La rehi nu i Yerumbiamu anana i Nembàtu, la Mehiru-mayapa ba napalai-nya i Hanganji Halomu. Ba narongu-yaka na rukuna i Rehambiamu, beli-nanyaka la Ihirailu.

³Na rayatu la mbara dia dadunda-nya i Yerumbiamu, hàla laku kariangu-danyaka la pa-hurungu lai Rehambiamu. Ka panii-danyaka,

⁴“I Halomu na amamu Tamu Umbu lalu pabuku pambotu-nanggama. Nàhu nyuna Tamu Umbu jàka mu-pahalela-dunggama bukuma dàngu jàka na harangu najaru-ki na jàrama napa ma-tangara-ma duma lai nyumu Tamu Umbu,” wàdanya.

⁵Nahema i Rehambiamu, “Màta ka ku-pangàdangu pàku. Tailu modungu kai hilu maika,” wànanja. Ka beli-danyaka duda nuda da tau.

⁶Hàla i Rehambiamu hi nakarai lii padaü la ama bokulu da makàli pa-daüngu pulungu lai Halomu amana i Rehambiamu. “Nggikina wàngguka bàdi ba kuhema-ha nàhu da tau? Nggàra-yaka na lii padaü-mi nyimi?” wànanja.

⁷Dahema nyuda, “Ka kuwunda-nya mahàmu na rayatu jàka wàmudu Tamu Umbu, dàngu jàkau pahàmu-ha da etida, wua bianja hema mahàmu, napa datuturu-ma duda lundu nu - nu lai nyumu Tamu Umbu,” wàdanya.

⁸Tàka na lii padaü-da da ama bokulu nda na-wàrihu-aya paraïna i Rehambiamu. Tàka pa-mbelingu-ma-ananya la anguna pabidi mini, la hama rànjana, nu da ma-pambapa danya nyuna.

⁹“Nggàra-yaka na lii padaü-mi nyimi la ngera hema-nggunya na rayatu da-makarai ka ku-pahalela-ya na bukuda?” wàna ba na-paàra-nja.

¹⁰Dahema nyuda, “Tuna yia bia bàdi bau paniinja Tamu Umbu, ‘Jiapa nda nggikina na mangonangu-nggu, tàka kurihi-nyapa na amanggu la pa-kapàru.[7]

¹¹Na amanggu ba na-pabuku pambotu-kai tàka nyungga napa hili manaü pabuku pambotu-nggunggaipa. Nyuna na-pawàhiku wànggai iwi, tàka nyungga duku napa ku-ràmbahu wànggai ràmbahu maningu tara bàhina wàmu!’ ” wàdanya.

¹²Palàngangu-ka tailu mbua lodu i Yerumbiamu dàngu mbuu ndàbada da tau hurungu beli-danyaka lai Hanganji Rehambiamu, hama tuna na pareta na pambàda wua-nanja.

¹³Na-panjurangu welingu la lii panaungu-da da ama bokulu, nawàngu pa-hanggàritu-ma ba napulu dànya na rayatu na mamai lai nyuna.

¹⁴Nunjuya na lii panaungu-da da bidi mini, panii-nanyaka, “Na amanggu nawua pambotu-nggai bukumi, tàka nyungga napa ba kuwua-nggai bukumi hili rihi mbotu-napa. Nyuna na-pahàwiku wànggai ràmbahu, tàka nyungga duku napa ku-ràmbahu-kai wàngu ràmbahu maningu tara bàhina!” wànanja.

¹⁵Nda na-wàrihu-ayapa na pakarai-na na rayatu. Na nyuna nuna pawuku-na i MIRI Ala-maya. Nadu ba pa-deningu-nanyaka na pambàda nyurana i Wunangu Ahia welingu la Hilu na rukuna i Yerumbiamu anana i Nembàtu.

¹⁶Nu ba naita-yaka paraïna rayatu ba nda nabihu na hanganji pa-patingi-nja, ka warangu-madua-danyaka, “Nggàra ihi wànyapa i Ndautu dàngu da wàlana ba nda nggàraki palumu-danda nyuta. Màlawa, ha rayatu Ihirailu, maingu-wa ka tabeli! Màta-nyaka duna i Rehambiamu ka nalumu-nya na wai ngera wikina!” wàda. Ka kabeli-nanyaka na tau Ihirailu,

¹⁷tàka i Rehambiamu hanganji la ngaba Yahunda-kia-yaka.

¹⁸Jiapa-kai ba tuna, i Hanganji Rehambiamu na-paràha-nya i Anduniràmu, na ma-hamata-ya na tau na maràma paràma ma-pahàni, ka na-pamanda-nya na rayatu ba wàna làti. Tàka hi nggepi nàhaku-ma-adanya watu hi lupa nameti. Nyuna wiki i Rehambiamu namara, ka kaliti parengga-madua-nanyaka na kareta-na hi napalai laku la Yeruhali.

¹⁹Piti welingu la rehi nuna na rayatu mbara dia la pa-hanganji Ihirailu nuangu-madua-naka ba na-patula ngganggangu hangganja da hanganji wàlana i Ndautu.