Read Kambera 2 LII NDAI 11 Bible Online

2 LII NDAI 11 - Kambera bible

2 LII NDAI 11

¹Ba natàka-ka la Yeruhali i Rehambiamu, pa-uhingu-nanyaka panjuri mahàmu halawàla 180.000-ya welingu la kabihu Mbanyamingu dàngu Yahunda, ka beraya na tau Ihirailu dàngu ka pa-lànyapu beliya na kuaha-nanja da kabihu - kabihu la mbara dia Ihirailu.

²Tàka i MIRI hi na-palewa-ya i Wunangu Hamaya,

³pa-patàka-nya na lii yiana lai Rehambiamu dàngu la mbuu ndàbana na kabihu Yahunda dàngu Mbanyamingu,

⁴“Àmbi pabera-du dàngu angu dedimi tau Ihirailu. Beli ndàba nyimi! Nggàraya na matumbu pawuku-nggu Nyungga-maya!” wàna. Ka pa-namatungu-danyaka nyuda mbuu ndàbada la pareta-na i MIRI dàngu nda datoma-apa la palua pabera-ya i Yerumbiamu.

⁵I Rehambiamu engana la Yeruhali hi na-paràhangu tau la pa-pahada-nja da tindingu ndumada da parai - paraingu la ngaba Yahunda dàngu Mbanyamingu, nu:

⁶na paraingu Mbetulehimu, Etàmu, Takua,

⁷Mbetu-Huru, Hoku, Andulàmu,

⁸Nggàta, Marihu, Hipu,

⁹Anduraïmu, Lakihu, Aheka,

¹⁰Hora, Ayalungu dàngu Hemburungu.

¹¹Na-pakapingatu-ha da parai - paraingu da ma-patindingu dàngu lai nu hi nabànjalu-nya haàtu kimunda la nimbihu paraingu. Nuda da paraingu na-pamàtu-nja pangangu, mina haitungu dàngu angguru,

¹²hamanai temingu dàngu nimbu. Jia ba tuna nu na ngaba Yahunda dàngu Mbanyamingu hi na-padaingu la kuaha-na nyuna.

¹³Da ratu - ratu dàngu da tau Lewi welingu la ngaba Ihirailu dalaku pa-pambulu dànya i Rehambiamu.

¹⁴Da tau Lewi da-dunjaku-nja da padangu dàngu da tanada hi da-lelingu la Yahunda dàngu la Yeruhali, nadu ba nda na-pahia-anja pa-palaku-ya na paràma-da ba ratuna i MIRI-ha paraïna i Yerumbiamu, hanganji Ihirailu dàngu da mahilu-ya.

¹⁵I Yerumbiamu nawotu-mahaika duna da ratu wikina la pangia palumu-nja da marapu dàngu da wàndi lupa na kahala hada hapi na pa-pandoi wikina.

¹⁶Na tauka welingu la mbuu ndàbana na kabihu la Ihirailu na maweli etingu pa-rinjungu la palumu-nya i MIRI, Ala Ihirailu, mai-danyaka la Yeruhali tundunja da tau Lewi, ka peku wotu-danya kameti maraku i MIRI, na Ala na palumu-da da boku la mangilu-da.

¹⁷Jia-duyaka ba tuna nu na pa-hanganji Yahunda hi lupa narihi kapàru-napa. La dalu tailu mbua ndaungu ba da-pambapa dànya na pareta-na i Rehambiamu anana i Halomu, dàngu hi daluri hama tuna la rehi pareta-na na Hanganji Ndautu dàngu na Hanganji Halomu.

¹⁸I Rehambiamu na-kanoma-ya i Mahalàtu; na amana i Mahalàtu jiaya i Yirimutu anana i Ndautu tàka na inana jiaya i Ambihaïlu anana i Eliapu, umbuku-na i Ihai.

¹⁹Nyuda ningu anada tau madua haàtu anakeda mini: i Yeuhu, i Hemaria dàngu i Hahàmu.

²⁰Hàla i Rehambiamu na-kanoma-ya i Maaka anana i Àpuhalomu. Nyuda da-ngalangu tau mapatu anakeda mini: i Ambia, i Ataï, i Njinja dàngu i Halomitu.

²¹I Rehambiamu ningu tau hakambulu mawalu-ha da papaha-na dàngu hi tau nomu kambulu-ha da kala wihina, tau dua kambulu mawalu-ha da anana mini dàngu hi tau nomu kambulu-ha da anana kawini. Welingu la papaha-na dàngu la kala wihi-naka, na parihi mbuhana jiaya i Maaka.

²²Tuna nuduka hi narihi mbuha ninyapa i Ambia anana i Maaka welingu la ana-naka hawiangu dàngu hi napindi-ya la pahilu-ya nyuna pa-hanganji.

²³Wàngu manggàna-na i Rehambiamu ba nawua-nja wai ngerada da anana, hi nabànja - banjalu-ha la parai - paraingu maningu tindingu la nggubulu ngaba Yahunda dàngu Mbanyamingu. Nawua-nja pangangu ma-bundu làndangu dàngu napiti-nja papaha danguda.