Read Kambera 2 LII NDAI 12 Bible Online

2 LII NDAI 12 - Kambera bible

2 LII NDAI 12

¹Ba nalua-yaka pa-kapingatu na mandapu-na i Hanganji Rehambiamu, nyuna dàngu nggubulu-na na rayatu Ihirailu talarahu-danyaka na Ukuna i MIRI,

²dàngu nda da-tuturu-anyapa Nyuna. La ndaungu palima wàna na pareta-na i Rehambiamu, tàka-nanyaka i Hihàku, hanganji Mehiru la pa-kangaburu-ya la Yeruhali

³nawànja ba 1.200-da da kareta pabera, 60.000-da da tanatara li la njara, màlai da panjuri dangu ba nda pataü padiha-ha, hapajia ndàbaha da tanatara Limbia, Huki dàngu Hundangu.

⁴Nawàhi-ha da paraingu maningu tindingu la Yahunda hi na-ngonjaru lundu tàka la Yeruhali.

⁵La rehina nuna i Hanganji Rehambiamu dàngu da ngara ma-pangora la Yahunda mbàda pauhi-daka la Yeruhali ba dapalai-nya i Hihàku. Ka tàka-nanyaka i Wunangu Hamaya lai nyuda na mapanii-nja, “Yiana-ya na liina i MIRI, ‘Nyimi mi-dunjaku-nggaka, jia-duyai duku hi ku-dunjaku-nggai, nàhu hi na-kuaha-kai paraïna i Hihàku,’ wàna,” hi wànanja.

⁶Na hanganji dàngu da ngara ma-pangora peka-danyaka ba tuba njala-madaka. Dapanii, “Nggàraya na palaku-na i MIRI mamola-maya duna,” wàda.

⁷Ba naita-yaka paraïna i MIRI ba da-pawawangu wiki tuda nu, hi nahili paniinya i Hamaya, “Ba ngaha-daka papeka njalada, nyuda nda ku-pamija mau-aha, tàka napa ku-pamara-ha; la Yeruhali nda na-làjaru-a. Na nyuna ba tuna, napa i Hihàku

⁸na-kuaha-mahapa duna, màta ka dapinya la pa-kawàri-ya ba hauya ba da-paatangu wikida lai Nyungga dàngu ba da-paatangu wikida la ma-kuaha la pinu tana,” wàna.

⁹Ka tàka-nanyaka i Hanganji Hihàku hi na-kangaburu-ya na paraingu Yeruhali dàngu hi napiti-ha da malanja ma-pawilingu la Umana i MIRI dàngu la uma hanganji, jia-mbuha da temingu àmahu rara da pa-pandoi-na i Hanganji Halomu.

¹⁰Ka pandoi-kina-njaka hiluda paraïna i Rehambiamu temingu parunggu, hi na-pakata-nja da parawira da madaiya na pindu bokulu uma hanganji.

¹¹Handàka lua - handàka luana na hanganji la Umana i MIRI, da ngara mini manggangu dapiti-ha nuda da temingu, hàlaka nu pabeli-danjaka la kuru manggangu.

¹²Ba na-pawawangu-ka wikina na hanganji la hanggana i MIRI, dàngumbu ba ningupa maha - hàmu la Yahunda, ka kandàdahu-nanyaka na hànggana i MIRI lai Rehambiamu, nda napamau ailulu-aya.[8]

¹³I Rehambiamu na-pareta la Yeruhali dàngu na kuaha-na parukangu-mana-nyaka pa-bokulu. Nyuna na ndaungu lurina patu kambulu hau ndau-naka ba na-katangu hanganji, dàngu hakambulu pihu mbua ndauna ba na-katangu pareta la Yeruhali, na paraingu na papindi-na i MIRI welingu la nggubulu Ihirailu na ngia palumu-nya Nyuna. Na inana i Rehambiamu jiaya i Naama welingu la tana Amungu.

¹⁴I Rehambiamu nawunda ma-akatu, nadu ba nda na-katingangu la palaku-nya na pambuha-na i MIRI.

¹⁵Na rukuna i Rehambiamu weli mulangu lupa njàpuna hamanai na ruku dedina, nimanja la Mbuku Lii Ndai pa-tulihu-na i Wunangu Hamaya dàngu la Mbuku Lii Ndai patulihu-na i Wunangu Indu. Nyuda i Rehambiamu dàngu i Yerumbiamu naingu tumbuna na pabera.

¹⁶I Rehambiamu nameti hi taninya la reti maràmba la Paraingu-na i Ndautu. I Ambia anana jia-yaka na mahilu-ya.