Read Kambera 2 LII NDAI 15 Bible Online

2 LII NDAI 15 - Kambera bible

2 LII NDAI 15

¹Na Ngahuna i Ala na-harua-ya i Wunangu Aharia anana i Onditu,

²hi lupa nalua tomaya i Hanganji Aha, hi napanii, “Ha Hanganji Aha, dàngu nggubulu-na na mangia-nya la Yahunda dàngu la Mbanyamingu! Patingingu! I MIRI nalihi-manggai jàka milihi-nya Nyuna. Jàka mikarai-ya panaungu-na i MIRI, napa nawua-manggai. Tàka nyimi jàka ndai ingaya Nyuna, Nyunai duna nda nainga-akai.

³Mandai ailulu-maka na tau Ihirailu ba nda na-paatangu wikina lai Ala na ma-deningu, ba nda ningu uku - uku panunju-da dàngu ba nda ningu ratu - ratu da matanggu papeka-nja nyuda.

⁴Tàka jàka ninjaka la ma-handuka, karai-danyaka pa-ndulangu lai MIRI, na Ala Ihirailu. Karai-danyaka panaungu, nu hi nawua-nja.

⁵La rehina nuna na tau nda peku laku dàngu hàmungu-ana, nadu la hau tana - hau tana ba ningu padua mapariu raüngu.

⁶Na hau banjaru na-kapidihu-ya na hau banjaru, na hau paraingu na-kapidihu-ya na hau paraingu, nadu bai Ala-maka na ma-patàka-nya na pariu raüngu bokulu lai nyuda.

⁷Na nyuna nyimi màta kai patoru-nya dàngu kai tara urami. Napa na paraï rukumi nalingu-ma duna,” wànanja.

⁸Ba narongu-yaka i Aha na puluna i Aharia anana i Onditu, ringgitu-nanyaka na hamangu-na. Na-tainggahu hàlaha da marapu la tana Yahunda dàngu Mbanyamingu, dàngu la paraingu da pambàda taluda la palindi Epuraïmu. Dàngu na-pahàmu-ya na ngia pawotu maraku manguna i MIRI na maninya la talora Umana i MIRI.

⁹Dangu tau welingu la Epuraïmu, Manahi dàngu Hamiungu da ma-pambulungu lai Aha, dàngu hi da-ndàdiku la ngaba pa-hanganji-na, nadu ba daita-ya nandula-nanja paraïna i MIRI. I Aha na-paràha hàlanja da tau nuda la paangu-nja da tau Yahunda dàngu Mbanyamingu

¹⁰la pa-pauhi la Yeruhali. Ka pauhi-danyaka la wulangu tailu la ndaungu hakambulu lima kandai pareta-na i Aha.

¹¹La lodu nuna dawotu-nya maraku i MIRI, 700 hapi dàngu 7.000 mbimbi, pawàhi-da ba da-rambangu ba dabeli welingu la pa-pabera.

¹²Da-paràndingu lai MIRI ba mbulungu eti dàngu mbulungu hamangu-madanya-ka nyuda la pa-marubuku lai MIRI, Alada da boku la mangilu-da.

¹³Nggamu biaya, ma-kaweda jàka ndia bidi tau, mini kawini, na manda ma-rubuku lai MIRI pahuku pameti-ya.

¹⁴Dawàngu pa-pakodungu ba da-harangu lai MIRI, nyuda ba pamàndu-madanya nuna na paràndi-da. Tunaka nu ka payaa aungu-danyaka dàngu pinida taropitu.

¹⁵Nggubulu-na na rayatu Yahunda da-hawola hàla, nadu ba weli eti-madaka ba datuya nuna na pa-ràndingu. Nahàmu wànya na etida ba dalumu-nya i MIRI, tàka i MIRI-i duna na-orangu-ma pa-kataku-ha nyuda. Nawua-nja pa-mandapu mànjaku wàngu lai nu la tana ngabada.

¹⁶Na pangalangu-na i Hanganji Aha, na-pukalu-ma-aya i Maaka na àpuna welingu la mandapu-na ba Ina Ràmbuya, nadu i Maaka ba na-pandoi-dui kahala hada kajari ndumana i Ahera, na marapu kawini kamboka. Na kahala hada nuna nabera pakawe - weraku-ma-aya, hàla hi natunu-ya la Lolangu Kindurungu.

¹⁷Jiapa ka nda mbuu ndàbada da ngia pa-lumungu maràpu la tana lai nu da-pakaweraku-na i Aha, tàka nyuna daingu tuturu-mana duna lai MIRI lundu njàpuna na lurina.

¹⁸Nyuna i Aha na-bànjalu hàla-maha la Umana i MIRI ka manguna i MIRI-ha, mbuu ndàbada da banda àmahu marara mabara dàngu da malanja - malanja hawiangu pangala-da la pabera manguna na amana dàngu mangu wikina nyuna.

¹⁹Lupa la patailu kambulu lima wàna na ndaungu pareta-na i Aha nda pahili handàkangu-apa patumbu na pabera la tana nuna.