Read Kambera 2 LII NDAI 17 Bible Online

2 LII NDAI 17 - Kambera bible

2 LII NDAI 17

¹Hàla i Yuhapàtu-ka na hanganji Yahunda mahilu-ya i Aha na amana, dàngu nyuna na-pakapingatu wikina la palawa-nya na Ihirailu.

²Nyuna na-bànjalu-ha da tanatara-na la mbuu ndàbada da paraingu maningu tindingu la Yahunda, dàngu la hambeli paraingu Yahunda, hamanai la parai - paraingu da pambàda wàhina na amana la ngaba Epuraïmu.

³I MIRI na-pakanyuru-ya i Yuhapàtu nadu nyuna ba nakiku-nya na rukuna na amana; ba nda na-lumungu Mbaàlu,

⁴tàka ba jiaya i Ala duna na palumu-na. Nyuna na-patundu-manja da pareta-na i Ala, dàngu na lurina ba nda hama tuna da hanganji Ihirailu.

⁵I MIRI nawua-nya i Yuhapàtu mandapu undungu ba ngaha pa-hanganji Yahunda-ya. Nggubulu-na na rayatu dawua-nya pawotu - pawotu hi lupa nawulu wàngu dàngu hi nda uku tembi-nanya tau.

⁶Pa-runggatungu-mananya la pa-manundu-nya na pareta-na i MIRI dàngu hi na-pakaweraku-ha mbuu ndàbada da ngia pa-lumungu marapu hamanai da kahala hada Marapu Kawini Ahera la Yahunda.

⁷La ndaungu patailu wàna na pareta-na, na-paràha-nja da tau makata - katangu ma-bokulu la pa-papeka-nya na tau da uku - ukuna i MIRI la parai - paraingu Yahunda. Nyuda jia-duhaka: i Mbenihailu, i Ombanja, i Hakaria, i Netaneyilu dàngu i Mika.

⁸Da makaria-nja nyuda tau mahiwa-ha da tau Lewi dàngu hi tau madua-ha da ratu. Nuda da tau Lewi jia-duhaka i Hamaya, i Netanya, i Hambanja, i Ahaïlu, i Hemiramutu, i Yunatàngu, i Andunia, i Tombia dàngu i Tòpu-Andunia. Da ratu da madua jiaha i Elihama dàngu i Yoràmu.

⁹Dangàndi-ma Mbuku Ukuna i MIRI nàhu ba dalaku la nggi - nggi la mbuu ndàbada da paraingu Yahunda ba da-papeka-nya na rayatu lai nu.

¹⁰I MIRI na-paridu-ha mbuu ndàbada da pa-hanganji la winggiru-na na Yahunda hi da-mangàdatu pa-pabera la palawa-nya i Hanganji Yuhapàtu.

¹¹Welingu la tau Pilitingu nangala padangu àmahu bara dàngu pawotu - pawotu hawiangu, welingu la tau Arapu na-ngalangu 7.700 mbimbi dàngu 7.700 kamàmbi.

¹²Tuna nu i Yuhapàtu ba naparu - rukangu pa-kuaha. La nggubulu Yahunda na-pahadangu tindi - tindingu dàngu parai - paraingu ngia patuu bàlangu.

¹³Na-pakàha-nja da bàlangu da - dangu la parai - paraingu nuda. La Yeruhali na-bànjalu-ha da parawira da marihi dàkatu,

¹⁴nimbihu-da dàngu angu kanguhuru-mada tundunya na kalibaru-da. I Àtana jia-duyaka na liku uruna na kanguhuru welingu la kaliba - kalibaru la Yahunda. Da pairu ngàndina tau 300.000-ha da panjuri.

¹⁵Na tau na padua wàda jiaya i Yuhanàngu; nyuna na ma-kapala-nja da tau 280.000 panjuri.

¹⁶Na tau patailu wàda jiaya i Amahia anana i Hikiri; nyuna ma-kapala-nja da tau 200.000 panjuri. (I Amahia haàtu tau mawàngu eti wiki-nanya pa-paatangu wikina lai MIRI.)

¹⁷Na liku uruna na kanguhuru welingu la kaliba - kalibaru Mbanyamingu jia-duyaka i Eliyanda, mini pa-tarangu ma-dàkatu-ya. Nyuna na mairu ngàndiha da tau 200.000 panjuri màtu pana dàngu temingu-mada.

¹⁸Na tau padua wàda la kanguhuru yiana jiaya i Yuhambatu; nyuna na mairu ngàndiha da tau 180.000 panjuri màtu madàka-mada.

¹⁹Nyuda-duka da matunggu-nya la Yeruhali. Hinggilu-da nuda, na hanganji na-bànjalu-nja kanguhu - kanguhuru hawiangu la tindi - tindingu la ngaba Yahunda.