Read Kambera 2 LII NDAI 18 Bible Online

2 LII NDAI 18 - Kambera bible

2 LII NDAI 18

¹Ba nawulu-ka i Yuhapàtu hanganji Yahunda dàngu ba nawuwa-ka, palalei-nanyaka na haàtu na anana mini dàngu na haàtu na anana kawini i Ahàpu hanganji Ihirailu.

²Pa-làngangu-ka pira mbua ndaungu lua-nanyaka i Yuhapàtu pa-tadalu-ya i Ahàpu la paraingu Hamaria. Ka maraku wànya i Yuhapàtu dàngu karia-na, wulu-nanyaka remi i Ahàpu, hi na-paràhangu parupu padangu mbimbi dàngu hapi. La rehi nuna wànda-nanyaka i Yuhapàtu palua pa-kangaburu-ya na paraingu Ramutu la Nggiliatu.

³Na-paàrangu, “Màla mu-mbuhangu ka talua kariangu pa-kangaburu-ya la Ramutu?” wànanya. Nahema i Yuhapàtu, “Hàmu, ka ta-kariangu. Da tanatara-nggu nyungga napa ka da-pambulungu dàngu da tanatara-mu nyumu.

⁴Na nyuna nahàmu-pa ka ta-paàra pàkunya i MIRI,” wànanya.

⁵Ka pauhi-nanjaka i Ahàpu da wunangu ba tau patu ngahuha hi na-paàranja, “Pekuna nu ka kulua pa-kangaburu-ya la Ramutu napa hi ndia?” wàna. “Pekuna!” wàdanya. “I Ala napa nawua-manggaunya nuna na paraingu Tamu Umbu,” wàdanya.

⁶Tàka i Yuhapàtu nahili paàrangu, “Nda ningua nàhu yiahu hili haàtu wunangu na ma-ngalangu pa-paàra-nya i MIRI hurunda nyuta?” wàna.

⁷Nahema i Ahàpu, “Ninyapa na haàtu, i Mika anana i Yimula. Tàka nyuna ku-karaü-nya eti, nadu ba nda na-handàkangu-ma duna panyura ana hau mahàmu ngeranggu nyungga; manda hàmu mànu-ma-a,” wàna. “Ai ha, àmbu panii tumu nu naa!” hi wàna i Yuhapàtu.

⁸Ka paaungu-nanyaka i Ahàpu haàtu tau panggawi la uma hanganji hi na-paràha pare - rengganya palua papiti-ya i Mika.

⁹La rehi nuna i Ahàpu dàngu i Yuhapàtu wotu-danya ngaü pa-hanganji wàda, ba da-mandapu la kajàka hanganji la ngia pawari puruhu uhu nggàndumu la ngaru pindu bokulu Hamaria, nu ba talànga hurungu-da da wunangu la pa-patàka-nya na panyura-da.

¹⁰Na haàtu welingu la wunangu nuda, na ma-tamungu Hendikia anana i Kanaana, na-pandoi-ha da kadu bàhi, hàla hi napanii-nya i Ahàpu, “Yiana-yaka na puluna i MIRI, ‘Wànja da kadu yiada Tamu Umbu napa mubera-ya na Hiria dàngu hiu pa-làjaru-ya,’ wàna,” hi wàna.

¹¹Mbuu ndàbada da wunangu hawiangu dapajia hàlaya hi dapanii, “Ràkapu-ya la Ramutu, mu-ngalangu-ma dumu Tamu Umbu. I MIRI napa nawua-manggau patalu wàngu Tamu Umbu,” wàdanya.

¹²Ba talànga tunaka nu na papalewa na malua papiti-ya i Mika, napanii-nya i Mika, “Mbuu ndàbada da wunangu danyura hàla-manyaka patalu wàngu na hanganji. Màlai dumu nyumu ama kau nyuranya mahàmu hama tuna nyuda hawiangu,” wànanya.

¹³Nanapa-ya i Mika, “Parongu-na i MIRI na maluri, nyungga duku na papeka-nggu jiaya na papeka-na i Ala-a lai nyungga!” wàna.

¹⁴Ba natàka-ka i Mika la hanggana i Hanganji Ahàpu, paàra-nanyaka paraïna hanganji, “Pekuna nu nyungga dàngu i Hanganji Yuhapàtu ka malua pa-kangaburu-ya la Ramutu, màla ndia?” wànanya. “Kangaburu-ya nyuna!” wàna i Mika. “Mu-ngalangu-ma duna Tamu Umbu. Napa i MIRI nawua-nggau patalu wàngu Tamu Umbu,” wàna.

¹⁵Nahema i Ahàpu, “Nyumu bau panii dàngga nyungga, jàka lumuna na tamuna i MIRI-du, peka-yawa na ma-padeningu. Ku-pambirangu-mapa bàdi pa-panamu-nggau na rukuna nuna?” wànanya.

¹⁶Nanapa-ya i Mika, “Kuita-ya na tanatara Ihirailu ba na-paiha ngganggangu la pinu palindi - palindi. Nyuda beri hama tuna mbimbi na manda ningu ma-pawanja, tàka i MIRI napanii-ya na ngerada nyuda, ‘Da tau yiada nda ningu, ma-kapipi-ha; màtawa ka dabeli dàngu hàmungu,’ ” wàna.

¹⁷Hàla hi napanii i Ahàpu lai Yuhapàtu, “Màla nda nanjala wàngguka na paniinggu? Nda na-handàkangu-ma duna panyura-ngga mahàmu ngeranggu nyungga! Manda hàmu-mànu-maya!” wàna.

¹⁸Ka hili panii-nanyaka i Mika, “Nàhu patingi-nya jàka nggàra wàna i MIRI! Nyungga kuita-ya i MIRI ba na-mandapu la kanjàka hanganji-na la awangu, tàka mbuu ndàbada da papalewa-na ndolaku lihi-madanya.

¹⁹I MIRI na-paàrangu, ‘Nggamu nu ma-pamanda-nya i Ahàpu ka na-mbuhangu palua pa-pabera dàngu ka nameti la Ramutu la Nggiliatu?’ wàna. Na hemada da papalewa, nda da-pahama.

²⁰La malamiri ndàharungu-nanyaka na hau na wàndi. Nalua lihinya i MIRI hi napanii, ‘Nyungga na napa ma-pamanda-nya’ hi wàna. ‘Ka nggiki-naka nu?’ hi wàna i MIRI.

²¹Nahema na wàndi, ‘Napa nyungga ka kulua dàngu ka kutunja pa-kambàli-ku wàngu da wunangu danguna i Ahàpu,’ wàna. Nahema i MIRI, ‘Hàmu, laku-nyawa nuna, mu-ngalangu-du pa-pamanda-nya,’ ” wàna.

²²Na pangalangu-na napanii i Mika, “Nu, nuna-duyaka na manjadi! I MIRI na ma-pawiti-nja da wunangu-mu pa-kambàliku-nggau Tamu Umbu, i MIRI-maka na mambàda kawuku-nya la papali-nya na ura pàda lai nyumu Tamu Umbu!” wàna.

²³Ka ndàharungu-nanyaka i Wunangu Hendikia hi nalihi-nya i Mika hi natàba-ya na matana i Mika hi napanii, “Nggiki peku-naka na Ngahuna i MIRI ba nadunjaku-ngga nyungga tàka hi napanii dànggau nyumu?” wàna.

²⁴Nahema i Mika, “Napa kau itaya na mbutina la rehi tamamu pa-kapàndi la hau kurungu!” hi wànanya.

²⁵“Yàpaya nana!” wàna-madua-ka i Hanganji Ahàpu, “ngàndiya lai Amungu, na liku uru paraingu, dàngu lai Umbu kudu Yoàhu.

²⁶Paràha-nja ka da-patama-nya la uma kapàtangu, dàngu ka dawua-nya pangangu pa-ngunungu hawutu-a lupa kubeli dàngu hàmungu,” wàna.

²⁷Napaya i Mika, “Jàka mubeli dàngu hàmungu-maka Tamu Umbu, tandana ba nda ngarunggu nyungga-apa ngia papali-nanya na puluna i MIRI. Mbuu ndàbana na mamàtu lai yiahu nyudaka da hakahii,” wàna.

²⁸Tunaka nu i Ahàpu hanganji Ihirailu, dàngu i Yuhapàtu hanganji Yahunda laku-danyaka pabera-ya na paraingu Ramutu la Nggiliatu.

²⁹I Ahàpu napanii-nya i Yuhapàtu, “Nyungga pa-njàda-nggunya wikinggu ba nimbungga la pa-hànjalungu, tàka nyumu pàki biaha da paki hanganji-mu,” wàna. Tuna nu na hanganji Ihirailu ba na-panjàda wikina ba natama la pa-hànjalungu.

³⁰La rehina nuna da ngara liku-uru pamba kareta pabera Hiria nawua-manjaka pareta paraï hanganji-da ka da-kaporuku-niya na hanganji Ihirailu-ma-a.

³¹Jia, ba daita-yaka i Hanganji Yuhapàtu, ba dareki-ya làbu jia-yaka na hanganji Ihirailu wàda. Jia-duyaka hi dabahi-nya nyuna. Tàka i Yuhapàtu hi nawara, hàla ndula-nanyaka paraïna i MIRI Ala, hi nawihu-ya na ma-bahingu la hau pangiangu.

³²Ba dapi-nyaka paraï da ngara liku-uru pamba kareta pabera Hiria ba nda jiaya na hanganji Ihirailu, jia-duyaka hi da-jiaka-nya pabahi-nya.

³³Tàka hi jia wangu pàkunai duna na haàtu na panjuri Hiria na ma-pahàla-ya na ana panana dàngu nda wukuna pa-patuba-nya. Tàka nuna na ana pana nanggàna-ya i Ahàpu hi na-puhuku-ya na kalembi pabera-na la tuba pa-hàmburu-na. “Nanggàna-kaka,” wàna i Ahàpu ba nawara-nya na makata-nya na kareta-na, “Wihuya kau luhu ngàndika la hambeli ngia pa-pahànjalungu!” wàna.

³⁴Ba talànga tunaka nu hawuwatu-mananya na pa-hànjalungu, i Hanganji Ahàpu jiapa-maya na ndolaku-na ba na-panyuka la kareta-na ba nahangga-nya na tanatara Hiria. Ba natama-ka na lodu meti-nanyaka.