Read Kambera 2 LII NDAI 19 Bible Online

2 LII NDAI 19 - Kambera bible

2 LII NDAI 19

¹I Yuhapàtu hanganji Yahunda ba na nabeli dàngu hàmungu-ka la uma hanganji-na la Yeruhali,

²na haàtu na wunangu na ma-tamungu Yiahu anana i Hanani, mai-nanyaka pa-hurungu la hanganji. Napanii na wunangu lai nyuna, “Ràkana nu Tamu Umbu bau ndulaya na tau akatu dàngu bau ha-peparu la tau ma-paumbi-nya i MIRI? Ba tumu nu Tamu Umbu hàngga wàngu-nanyaka duna i MIRI lai nyumu Tamu Umbu.

³Na nyuna ba tuna ningu-madu mahàmu lai nyumu Tamu Umbu. Nadu bau tainggahu hàla-haka da kahala hadana na Marapu Kawini Ahera na pa-maraku-na na rayatu dàngu nyumu bau pamukarungu-ma la paluri tundu-nya na pambuha-na i Ala,” wàna.

⁴I Hanganji Yuhapàtu na ngia pa-ngiangu-na la Yeruhali-ya. Tàka nakàli tadalu-maya na rayatu la nggubulu tanana la pairu ngàndiha ka dabeli lai MIRI, na Alada da bokuda la mangilu-da.

⁵La nimbihu paraingu maningu kangelingu la Yahunda nawotu-nya hakimu,

⁶dàngu na-pakata-nja na pareta yiana, “Màtawa kai àrapu kanandingu-mi bai palaku wai ngabami, nadu bai patandangu ngera nda wàngu-minya tamu tau pinu tana-a tàka ba wàngu-minya tamuna i MIRI. Nyuna na ma-hamata-kai bai rata palakara.

⁷Màta kai mangàdatu-nya i MIRI, dàngu kai pananja-rungu bai pa-luangu lima, nadu i MIRI Ala ba na-karaü-nya eti na tau na ma-kaleka, na mambotu li hapapa dàngu na makei li hambeli,” wàna.

⁸La Yeruhali-mbu i Yuhapàtu nawotu-ha da hakimu welingu la kaloka tau Lewi, ratu - ratu dàngu da matuku - matuku la honga rayatu. Nyuda màta ka dabota palakara - palakara na ma-nggànangu ba panggaya na Ukuna i MIRI dàngu na palakara - palakara hawiangu.

⁹Da hakimu nuda i Yuhapàtu nawua-nja na pareta yiana, “Palaku-ya na wai ngerami dàngu manundu-mi lai MIRI. Tundu-manya na pareta-na la mbuu ndàbana na pa-paloku-mu.

¹⁰Era ningu angu ràmami welingu la hau paraingu ka da-patàka-nggai hau palakara pameti tau, pangga uku jàka ndia pangga kalaratu, màta kau paita-nja ànda nyuda. Ba timi nu jia hi nda danjala la hanggana i MIRI, dàngu i MIRI hi nda nahàngga-nggai nyimi hamanai nyudambu. Wàmanya na pareta yiana, jia napa hi ndai njala.

¹¹Ratu Bokulu Amària kuwua-nya kuaha mangia dita la mbuu ndàbada da palakara da ma-erangu la uku anggama. I Hambanja anana i Ihimailu, na nggumbunuru Yahunda, kuwua-nya kuaha mangia dita la mbuu ndàbada da palakara hawiangu. Da tau Lewi jia-haka ba la papida nyudaha la pamangga-nja ka pahàra-nja da botangu ma-timbangu. Tundu-manya yiana na panaungu dàngu kingatu pa-langatàkangu. Mili àru i MIRI ka na-karaha-ya na tau na mali la ma-deningu!” wàna.