Read Kambera 2 LII NDAI 20 Bible Online

2 LII NDAI 20 - Kambera bible

2 LII NDAI 20

¹Pi - pirana na rehi malamiri na tanatara Muapu dàngu Amungu, anguda da angu pakuhingu-da na tanatara Miaunimu, hi da-kangaburu-ya la Yahunda.

²Ka mai-nanyaka na tau na mangàndi-nya lii yiana lai Hanganji Yuhapàtu, “Dira danguya na tanatara Endumu na mamai welingu la hapapa Tehiku Meti panjungu-nggau Tamu Umbu. Mbàda wàhi-danyaka la Hahihungu-Tamàru,” wàna. (Hahihungu-Tamàru jiaya na tamu hauna la Eni-Nggendi.)

³I Yuhapàtu na-mangàdatu, ka hamayangu-nanyaka ba nakarai panaungu lai MIRI. Tunaka nu hi nawua-nya pareta mbuu ndàbana na rayatu ka na-puaha.

⁴Welingu la hau parai - hau paraingu la Yahunda lua-nanyaka na tau la Yeruhali la pakarai pa-ndulangu lai MIRI.

⁵Nyuda anguda dàngu da mangia-nya la Yeruhali pauhi-danyaka la talora bidi la Umana i MIRI. I Hanganji Yuhapàtu na-ndolaku la hanggada nyuda,

⁶hi na-hamayangu ba nawàngu pa-pakodungu, “Dou MIRI, Alada da boku la mangilu-ma! Nyumu Ala la awangu dàngu ma-pareta-ya mbuu ndàbana na banjaru la pinu tana. Nyumu ma-kuaha dàngu ma-àtalu; nda ningua haàtu mamàka palawa-nggau Nyumu.

⁷Nyumu-maka Alama nyuma. Ba jiaya na pa-maingu-na na banjaru-mu na Ihirailu la tana yiana, Nyumumaka mawàngga-ya na tau - tauka na mangiangu lai yiahu la rehina nu. Hàla Nyumu hi muwua-nya na tana yiana la wàlana i Ambarahàmu, na ariyaa-mu, ka datana mangunya lundu nu - nu.

⁸Nyuda ngiangu-danyaka lai yiahu dàngu hi dawulu Uma lumungu ba da-maraku-nggau Nyumu. Dapimanya

⁹jàka era nggàna-nanja hukungu rukuda da njalada, dàngu ba na-handauni-ha pabera, hidu pa-nggàbalungu, jàka ndia rimbangu, nyuda peku maida lai Nyumu dàngu hi da-ndolaku la hanggana na Uma lumungu yiana. La dalu handuka-da, pekuda nyuda pa-hamaya-nggau Nyumu, tàka Nyumu napa mu-patingi-nja dàngu hi mundula-ha.

¹⁰Nàhu da banjaru Amungu, Muapu dàngu Endumu kangaburu-da-nggamaka. Ba jiaya na pamaingu-da da boku la mangilu-ma welingu la Mehiru, Nyumu ndau pahia-anja pa-mandapu-nya na tanada nuda da banjaru. Hi lupa dali ningu la ànda pa-winjungu da boku la mangilu-ma dàngu nda da-palàjaru-aha da banjaru Amungu, Muapu dàngu Endumu.

¹¹Tàka nàhu, tuna yia-duka na-kingatungu-da da banjaru nuda lai nyuma. Nyuda da-mbuhangu pawàngga-kama welingu la tana na pawua-mu-nggama.

¹²Nyumu Alama-nggau! Huku-njawa nyuda, nadu nyuma yia ba nda mamàka pa-hanobaku-ya na tanatara dangu tungu nu, na ma-mbuhangu pa-kangaburu-kama. Nyuma nda mapinya jàka nggiki-amaka bàdi, jia-duyaka nu hi ma-hurungu lai Nyumu pakarai pa-ndulangu,” wàna.

¹³Ba tàlanga tunaka nu, mbuu ndàbada da mini Yahunda hamanai da papaha-da dàngu da anada ndolaku-madanya la Umana i MIRI.

¹⁴La hongada da tau dangu nuda ninya na haàtu na tau Lewi na ma-tamungu Yahahialu. Nyuna anana i Hakaria-ya welingu la kalibaru-na i Ahawàpu, la walaku dedina i Mbanaya, i Yeyilu, i Matanya. La rehi nuna i Yahahialu na-harua-ya Ngahuna i MIRI,

¹⁵hi napanii, “Tamu Umbu ma-pangarangu hamanai angu dedi mbuu ndàbami. I MIRI napanii-nggai ka àmbi mbota monungu dàngu àmbi mangàdatu-du pa-hanobaku-ya na tanatara dangu tungu nu. Nadu na ma-pakaburungu nda nyimia, i Alama duna.

¹⁶Haromu jàka daheika la ànda pakandekalu la Hihu, kangaburu-hawa. Napa mi-pahanobaku la hupu lolangu la hangga maràda telangu lihina la Yeruilu.

¹⁷Ndai jàra-a nyimi pa-kaburungu la pabera yiana. Lua bia la pangia pa-patunggungu-kai dàngu patiangu-ka lai nu. Napa kai itaya i MIRI ba nawua-nggai patalu wàngu. Ha dimi ma-mandapu-nya la Yahunda dàngu la Yeruhali, àmbi mangginggitu dàngu àmbi mangàdatu. Tama bianya na pa-kangaburungu, napa i MIRI nandula-kai!” wàna.

¹⁸Ka marubuku-nanyaka i Hanganji Yuhapàtu. Nggubulu-na na rayatu na-tundungu-mbu la pa-marubuku-nya i MIRI.

¹⁹Hàla da tau Lewi welingu la kalibaru Kehàtu dàngu Kora hadangu-danyaka ba da-hawola wotu-nya i MIRI, Ala Ihirailu.

²⁰Hadangu harii la mbaru hada rudungu, luhu-nanyaka na rayatu hi dalua la maràda telangu la lihina la Takua. Hadangu-wa ba wàdaka, i Yuhapàtu nawua-njapa panaungu, “Ha dimi rayatu Yahunda dàngu Yeruhali! Waiyawa i MIRI Alami, jia hi mimàka pa-pajàrungu. Kataku-hawa da panaungu-da da wunangu-mi, jiaya napa hi mi-ondungu!” wànanja.

²¹Ba nahàla-ka pa-pahama-danya na rayatu, na hanganji na-paràha-nja da kanguhuru maludu pawotu-ha da pakida da ma-pahama da pakàli pakida la mbabu ningu lii pa-ihikingu ba lumu pa-lumungu. Da kanguhuru maludu lupangu-ma da-pandalaru pa-hàmungu la hangga pamba tanatara ba dàngu lududa, “Wotunya i MIRI! Na mbuhangu-na lundu nuya nda ningu dirana!” wàda.

²²Ba da-pakiringu-ka pawara ba da ludu da kanguhuru maludu, i MIRI na-patumbu-ya na pariu raüngu la padua tanatara muhu ba talànga pa-kangaburu-da.

²³Da tanatara Amungu dàngu Muapu da-kangaburu-ya na tanatara Endumu lupa da-patàlaru ailulu-maya. Tunaka nu pa-belingu-danyaka dàngga anguda ba da-pakangaburu mbana eti.

²⁴Ba jia-yaka na tàkada da tanatara Yahunda la lewatu dai la maràda telangu dàngu ba dakuki-yaka na pangia-na na muhu, ita-danjaka da metida da muhu ba da-taneparu la tana. Nda hili ningu haàtu welingu la tanatara muhu maluri.

²⁵I Yuhapàtu dàngu da tau karia-na lua-danyaka pariba-nja da malanja muhu. Hunggu-danjaka ba dadangu da banda, dàngu ma - màtuka, da paki, dàngu da malanja pa-wilingu hawiangu. Ba dahàla-ka pa-pauhi-nja da malanja la dalu tailu mbua lodu, dangu biapa malanja hawiangu, hi lupa da-dunjaku leranja.

²⁶La lodu papatu wàna pauhi hàla-danyaka la Lola Ludu Wotungu hi dawotu-nya i MIRI, rukuda mbuu ndàbada da pa-patumbu-naka. Jia-duyaka na lolangu nuna “Ludu Wotungu” hi wàdanya.

²⁷Hàla i Yuhapàtu hi nairu ngàndi hàlaya na pamba pabeli la Yeruhali dàngu mbaha etida, nadu i MIRI ba natalu-yaka na muhuda.

²⁸Ba datàka-ka la paraingu pa-jurungu-danyaka la Umana i MIRI pa-kariangu jungga dàngu taropitu.

²⁹Mbuu ndàbada da nanggara hawiangu da-mangàdatu hàla ba darongu-yaka jàka nggikina i MIRI ba natalu-ha da muhu - muhuna na Ihirailu.

³⁰Jia-duyaka i Yuhapàtu hi na-mànjaku ba na-pareta, tàka i MIRI nawua-nya ma-manggawangu hi napeku hàla la nggubulu tanana.

³¹I Yuhapàtu ba na-hanganji la Yahunda tailu kambulu lima mbua ndau-naka na matua-na, ba na-pareta la Yeruhali dua kambulu lima mbua ndauna mandaina. Na inana jiaya i Ahumba anana i Hilihi.

³²Hama tuna i Aha na amana, i Yuhapàtu nahàmu na pa-palaku-na la hangga matana i MIRI.

³³Na nyuna da pangia ngia palumu-nja da marapu nda na-palàjaru-aha. Na rayatu ndedi na-mbulungu-mapa na etina la palumu-nya na Alada da boku la mangilu-da.

³⁴Na lii kaloka hawiangu rukuna i Yuhapàtu, welingu la kawunga-na lundu njàpuna na pareta-na, ni-manjaka da pa-tulihu-na la Lii Ndai rukuna i Yiahu anana i Hanani da maninja la Mbuku Lii Ndai da ngara Hanganji Ihirailu.

³⁵Tuna handàka i Yuhapàtu hanganji Yahunda na-paariyaa dànya i Ahahia hanganji Ihirailu, na madangu akatu pawunda-na.

³⁶La ngia pa-palabungu Ehiungu-Nggembiru da-pandoi-ha da kapalu ka pa-lirungu la Tàrihu.

³⁷Tàka i Wunangu Eliyehiru anana i Ndondawa welingu la paraingu Mareha, napeka hahanya i Yuhapàtu, “Bau patumbu-yaka na pa-nuangu la pa-paariyaa dànya i Ahahia, i MIRI napa pa-làjaru-nanyaka na paràma-mu Tamu Umbu,” wànanya. Ka làjaru-danyaka da kapalu da pambàda pandoi-na hi lupa nda ana peku pa-lirungu-madapa.