Read Kambera 2 LII NDAI 22 Bible Online

2 LII NDAI 22 - Kambera bible

2 LII NDAI 22

¹Handàka ba jiaya na pa-kangaburu-da da tau Arapu ba hau pauli-da, mbuu ndàbada da anana i Yahoràmu da-pameti mbuta-ma-aha, didi-kiaya i Ahahia na ana kamuri-na na mapeka. Jia-duyaka da mangia-nya la Yeruhali hi dawotu-ya i Ahahia la pa-hanganji mahilu-ya na amana.

²I Ahahia ba na-hanganji dua kambulu dàmbu ndau-naka na matua-na,[11] dàngu ba na-pareta la Yeruhali hau ndau-ana. Na lurina i Ahahia hama-mana na luri kuru umana i Hanganji Ahàpu, nadu i Atàluya na inana ba na-papeka-dunya la palaku-nya na maakatu. I Atàluya anana i Hanganji Ahàpuya, umbuku-na i Omuri hanganji Ihirailu.

⁴I Ahahia nanjala la hanggana i MIRI hama tuda da kuru umana i Ahapu, nadu ba nyudadu da matanggu panaunya ba taliu metina na amana. Nyuda nu da matanggu panaunya da ma-pamanjura-nya.

⁵Ruku panaungu-da nyuda, pa-mbulungu-danyaka dàngu i Yoràmu hanganji Ihirailu la pa-pabera lawanya i Hahailu, hanganji Hiria. Da-pa-kangaburu la Ramutu, tana Nggiliatu. I Yoràmu na-manua la pa-kangaburungu,

⁶ka beli-nanyaka la paraingu Yihireyilu la patungu muru, tàka i Ahahia hi nalua patadalu-ya lai nu.

⁷Mbàda kawuku-mana-nya paraïna i Ala ba jia-yaka na panjàpu wàna i Ahahia ba nalua pa-tadalu-ya i Yoràmu. La rehi pa-tadalu nuna i Ahahia dàngu i Yoràmu na-ndubaku-ha paraï haàtu mini na ma-tamungu i Yiahu anana i Nimihi, na pambàda pindina i MIRI la pa-patàlaru-ha da ihi kuru umana i Ahàpu.

⁸Ba talànga palaku-nanya paraïna i Yiahu na hukungu welingu lai MIRI la kuru uma nuna, hàmburu-nahaka ba ha-pajuru-da da ma-pangora la Yahunda dàngu da ana anguna paluhu i Ahahia da ma-tundungu la pa-tadalu. Ka pameti-nahaka mbuu ndàbada paraïna i Yiahu.

⁹Hàlaka nu pa-ràhangu-nanyaka tau pahimbu-ya i Ahahia na ma-kawiningu la Hamaria la rehi nu. Ba hunggu-yaka i Ahahia lua ngàndi-danyaka lai Yiahu hi pameti-ya. Na nyuna ba tuna jiangu-ma ba datani-nya nadu ba datembi-ya i Hanganji Yuhapàtu, bokuna na ma-paata wikina wàngu weli etina lai MIRI. Welingu la kuru umana i Ahahia nda ningu maràka mahilu-ya nyuna la pa-hanganji.

¹⁰Ba napi-nyaka metina i Ahahia na anana paraïna i Atàluya, wuangu-nanyaka pareta ka pameti-ha mbuu ndàbada da wàla maràmba la Yahunda.

¹¹I Ahahia ninya na haàtu na anawini-na na ma-tamungu Yuhemba na ma-mangoma la haàtu ratu na ma-tamungu Yuyanda. I Yuhemba nalua kangunguhu papiti-ya na haàtu na anana mini i Ahahia, na ma-tamungu Yoàhu welingu la honga ana maràmba da pa-pameti ba wàna i Atàluya. Nuna na anakeda dàngu na ma-kabida-nya na-kawini-nja la hau kurungu la Umana i MIRI. Tuna nuduka i Yuhemba ba na-pamara-ya nuna na anakeda hi nda na-pameti-ya paraïna Atàluya.

¹²Nomu mbua ndaungu mandaina ba wininya i Yoàhu la Umana i MIRI, nu ba talànga pareta-na i Atàluya ba Hanganji Kawini-ya.