Read Kambera 2 LII NDAI 23 Bible Online

2 LII NDAI 23 - Kambera bible

2 LII NDAI 23

¹La ndaungu papihu wàna bota-nanyaka paraïna i Ratu Yuyanda la pa-paluangu lima. Na-pahama dànja da parawira tau malima nu, i Aharia, anana i Yerohàmu, i Ihimailu anana i Yuhanàngu, i Aharia anana i Ombitu, i Maaheya anana i Andaya, dàngu i Elihapàtu anana i Hikiri.

²Nyuda dalua la mbuu ndàbada da paraingu la Yahunda, hi da-pauhi-nya na tau Lewi dàngu mbuu ndàbada da ma-pangora - pangora, hi da-karia-nja la Yeruhali.

³Nyuda da-pauhi la Uma Ala, hi datura pa-ràndingu dàngu i Yoàhu na ana hanganji. Natungu liina i Yuyanda lai nyuda, “Yianayaka na anana na ma-taluru-nda i Hanganji Ahahia! Nàhu lupangu nyuna-maka bàdi ma-mandapu la kanjàka pareta, nadu i MIRI ba mbàda ràndi-mana-nyaka, da wàlana i Hanganji Ndautu da ma-padaingu la pa-pareta.

⁴Tuna yiaka bàdi na pawànda: Jàka da-panjàpu-yaka na pa-paloku-da la lodu Hangahu da ratu dàngu da tau Lewi, àmbu da-beli kàdi. Na ha-kawàri welingu la tailu kawàri màta ka da-kikungu-mbu padai la pindu boku - pindu bokulu la Umana i MIRI,

⁵da-hakawàri welingu la patailu wàda ka dadai la uma hanganji, da marihi màta ka dadai la Pindu Bokulu Latana. Nggubulu-na na rayatu màta ka na-pauhi lua la talora Umana i MIRI.

⁶Àmbu jia ningudu haàtu matama la Umana i MIRI, hinggilu-da da ngara ratu dàngu da tau Lewi da ma-tàlanga paloku. Nyuda pekuna ba datama, nadu nyuda ba pa-kahaungu-mahaka ndumana i MIRI. Na tau hawiangu lupangu-ma ka na-manundu la kalaratu-na i MIRI ka engada la hambeli.

⁷Da tau Lewi lupangu-ma da-ndolaku winggiru-nya na hanganji dàngu hapanda pa-binjiru, ka damangga-nya la nggi na-hanggangu ningu. Nggamuya na ma-paruhukungu patama la Umana i MIRI, lupangu pameti-maya bàdi,” wàna.

⁸Nuna na pareta-na i Yuyanda danunju-maya paraï da tau Lewi dàngu da rayatu Yahunda. Da tau da mahàla pa-paloku la lodu Hangahu nda pa-pahiangu-aha pabeli. Jia ba tuna da ngara parawira hi peku pamàtu hàladanya na tau na mahàla pa-paloku hamanai na tau na mabidi tàka la pa-paloku.

⁹La ngara parawira i Yuyanda na-paberi-nja nimbu dàngu temingu manguna i Hanganji Ndautu da pa-pàhamu la Umana i MIRI.

¹⁰I Yuyanda na-bànjalu-mbuha da tau maningu hapanda pa-binjiru weli winggiru-nya lua na hanamba Umana i MIRI ka kahiri-ya na hanganji.

¹¹Hàlaka patuna nu i Yuyanda nakaria-nya i Yoàhu paluhu, hi natuya na tubuku hanganji la katiku-na, dàngu hi na-pakata-nya na Mbuku Ukuna i Ala. Tuna nu i Yoàhu ba wotuya la pa-hanganji. Tunaka nu i Ratu Yuyanda dàngu da anana hi daburi-nya mina lii pa-katua wàngu la katiku-na i Yoàhu, hàla na tau dangu hi na-warangu, “Naluri na hanganji!” wàda.

¹²I Atàluya narongu-ya na rayatu ba na-kayaka ba danggepi-ya na hanganji. Ka pare - renggangu-nanyaka palua la Umana i MIRI ngia pa-langgungguru-na na tau dangu.

¹³Naita-ya na hanganji bidi ba na-ndolaku la ngaru pindu tama la Umana i MIRI, la ngia pa-katua-danya, ba winggiru-danya-padua-ka paraï da parawira dàngu da mapini taropitu. Nggubulu-na na rayatu da-kayaka mbaha eti ba dàngu palingu-danja da taropitu, màlai da ngara mapingu pa-katangu malingu pambabu wàngu ba da-panggongga-ya na remi wàngu malingu hangia - hangia. Ba dàngu hawina-na i Atàluya naba - bàriku-ha da pakina hi nawara, “Katadaku! Katadaku!” wàna.

¹⁴I Yuyanda nda na-pahiangu-a pa-pameti-ya i Atàluya la winggiru-na na Umana i MIRI, jia-duya hi napanii-nja da parawira, “Ngàndiya hu lua la hambeli, palinya la pamba tau manggangu, dàngu pameti biaya jàka nggamu na ma-pakakangu pa-pamara-ya,” wàna.

¹⁵Ka yàpa-danyaka hi dangàndi-ya la uma hanganji. Hi da-pameti-ya la Pindu Bokulu Njara.

¹⁶I Ratu Yuyanda nawànda-ya i Hanganji Yoàhu dàngu na rayatu la pawunda-ya na pa-ràndingu, nyuda ba banjaru-na i MIRI-haka.

¹⁷Hàlaka nu nyuda mbuu ndàbada da-tanyumbalu pa-panjoru-ya na uma Mbaàlu; da ngia pawotu maraku dàngu da kahala hadana da-palàjaru-ha, tàka i Matàngu, na ratu Mbaàlu da-pameti-ya la hanggada da ngia pawotu maraku.

¹⁸Hàla i Yuyanda na-patanggu-nja da ngara ratu dàngu tau Lewi la pa-paloku-ha da paràma la Umana i MIRI da pambàda pangera-na i Hanganji Ndautu. Lupangu-ma nyuda ka dawotu kameti maraku patunu lai MIRI — pa-jàngapu-nja da ukuna i Muha — dàngu na ngera mbabu dàngu da ludu da pambàda kawuku-na i Ndautu.

¹⁹La pindu - pindu bokulu la Umana i MIRI, na-bànjalu-nja tau madai paraïna i Yuyanda la pamangga-nya na tau manda ràkana palumu-nya i MIRI ka àmbu natama.

²⁰Da ngara parawira, da ngara matuku la rayatu, da ngara ma-katangu pareta, dàngu nggubulu-na na rayatu datundu hàlanya i Yuyanda ba da-pajuru karia-nya i Hanganji Yoàhu welingu la Umana i MIRI la uma hanganji. Nyuda datama li la Pindu Bokulu Baina hàla mandapu-nanyaka na hanganji la kanjàka hanganji.

²¹Nggubulu-na na rayatu na-nggaüru hàla, na-mànjaku na paraingu, tàka i Atàluya pa-pameti-yaka.