Read Kambera 2 LII NDAI 24 Bible Online

2 LII NDAI 24 - Kambera bible

2 LII NDAI 24

¹I Yoàhu pihu mbua ndau-naka na matua-na ba na hanganji la Yahunda, dàngu na-pareta patu kambulu ndauna la Yeruhali. Na inana Hipuya-ya na tamuna welingu la paraingu Mbiruhemba.

²La dalu luri-napa i Ratu Yuyanda, i Yoàhu nawunda-mapa mahàmu la paita-na i MIRI.’

³I Yuyanda napiti-nya kawini tau madua papaha-na i Yoàhu, hi nangala-nja da anana mini kawini.

⁴Ba na-pareta-ka pi - pirana na rehi, bota-nanyaka i Yoàhu la pa-pahàmu-ya na Umana i MIRI.

⁵Da ngara ratu dàngu tau Lewi nawua-nja pareta palua la hau parai - hau paraingu la tana Yahunda la pakarai-ya hunggu na rayatu nggubulu-na ka pahàmu wànya na Umana i MIRI nimbihu ndaungu. Na-paràha-nja ka da-parenggangu palaku-nya nuna na wai ngerada, tàka nyuda da tau Lewi nda dalu tanggidangu.

⁶Jia-duyaka i Yoàhu hi napaau-nya i Ratu Yuyanda, na liku-uruda, hi napanii, “Màla i Muha atana i MIRI nda na-paràha-anya na tau la pawotu-hungguda ka paloku wànya na Maüna i MIRI? Nàhu nggiki-naika da tau Lewi hi ndau pambana-ha ka da-pauhingu hunggu la rayatu la Yahunda dàngu la Yeruhali?” wànanya. (

⁷Da tau makiku-nya i Atàluya, na kawini akatu, da-paruha-yaka na Umana i MIRI, dàngu dadangu-mbu da malanja da pa-kahaungu-ya i MIRI-a duna làti dawà-mbunjaka ba dalumu wànya i Mbaàlu.)

⁸Na hanganji nawua-nja pareta da tau Lewi ka da-pandoi hau ana pàti àmahu dàngu ka bànjalu-ya lua la hangga pindu bokulu Umana i MIRI.

⁹La nggubulu Yeruhali dàngu Yahunda pa-pakada-nya mbuu ndàbana na tau lupangu-ma ka nangàndi hungguna lai MIRI, hama tuna na pambàda pangera-na i Muha.

¹⁰Nuna na pa-pakadangu nahàmu wànya na etina na rayatu dàngu da ma-pangora - pangora. Da-langgungguru hàla na madangu pawotu-ha da hungguda hi datuha daa la ana pàti.

¹¹Nimbihu lodu na ana pàti nuna dangàndi-ya paraï tau Lewi la panggawi hanganji ka pareha-ya. Jàka nambinu-ka na ana pàti na hakaratarihu nanggara dàngu na wakilu Ratu Bokulu da-paluhu-ha da àmahu hi pabeli-nya na pàti la pangia-na. Tuna nu mànuma na pawàda nimbihu lodu dàngu kanjupu danguha da àmahu pa-pauhingu.

¹²Tunaka nu na hanganji dàngu i Yuyanda hi da-pakata-nja da àmahu nuda la tau da mauli-nya na paràma ba pahàmu-ya na Umana i MIRI. Hàla hi dahewa tukangu watu, tukangu ai dàngu maràma bàhi ka daràma-ya na paràma.

¹³Ka pakiringu-danyaka da tukangu pa-pahàmu-ya na Umana i MIRI. Nyuda mbuu ndàbada daràma pa-hàmungu, hi lupa na-kapingatu dàngu na-manandangu beli hama tuna la kawunga-na nuna na Uma.

¹⁴Ba nanjàpu-ka nuna na paràma, da àmahu marara mabara marihi da-pakata belinja la hanganji dàngu lai Yuyanda. Hàla da àmahu nuda hi dapaki-ha pa-pandoi pa-paloku wàngu la Umana i MIRI hama tuna: ndumana ba lumungu, kameti maraku patunu, da kawinga dupa dàngu da moku. Ba naluri-pa i Ratu Yuyanda, na pa-ndutungu hàmu-mapa nawotu kameti maraku patunu la Umana i MIRI.

¹⁵I Yuyanda na-malundungu na lurina, ba nameti natoma-maka 130 ndaungu.

¹⁶Nyuna pa-taningu-ya la reti maràmba la Paraingu-na i Ndautu, ba da-wàrihu-ha da ruku hàmuna lai Ala, la Umana i MIRI dàngu la banjaru Ihirailu.

¹⁷Ba nameti-ka i Yuyanda, iru ngàndi-danyaka paraï da ma-pangora - pangora la Yahunda i Yoàhu, hi lupa nda nahili wàrihu-ahapa da lii pa-pekangu na i Yuyanda.

¹⁸Na rayatu nda na-lumungu ningu-apa la Umana i MIRI, Alada da boku la mangilu-da, tàka lumungu-danyaka marapu dàngu da kahala hadana i Ahera na marapu kawini. Na nja-lada nyuda jia-yaka na ma-pawiti-nya na hànggana i MIRI la Yahunda dàngu la Yeruhali.

¹⁹I MIRI na-palewa-ha da wunangu la patenda-nja ka peku belida lai MIRI, tàka na rayatu nda nabihu-apa pa-patingingu.

²⁰Ka harua-nanyaka paraï Ngahuna i Ala i Hakaria anana i Ratu Yuyanda. Ka ndàharungu-nanyaka la hangga rayatu i Hakaria, hi nawara, “Napanii i MIRI Ala, ‘Nggikina hi nda mi-manundu la pareta - pareta-nggu dàngu hi mi-kabaingu wikimi. Nyimi ndai wàrihu-akapa, ka Nyunggai duku nda ku-wàrihu-akai-pa!’ wàna,” wànanja.

²¹Ka pahama kangunduhu-nanyaka na rayatu la papa-panya i Hakaria, i Hanganji Yoàhu natu-ndungumbu la pahama kangunduhungu. Nyuna nda na-pangàda-anjapa da ruku hàmuna dàngu na tuturu-na i Yuyanda, amana i Hakaria. Nyunama na hanganji na ma-wuangu pareta la pa-nàhaku pameti wànya watu i Hakaria la hanamba Umana i MIRI. Meti ba wànaka i Hakaria, wara-nanyaka, “Mili àru i MIRI ka naita-ya na rukumu yiana dàngu ka na-papapa-ya!” wàna.

²³La ndaungu nunama, ba na-panjilungu na rehi diha ndaungu, na tanatara Hiria kangaburu-danyaka la Yahunda dàngu Yeruhali. Da-pameti hàlaha da ma-pangora dàngu hi da-palaü-nja da malanja da - dangu paramba-da dangàndi-ha la Ndamàhiku.

²⁴Da tanatara Hiria hawutu-ada, ba tuna i MIRI na-pahia-ma-anja patalu-ha da tanatara Yahunda da marihi dangu, nadu da tau Yahunda ba nda da-wàrihu-ya i MIRI Alada da boku la mangilu-da. Tuna nu i MIRI ba nahuku-nya i Hanganji Yoàhu.

²⁵I Yoàhu na-hanggàri na manua-na. Ba nalaku-ka na tanatara muhu, tau madua-ha da panggawi-na da ma-pahama kangunduhungu. Da-pameti-ma-aya la ngia pa-katuda-na ba jia-yaka na pa-palimba wànya ba na-pameti-ya na anana i Ratu Yuyanda. I Hanganji Yoàhu datani-manyai nyuna la Paraingu-na i Ndautu na nyuna nda la reti maràmba-aya. (

²⁶Da tau da ma-pahama kangunduhungu la palawa-nya nyuna jiaha i Njambatu anana i Himiatu kawini Amungu, dàngu i Yuhambàtu anana i Himiritu kawini Muapu.)

²⁷Na lii kaloka rukuda da anana i Yoàhu na rukuda da panyura da manda hàmu la ngerana nyuna, dàngu nggiki hamana ba na-pahàmu-ya na Umana i MIRI mbuu ndàbada nuda pa-tulihu-mahaka la mbuku lii Kaloka-na na Mbuku Ngara Hanganji. I Amahia anana i Yoàhu, jiaya na manjadi hanganji hiluya na amana.