Read Kambera 2 LII NDAI 27 Bible Online

2 LII NDAI 27 - Kambera bible

2 LII NDAI 27

¹I Yotàmu ba na-hanganji dua kambulu lima mbua ndau-naka na ndau lurina, dàngu nyuna na-pareta la Yeruhali hakambulu nomu mbua ndauna. Na inana jiaya Yeruha anana i Handuku.

²I Yotàmu naliya na etina i MIRI, hama tuna i Uhia na amana. Jia-aya ba nda natunu dupa[12] la Umana i MIRI, hama tuna na pawàna na amana. Jiapa-kadu ka tuna nu na rayatu jiapa-mayapa ba natu manjala.

³I Yotàmu-maka na ma-pahada-nya na Pindu Bokulu Mbara Dia la Umana i MIRI, dàngu na-pa-kapingatu-ya na kangeli la Yeruhali la ngabana la Opilu ba wàdanya.

⁴Nyuna na-pahadangu parai - paraingu la ma-palindingu la Yahunda dàngu tindi - tindingu hamanai lewa - lewatu la omangu.

⁵Nyuna nabera-ya dàngu natalu-ya na hanganji Amungu pa-kariangu tanatara-na, hàla na-pambana-ya na tau Amungu pawotu hilu katiku. Nimbihu ndaungu la dalu tailu mbua ndaungu ma-pandutungu dawotu-ma bàdi 3.400 kilu àmahu bara, dàngu dua ngia ngara uhu nggàndumu, 1.000 tòngu nimbihu-da.

⁶Parukangu-nanyaka pa-kuaha i Yotàmu nadu ba na-tuturu dàngu ba na-manundu lai MIRI Alana.

⁷Hawiangu da-matumbu-ka la dalu pareta-na i Yotàmu, da pabera, da màhina, mbuu ndàbada ni-manjaka da pa-tulihu daa la Mbuku Lii Ndai Ngara Hanganji Ihirailu dàngu Yahunda.

⁸I Yotàmu na ndau lurina dua kambulu lima mbua ndau-naka ba na-hanganji, dàngu ba na-pareta la Yeruhali hakambulu nomu mbua ndaungu mandaina.

⁹Nyuna ba nameti hi taninya la Paraingu-na i Ndautu, tàka i Ahàhu anana jia-yaka na ma-hanganji hiluya nyuna.