Read Kambera 2 LII NDAI 28 Bible Online

2 LII NDAI 28 - Kambera bible

2 LII NDAI 28

¹I Ahàhu ba na-hanganji dua kambulu ndau-naka na ndau lurina, dàngu na-pareta la Yeruhali hakambulu nomu mbua ndauna mandaina. Nyuna nda natundu-anya na hurina na mahàmu i Hanganji Ndautu, na boku la mangilu-na, tàka nawunda-ya na panda hàmu wàna na etina i MIRI.

²Na lurina hama tu-ma-ana da hanganji Ihirailu dàngu na-paràhangu tau pa-pandoi kahala hada - kahala hada Mbaàlu welingu la palala,

³hi datunu dupa la Lolangu Hinumu. Jiapa na ana wikina na-maraku wà-mbunya ba natuya kameti maraku la marapu, tundunya na pakàli wàna na tauka na pambàda wànggana i MIRI welingu la tana Kanaàngu ba jiaya na tamana na tau Ihirailu la tana nuna.

⁴I Ahàhu nawotu kameti maraku dàngu natunu dupa la ngia pa-lumungu marapu la palindi - palindi dàngu la lumbu ai - lumbu ai ma-marumbingu.

⁵Ba nanjala-ka i Hanganji Ahàhu, i MIRI Alana napuli-ma-anyaka patalu-ya paraï hanganji Hiria na mangàndi-mbuha ba hau danguna na tau Yahunda pa-tanawangu la Ndamàhiku. I MIRI na-pahia-mbunya la patalu-ya paraïna i Hanganji Peka anana i Remalia welingu la Ihirailu, la dalu hau lodu jua-a na ma-pameti-ha da tau 120.000-da da panjuri Yahunda da ma-kabora - kaborangu. I MIRI, Alada da boku la mangilu-da napuli-ma-anya mbuu ndàbana na matuna nu, nadu na rayatu Yahunda ba nda dahili wàrihu-aya i MIRI.

⁷Na anana i Ahàhu, na ma-tamungu Maaheya, na-pameti-ya paraïna i Hikiri, haàtu parawira Ihirailu. Nyunambu na ma-pameti-ya i Àharikàmu na matanggu paloku la uma hanganji dàngu i Elikana na lima kawana-na na hanganji.

⁸Jiapa-kai ka anguda pa-banjaru Ihirailu-ha da tau Yahunda, ba tuna da tanatara Ihirailu da-tanawa-manja ba tau 200.000-ya na kawini dàngu da ana-keda Yahunda, hi da-palaü-nja la Hamaria pa-kariangu ba dira danguha da malanja pawàhi-da.

⁹Na haàtu wunangu-na i MIRI, ma-tamungu Onditu, na-ngiangu la paraingu Hamaria. Ba dabeli-ka da tanatara Ihirailu ba dangàndi tanawangu welingu la Yahunda, i Onditu nalua patàbuku-ha ba datama la paraingu. Napanii, “Nyimi mitalu-haka da tau Yahunda, nadu i MIRI Alada da boku la mangilu-mi ba hàngga-nanja. Na nyuna i MIRI narongu-ma duna jàka nggikina na mbàringu-mi bai pameti-ha da tanatara Yahunda.

¹⁰Tàka nàhu da tau Yeruhali dàngu Yahunda màta ka tatuha atanda wàmika! Ndai pi-anya dimi nyimi ba mbàda njala-mbumi nyimi lai MIRI Alami?

¹¹Rongu! Da ngara tanawangu yiada angu dedi-minja. Jia ba tuna, puli bia-njawa nu ka dabeli. Jàka ndia, napa nahàngga-nggai i MIRI dàngu hi nahuku-nggai nyimi,” wànanja.

¹²Da matuku ba tau mapatu-ha la Ihirailu, nu i Aharia anana i Yuhanàmu, i Mberikia anana i Mehilemutu, i Yehikia anana i Halumu, dàngu i Amaha anana i Hàtalai, nda daora-manyai duda nuna na-paluangu-da lima da tanatara da mabeli.

¹³Dapanii nyuda, “Àmbi ngàndi-duha nada da tanawangu lai yiahu! Mbàda njala-ndaka nyuta hanggangu lai MIRI, tàka da njalanda nuda jiaka-maka bokulu-da ràka pahuku wànanda. Nàhu nyimi hili tu-minyai hau na mabonja-ya na panjala wànda,” wàdanja.

¹⁴Nuda da panjuri pakata-danjaka la rayatu hamanai la ma-pairungu-daka nu da ngara tanawangu dàngu da malanja - malanja pawàhi-da.

¹⁵Hàla nuda da matuku tau mapatu hadangu-danyaka la pa-paloku-ha da ma-tanawangu. Da-paberi-nja paki dàngu malanja pawàhi nuda da tanawangu da ma-kalana-nja. Dawua-mbunja halapa, pangangu dàngu pa-ngunungu. Da ngara tanawangu da ma-manua datunja muruda mina haitungu. Da tau da malalu mangonangu da manda màka palaku dawotu-ha la kalandai, hàla mbuu ndàbada hi da-karia-nja la Yeriku, na paraingu madangu pingi kuruma-na, ka peku belida duda la kuru kotaku-da la Yahunda. Hàlaka nu beli-danyaka duda da tau Ihirailu la Hamaria.

¹⁶Da tau Endumu hili pa-kiringu-danyai pa-kangaburu-ya la Yahunda dàngu hi da-tanawa padangu tau. Jia-duyaka i Hanganji Ahàhu hi nakarai-ya i Tinggulàtu-Pilehiru, hanganji Ahuru, ka na-pangàndingu pa-ndulangu.

¹⁸La rehi nunambu da tau Pilitingu talànga kangaburu-danja da paraingu la ngaba kambu palindi la patama lodu, dàngu la ngaba mbara luru Yahunda. Da-wàhiha da paraingu Mbetu-Hemihu, Ayalungu dàngu Ngganderutu, hamanai da paraingu Hoku, Timuna, dàngu Nggòmuhu lupa da ndeha la winggiru-da nuda da tailu mbua paraingu, hàla hi da-paengangu lai nu.

¹⁹Rukuna ba na-dunjaku-nya i MIRI nyuna i Ahàhu hanganji Yahunda dàngu ba nda na-pareta-ya na rayatu-na hama tuna na pawàngu-ma duna làti, ka patàka-duna-nyaka na handuka la Yahunda paraïna i MIRI.

²⁰Na Hanganji Ahuru nda mainanya pandula-aya i Ahàhu, tàka maina la pa-handuka-ya.

²¹Jia-duyaka i Ahàhu hi hi napiti leranja da àmahu rara welingu la Umana i MIRI, welingu la uma hanganji, dàngu welingu la uma - umada da liku uru rayatu, hi na-pakata-nya na hanganji Ahuru. Tàka nuda nda ningumbu linguda.

²²La rehi handuka mbana tungu nu, i Ahàhu hili manaü njala-ma-ana hanggangu lai MIRI.

²³Na pa-hanggàmaru wikina dàngu na rayatu-na nadu ba nawotu-nja kameti maraku da marapu-da da tau Hiria da mambàda panyàku-ha. Na pa-kanandi-na, “Da marapu-na na tau Hiria dandula-haka da hanganji Hiria, ba tuna jàka kuwotu-nja kameti maraku talànga wanguna napa dandula-maka duku,” wàna.

²⁴Tunaka nu piti-nanjaka mbuu ndàbada da paihi wàngu la Umana i MIRI hi na-palàjaru-ha. Hàla bita-nanyaka na Umana i MIRI, dàngu hi na-pahada-nja da ngia pawotu maraku la nggubulu Yeruhali.

²⁵La nimbihu paraingu dàngu ndeha la Yahunda na-pahadangu ngia pa-lumungu la marapu, ngia patunu dupa ndumada da marapu banjaru hawiangu. Nu ba tuna wuda-duna-nyaka na hànggana i MIRI, Alada da boku la mangilu-na lai nyuna.

²⁶Hawiangu da rukuna nyuna dàngu na ruku pareta-na dàngu mbuu ndàbada da pawunda-naka welingu la pakiri-na lundu njàpuna pa-tulihu-haka la Mbuku Lii Ndai Hanganji Yahunda dàngu Ihirailu.

²⁷Ka meti-nanyaka i Ahàhu, hi taninya la Yeruhali, na nyuna nda patani ni-anya la reti maràmba. I Hihikia anana jia-yaka na mahilu-ya la pa-hanganji.