Read Kambera 2 LII NDAI 29 Bible Online

2 LII NDAI 29 - Kambera bible

2 LII NDAI 29

¹I Hihikia ba na-hanganji la Yahunda na ndau lurina dua kambulu lima-naka, tàka ba na-pareta la Yeruhali dua kambulu hiwa mbua ndaungu mandaina. Na inana jiaya i Ambia anana i Hakaria.

²I Hihikia nahàmu na pa-palaku-na hi nahàmu wànya na etina i MIRI, natundu-nya na hurina i Ndautu na boku la mangilu-na.

³La wulangu hau la ndaungu kawunga pareta-na, i Hihikia na-bunggahu-ha da pindu - pinduna na Umana i MIRI hi na-paràhangu tau pa-pahàmu-ya.

⁴Da ratu - ratu dàngu da tau Lewi na-paràha-nja pa-pauhi la talora la ngaba pahunga lodu Umana i MIRI,

⁵dàngu hi na-pabanjaru dànja lai nu, “Nyimi, tau Lewi, màta kai hekangu wikimi ndumana i MIRI, dàngu kai payaha-nya na Umana i MIRI, Alada da boku la mangilu-mi. Mbuu ndàbana na ma-pairaku-ya na Uma nuna payila-nja.

⁶Da boku la mangilu-nda nda da-tuturu lai MIRI Alanda dàngu datuya na panda hàmu wàna na etina. Nda da-wàrihu-ya Nyuna dàngu nda da-ingaya na Umana.

⁷Dabita-ma-anja da pindu - pinduna na Umana i MIRI dàngu dapàda-ma-aha da palita-na. Dàngu nda datunu-apa dupa la Umana i MIRI dàngu nda dawotu-apa kameti maraku patunu lai Ala na palumu-na na tau Ihirailu.

⁸Hàla paraï ruku hànggana i MIRI huku-nanjaka da tau Yahunda dàngu tau Yeruhali. Dàngu nyimi pi-maminya jàka nggikina na-paluangu-na lima i MIRI hi lupa na-katàtaku dàngu na-ma-ngginggitu hàla na tau.

⁹Da amanda dameti-ka la pa-kangaburungu, tàka da ananda da papaha-nda pa-dundilu-ha ba tanawa-nja.

¹⁰Nàhu nyungga tu-nggunyaka pa-ràndingu dàngu i MIRI, Ala Ihirailu, ka àmbu nahili hàngga-dundapa.

¹¹Dou da ananggu duku, àmbi hili nàdi - nàdi-duyapa, nadu ba nyimidu papindi-na i MIRI la palumu-nya dàngu la pa-paatangu wikimi lai Nyuna dàngu la patunu-nya dupa, dàngu la pairu ngàndiya na rayatu la palumu-nya Nyuna,” wàna.

¹²Da tau Lewi da mamàtu la rehina nu: Welingu la kalibaru Kehàtu: i Mahàtu anana i Amahai, dàngu i Yoilu anana i Aharia Welingu la kalibaru Marari: i Kihu anana i Àpindi, dàngu i Aharia anana i Yahalileyilu Welingu la kalibaru Nggerihongu: i Yowàhu anana i Hima dàngu i Endingu anana i Yowàhu Welingu la kalibaru Elihapàngu: i Himiri dàngu i Yeyilu Welingu la kalibaru Ahawàpu: i Hakaria dàngu i Matanya Welingu la kalibaru Hemàngu: i Yahialu dàngu i Himei Welingu la kalibaru Yendutungu: i Hamaya dàngu i Uhialu.

¹⁵Tunaka nu hi da-pauhi-nja da tau Lewi hawiangu, tàka mbuu ndàbada hi da-payahangu wikida. Hàlaka nu, pa-jàngapu-nya na pareta hanganji, da ngara ratu da tama la Umana i MIRI, hi da-pakiringu la pa-payaha-nya tundunja da uku hidana i MIRI. Mbuu ndàbada da ma-iraku pangàndi hàlaha la hambeli la talora Umana i MIRI. Welingu lai nu dangàndi-ha paraï tau Lewi la Lolangu Kindurungu la hambeli paraingu.

¹⁷Na paràma nuna da-pakiri-nya la kawunga lodu la kawunga wulangu. La lodu pawalu wàna palundu-danyaka la pa-payaha-nya mbuu ndàbana na talora hi lupa la hanamba Umana i MIRI. Tunaka nu hili walu mbua lodui ba da-payaha hàlanya nuna na Uma, hi da-palundu-nya la lodu pa-hakambulu nomu wàna na wulangu nuna.

¹⁸Da tau Lewi da-patàka-nya na Hanganji Hihikia, “Ma-palundu-nyaka la pa-payaha-nya na Umana i MIRI mbuu ndàbada, jia-mbuya na ngia pawotu kameti maraku patunu, na menja nduma roti pa-payemangu, dàngu mbuu ndàbada da pa-paloku wànyaka.

¹⁹Mapiti beli-mbuhaka da pa-paloku wànguka da pambàda payila-na i Hanganji Ahàhu, ba jiaya na nda wàrihu-nanya i MIRI ba na-katangu-pa pareta. Mbuu ndàbada da pa-paloku wàngu nuda hili panuda beli-njaka lai MIRI, dàngu nàhu ninjaka la hangga ngia pawotu maraku,” wàda.

²⁰Nda nahili pa-tiangu mandai-apa i Hanganji Hihikia ba na-pauhi-nya mbuu ndàbana na matuku - matuku la panggolu, hi da-pakariangu hàla la Umana i MIRI.

²¹Nduma kameti maraku pa-jàmangu wàngu njala ndumana na kuru umana na hanganji dàngu na rayatu la Yahunda, dàngu la pa-payaha-nya na Umana i MIRI, dangàndi pihu ngiuda da hapi mini, pihu ngiu mbimbi, pihu ngiu ana mbimbi dàngu pihu ngiu kamàmbi. Tunaka nu na hanganji na-paràha-nja da ratu wàlana i Harungu ka dawotu-ha nuda da banda la pinu ngia pawotu maraku ka kameti maraku patunu-ha.

²²Darupu-ha nuda da hapi tàka da ratu hi daburi-ha da riada la pinu ngia pawotu maraku. Hàla jia-mayai ba tudanja nu da pihu ngiu mbimbi dàngu da pihu ngiu ana mbimbi.

²³La malamiri piti-danjaka da kamàmbi hi dangàndi-ha la hanganji dàngu la rayatu da ma-lumungu lai nu, hi da-padambakungu limada la kamàmbi nuda.

²⁴Hàlaka nu nuda da kamàmbi hi darupu-ha paraï da ratu, tàka da riada hi daburi-ha la ngia pawotu maraku, ka kameti maraku jàmangu njalaya nduma nggubulu-na na rayatu. Nu hi dawunda-ya rukuna ba na-wuangu pareta na hanganji ka ningu kameti maraku patunu dàngu kameti maraku jàmangu njala nduma nggubulu-na na rayatu Ihirailu.

²⁵Pa-jàngapu-nya na ngerangu na pawua-na i MIRI lai Ndautu la ngaruna i Wunangu Nggàtu, na ma-wunangu la hanganji dàngu la ngaruna i Wunangu Natàngu, na hanganji na-bànjalu-ha da tau Lewi la Umana i MIRI la pakata-nja da jungga dàngu da jungga lamba,

²⁶hama tuna na pawàna i Ndautu. Dàngumbu na-bànjalu-ha lai nu da ratu da mawàngu taropitu.

²⁷I Hihikia na-wuangu tanda la pa-pakiri-nya na lii wotu kameti maraku. Nu ba talànga wotu-daha da kameti maraku, pakiringu-nanyaka na tau pawunda ludu wotungu lai MIRI, dàngu da ngara ma-katangu malingu pambabu wàngu palingu-danjaka da taropitu hamanai da malingu hangia - hangia.

²⁸I Hanganji Hihikia dàngu mbuu ndàbana na tau na maninya lai nu maràbaku-danyaka ba da-marubuku-nya i MIRI ba dàngu ludu pangalangu-da da ngara maludu dàngu da ngara ma-katangu malingu pambabu wàngu palingu pangala-madanja da malingu-da hi lupa dakehi lundu pa-mbutangu da kameti maraku.

³⁰Na hanganji dàngu da matuku - matuku la panggolu paràha-danjaka da tau Lewi la pawunda-nya i MIRI ludu wotu hailangu da pa-lawiti-na i Ndautu dàngu i Wunangu Ahawàpu. Mbuu ndàbana na tau ludu-nanyaka wàngu hanggela hawola-da ba dàngu patika-da ba da-marubuku-nya i Ala.

³¹Hàlaka nu panii-nanyaka i Hihikia, “Nàhu nyimi ba mbàda pa-panudangu lai MIRI-kaika, tàka ka ningu tanda maraku pamalangungu-mi, màtawa kai ngàndi kameti maraku la Umana i MIRI,” wànanja. Hàla mbuu ndàbana na maninya lai nu dangàndi-ha nuda da tanda maraku, jiapa ningumbu mawàngu eti wikina mangàndi banda ka kameti maraku patunu-ha.

³²Dangàndi pihu kambulu hapi mini, hangahu mbimbi, dàngu 200 ana mbimbi, hi dawotu-ha ka kameti maraku patunu-ha lai MIRI.

³³Dangàndi-mbu 600 hapi mini dàngu 3.000 mbimbi, ka tanda maraku pawotu-ha dàngu ka dangangu ndàba da ma-pauhi.

³⁴Da ratu da mambàda pa-yahangu wikida nda datika pàku padangu la pandina hàlaha nuda da banda dangu. Jia-duyaka nyuda hi da-pambapa dànja nyuda paraï tau Lewi, nadu da tau Lewi ba darihi tuturu-pa la kalaratu lii pa-yahangu. Pa-daingu pa-mbapangu-mada lundu natoma na danguda da ratu da mambàda pa-yahangu wikida.

³⁵Hinggilu-da da kameti maraku patunu, da ngara ratu dawotu-mbu aparu-da da kameti maraku pamalangungu da pangana na rayatu. Dawotu-mbu angguru da paburi pa-karia-nja da kameti maraku patunu. Tuna nuduka ba hili patumbu beliya na lumungu la Umana i MIRI.

³⁶Ka hàmu-nanyaka na etina i Hanganji Hihikia dàngu na rayatu-naka, nadu ba mbàda ndula-nahaka la rehi na ma-dànggitu paraïna i MIRI la pa-paloku-ha nuda mbuu ndàbada.