Read Kambera 2 LII NDAI 3 Bible Online

2 LII NDAI 3 - Kambera bible

2 LII NDAI 3

¹I Hanganji Ndautu mbàda padai-mana-nyaka ka wuluya na Umana i MIRI la Yeruhali la Palindi Moria la ngia pawari puruhu uhu nggàndumu manguna i Arauna tau Yembuhu. Na hadangu-na na Umana i MIRI na-pakiri-nya paraïna i Hanganji Halomu

²la wulangu padua wàna la ndaungu papatu wàna ba na-pareta.

³Na nunjuna na Uma dua kambulu pihu metiru-na, tàka na ndàbaru-na hiwa metiru-na.

⁴Na nunjuna na kuru hanamba hamana na ndàbaru-na na Uma, nu ba hiwa metiru-na. Na janggana lima kambulu patu metiru-na. La kuruna nuna na kurungu patapu wàngu àmahu rara ihi mbangi-nanya.

⁵Na kuru bokulu patungu kapambalu ai kajuu Limbanongu-ya hi mangu patapu wànya àmahu rara ihi mbàngina pa-huratungu pingi wola dàngu pa-huratungu nggàmbaru nggili bàhi.

⁶Na hanganji na-pamananda-nya nuna na Uma, ba nawànya watu mata tawuru mana - nandangu dàngu àmahu rara da pangàndi welingu la tana Pàrawaïmu.

⁷Jia-mahai da àmahu rara nuda na patapu wànanja da dindina na Umana i MIRI, da patenga-na, da pàlaku pinduna dàngu da pindu - pinduna. Da dindina na-huratu-nja nggàmbaru patau awangu.[1]

⁸Na kurungu mbara dalu na pa-patamungu “Rowa Mahupu Matua” na nunjuna hiwa metiru-na tàka na ndàbaru-na, hiwa metiru-na, hama-mana na ndàbaru-na na Umana i MIRI. Dua kambulu tòngu àmahu rara patapu wànja da dindina na Rowa Mahupu Matua Meha

⁹dàngu 570 nggaràmu àmahu rara pa-pandoi paku. Da dindida da kuru - kurungu mangia dita patapu-mbuha wàngu àmahu rara.

¹⁰Na hanganji na-paràhangu pa-pandoi dàmbu kahala hada patau awangu welingu la palala, hàla hi tapu wànja àmahu rara, patuu pa-lihingu-ha la Rowa Mahupu Matua hanggangu la tuba pindu. Nimbihu-da da patau awangu maràngga dua mbàlama ruu kàpada, nimbihu ruu kàpa 2,2 metiru malaida. Ba da-tawàlahu da ruu kàpada da pa-jonggaru da hupuda la padua rowa, tàkaka da hupu - hupu hauda da-maràngga jonggaru dindingu la kalai la kawana. Ba tuna ba da-tawàlahu da ruu kàpada hiwa metiru-mada hamana na ndàbaru-na na rowa.

¹⁴Ndumana na Rowa Mahupu Matua pa-pandoi-manya tera dimbana welingu la tera linangu dàngu hili hau tera ma-kawuru, ma-mbaü atu dàngu marara. Na tera dimba nuna pa-huratungu-ya nggàmbaru patau awangu ba pa-mananda-nya.

¹⁵Na hanganji na-pahadangu andungu dua mbungu da janggada hapungu - hapungu 15,5 metiru-da hi natuha la hanamba Umana i MIRI. Nimbihu-da nuda da andungu ningu tubuku-da da ma-2,2 metiru janggada.

¹⁶La kapuka-da nuda da andungu da-pamananda wànya lulu parunggu pa-jilungu dàngu hangahu mbua wua njalima parunggu.

¹⁷Da andungu nuda pa-pahadangu la kalai la kawana pindu tama la Umana i MIRI; la mbara luru Yakingu,[2] wàdanya, tàka la mbara dia Mbowàhu,[3] wàdanya.