Read Kambera 2 LII NDAI 30 Bible Online

2 LII NDAI 30 - Kambera bible

2 LII NDAI 30

¹Na mbabunya na Paha ndedi peku paloku-nanya tau la rehina la wulangu kawunga, nadu da ratu da mambàda pa-yahangu wikida hawutu-ma-adapa dàngu ndedi nadangu-mbupa na tau na ma-pauhi la Yeruhali. Jia-duyaka nu i Hanganji Hihikia dàngu da panggawi-na hamanai na tauka na mangia-nya la Yeruhali hi da-pahamangu la pambabu-nya na Paha la wulangu padua wàna, nyuda mbuu ndàbada dambuha-nya nuna na pa-kawuku. Ka pa-ngàndingu-nanyaka huratu na hanganji la tauka mbuu ndàbana la nggubulu Ihirailu dàngu Yahunda. Hamanai la tau Epuraïmu dàngu Manahi. Nggubulu-na na tau Ihirailu piti welingu la tana ngaba kabihu Ndàngu mbara dia lundu la Mbiruhemba mbara luru, padunda hàlanya la Umana i MIRI la Yeruhali ka mbabunya na Paha dàngu la patembi maraku wànya i MIRI Ala Ihirailu hama tuna na pambàda kawuku la uku - ukuna i Muha. Ndedi handàkangu-ma patuna nu ba mbabunya na Paha.

⁶La lii pareta-na na hanganji dàngu da panggawi-na paràhangu danyaka pa-palewa la nggubulu Yahunda dàngu Ihirailu la pangàndi-ha da huratu na matuna yia na linguna, “Ha dimi tau Ihirailu! Nyimi mara-minyaka welingu la kuaha tau Ahuru. Nàhu màtawa kai kabeli pa-paatangu wikimi lai MIRI, Ala na pa-maraku-da i Ambarahàmu, i Ihàku dàngu i Yakupu, ka peku belinai duna pandula-kai nyimi.

⁷Màtangu àmbu hama tuna da boku la mangilu-mi dàngu da tau Ihirailu hawiangu da manda tuturu lai MIRI Alada. Ita wiki-maminya nyimi jàka nggiki hama mbotuna ba nahuku-nja nyuda.

⁸Àmbi malihu katiku-mi hama tuna nyuda, tàka màta kai manundu lai MIRI. Maiwa la Yeruhali, la Umana i MIRI na pambàda kahauna i MIRI Alami nduma wikina lundu nu - nu. Maiwa ka talumu-nya Nyuna, ka peku wadaru-na na hànggana lai nyimi.

⁹Jàka mihili pa-atangu beli wikimi lai MIRI, napa da tau da ma-palaü-nja da angu dedimi ba tanawangu-ha napa damila-manja eti hi da pahia-nja pabeli. I MIRI Alami, Ala mahàmu eti-nanya dàngu ma-paaï pa-namungu-ya; napa Nyuna nayema-kai nyimi jàka mibeli lai Nyuna,” wànanja.

¹⁰Ba dalaku-ka nuda da papalewa welingu la hau paraingu toma la hau paraingu la ngaba kabihu Epuraïmu dàngu Manahi datàka hu dia lupa la ngaba kabihu Hembulungu, dariki-nja nyuda dàngu da-paaka-nja.

¹¹Na nyuna ninguma tau welingu la kabihu Ahiaru, Manahi dàngu Hembulungu da ma-mbuhangu pamai la Yeruhali.

¹²La Yahunda-mbu naràma i Ala ba na-pambulu-nya na etina na rayatu hi daweli etingu la pa-manundu la pambuha-na i Ala nu ba datundu-nja da pareta-na na hanganji dàngu da panggawi-na.

¹³La wulangu padua wàna kanjupu danguya na tau na ma-pauhi la Yeruhali ka mbabunya na Lodu Remi Roti Nda Patai Wolungu.

¹⁴Da ngia pawotu maraku da maninja la Yeruhali, na ngia pawotu-da kameti maraku dàngu ngia patunu-da dupa la marapu - marapu, dapiti kawuka-nja la Lolangu Kindurungu.

¹⁵La lodu pa-hakambulu patu wàna na wulangu nuna rupu-danjaka da mbimbi ka wotuha ba kameti maraku Paha-ha. Ka kanjupu makia-haka da ratu dàngu da tau Lewi da ma-iraku-ipa. Ka pa-yahangu-danyaka wikida, hi pekuna ba dawotu kameti maraku patunu la Umana i MIRI.

¹⁶Da-kawàra tàngaru pangia-da la Umana i MIRI tundunja da kalaratu da pa-tulihu la Mbuku Ukuna i Muha. Da riada da kameti maraku da-pakata-nja da ratu paraï da tau Lewi, hàla hi daburi-ha la ngia pawotu maraku.

¹⁷Nadangu welingu la tau da maninja lai nu da mandedi pa-yahangu wikida, jia-duya hi nda pekuna nyuda la parupu-ha da mbimbi nduma kameti maraku Paha. Jia-duyaka hi da tau Lewika duda da ma-paloku-nja huruda nyuda, dàngu da-maraku-nja lai MIRI.

¹⁸Hinggilu-dai nuda, la honga tau Epuraïmu, Manahi, Ihakàru dàngu Hembulungu, dadangu da mamai dàngu ndedi pa-yahangu-da wikida. Jia ba tuna ba daremi-nya nyuda na Paha nda da-patutu-anya na kalaratu. Jiaya ba tuna nuduka hi na-hamaya-nja ndumada paraïna i Hanganji Hihikia, tuna yia na hamayangu-na,

¹⁹“Ou MIRI, Ala, palumu-da da boku la mangilu-ma, màla àruki paraï ruku hàmu etimu kau jàma àrunja nyuda da malumu weli etinggau Nyumu, jiapa-kai ka ndedi da-payahangu wikida,” wàna.

²⁰I MIRI na-patingi-manya na hamayangu-na i Hihikia. Najàma-manja da tau nuda, dàngu nda nahuku-anja.

²¹Pihu mbua loduna mandaina, ba dàngu nggaüru nda ukuha da etida da tau ma-pauhi la Yeruhali, nu ba dambabu-nya na Lodu Remi Roti Nda Patai Wolungu. Nimbihu lodu da tau Lewi dàngu da ngara ratu ba dawotu hailanya i MIRI wàngu weli eti-mada.

²²Da tau Lewi màhi nda ukuha la pa-pairungu palumu-nya i MIRI, hi lupa nawotu-nja paraïna i Hihikia. Ba pihu mbua lodu-naka mandaina ba dapàda-nja hàmuda da pangangu dàngu na mbabu hamanai nawotu-da kameti maraku ka pamalangu-nya i MIRI,

²³nyuda mbuu ndàbada dabota-ya la pa-pangala-nya na mbabu hili pihu mbua loduki. Ka hili mbabu pa-ngalangu-danyaka wàngu hanggela hawola-da.

²⁴I Hanganji Hihikia nahunggu 1.000-da da hapi mini hi 7.000-da da mbimbi. Da panggawi-na i Hihikia dahunggu 1.000 hapi mini dàngu 10.000 mbimbi. Mbuu ndàbada nuda da banda dawua-nya na rayatu la parupu-ha dàngu hi danganja. Kanjupu danguha da ratu ma-payahangu wikida.

²⁵Da rayatu Yahunda, da ngara ratu, da tau Lewi, dàngu da tau da mamai weli diangu, hamanai da tau nàmu da ma-paengangu la Ihirailu dàngu la Yahunda, mbuu ndàbada da-paohangu hàla.

²⁶Na paraingu Yeruhali nanggongga ailulu, nadu piti welingu la pereta-na i Hanganji Halomu anana i Ndautu, ndedi handàkangu pa-patumbu-ya na hamana nuna.

²⁷Da ratu dàngu da tau Lewi da-kamahi-nya kanyuru welingu lai MIRI ndumana na rayatu, tàka welingu la pangia-na na majangga la awangu i Ala na-tanaü-maya duna na hamayangu-da dàngu na-kataku-maya na lii kamahingu-da.