Read Kambera 2 LII NDAI 31 Bible Online

2 LII NDAI 31 - Kambera bible

2 LII NDAI 31

¹Ba najàpu-ka na mbabu, mbuu ndàbana na rayatu, laku nimbuhu-danjaka da paraingu la Yahunda, hàla pa-làjaru-danjaka da katoda - katoda marapu, da-panjoru-ha da kahala hada - kahala hada da pa-pahadangu ndumana na marapu kawini Ahera, da-patàlaru-ha da ngia pawotu maraku hamanai da ngia pa-lumungu-da marapu. Tuda numai la hau pangia - hau pa-ngiangu la Yahunda, hamanai la ngaba Mbanyamingu, Epuraïmu, dàngu Manahi. Hàlaka patuda nu beli-danyaka mbuu ndàbada la ngia pangia - ngia pa-ngiangu-da.

²I Hanganji Hihikia nahili pamàndu belinja da kanguhuru-da da ratu dàngu da tau Lewi pa-namatu-nya na hekangu wai ngerada. Nu da wai ngerada jia-duhaka yiada da ma-pandàkingu: wotu kameti maraku patunu dàngu kameti maraku papeku, paloku-ya na lii lumungu la Umana i MIRI, dàngu la pawotu pamalangu-nya i MIRI la nggi pa-ngiangu bia daa la Umana i MIRI.

³Welingu la banda wikina na hanganji nahunggu wànja da banda da pawàngu ba tu kameti maraku patunu nimbihu mbaru dàngu nimbihu malingu, dàngu nduma kameti maraku da pawotu la lodu Hangahu, la lodu Mbabungu Wulangu Bidi dàngu la mbabu - mbabu hawiangu-ka hama tuna na pambàda kawuku la uku - ukuna i MIRI.

⁴Hinggilu-da nuda na hanganji na-paràha-nya na ma-ngiangu la Yeruhali pangàndi tanda maraku da ndumada da ngara ratu dàngu tau Lewi, ka peku katiku puli-danya na ngera lumungu-da la Umana i MIRI, hama tuna na pa-tulihu daa la uku - ukuna i MIRI.

⁵Ba bobaru-yaka nuna na pareta, ka ngàndi-nanyaka na tau Ihirailu la Umana i MIRI da pawua-da welingu la kawunga ihi tanada, nu da taringgu, angguru, mina haitungu, manggaluwangu, dàngu pangala-daka da ihi tana hawiangu. Nyuda dangàndi-mbu hangia la hakambulu welingu la manguda nyuda.

⁶Mbuu ndàbana na tau na ma-ngiangu la parai - paraingu Yahunda dangàndi hangia welingu la hakambulu hapi dàngu mbimbida nyuda, dàngumbu ba hau dangu da pawua - wuada hawiangu-ka hàla hi dawotu ndàbaha la pa-maraku wànja lai MIRI Alada.

⁷Nuda da pawua-da da pa-nundangu pa-kiringu welingu la wulangu tailu, dàngu panunda pangalangu-madanya lundu la wulangu pihu.

⁸Ba ita-haka da hunggu da matuda nu danguda i Hanganji Hihikia dàngu da panggawi-na da-pamangunju-ya i MIRI dàngu dawotu-nya na rayatu Ihirailu na banjaru-na Nyuna.

⁹Ba napanii dànjaka da ngara ratu dàngu tau Lewi na hanganji rukuda nuda da hunggu,

¹⁰napanii i Ratu Bokulu Aharia, wàlana i Handuku, “Piti welingu ba namaika na rayatu patuha da hunggu maraku-da la Umana i MIRI, nda nanjaka-a-nggamapa nyuna pangangu, jiapa darihi-mbupa hi lupa dadangu-mapa da pangangu da pa-pahàmu-ma. Nuda mbuu ndàbada ma-kataku-ha ma bai MIRI-maka na ma-pakanyuru-nya na banjaru-na,” wàna.

¹¹La lii pareta-na na hanganji, payema-danjaka nyuda da nggundangu la winggiru-na na Umana i MIRI,

¹²hi da-pahàmu niha lai nu la nggundangu - nggundangu mbuu ndàbada da hunggu dàngu da ma-hangia-da welingu la hakambulu. Na haàtu na tau Lewi, na ma-tamungu Konanya, pa-pandumangu-ya la pa-hamata-ha, tàka i Himei na erina jia-yaka na ma-pambapa dànya.

¹³La wawada nyuda tau hakambulu-ha da tau Lewi hawiangu da pa-patanggungu, nu jiaha: i Yahialu, i Ahanjia, i Nahàtu, i Ahaïlu, i Yirimutu, i Yuhambàtu, i Elialu, i Yihimàkahia, i Mahàtu dàngu i Mbananya. Ba padainja nuda mbuu ndàbada pa-namatu-nya la lotangu-da i Hanganji Hihikia dàngu i Ratu Bokulu Aharia.

¹⁴I Kori anana i Yimuna, tau Lewi na kapala madai Pindu Bokulu Pahunga lodu la Umana i MIRI, nyunaka na pa-wuangu wai ngera la patanggu pinya la pakeiha da hunggu da pawotu lai MIRI, hàla ka napabe - berinja.

¹⁵La parai - paraingu hawiangu na ngia pa-ngiangu-da da ratu, ninja da tau Lewi hawiangu da matanggu-nya huruna i Kori nu, i Endingu, i Minyamingu, i Yehua, i Hamaya, i Amària dàngu i Hakanya. Ngga - nggàraha da pangangu, da-paberi hamanja la anguda pa-kabihu Lewi ka ma-kaweda-ya ka bidi tau-yakai tundunya na wai ngerada.

¹⁶Mbuu ndàbana na tau mini na ma-tailu kambulu[13] ndauna lupa na marihi na ndau lurina, na ma-ngalangu ngerana la pa-pahilungu hau lodu - hau lodu la Umana i MIRI, pa-wuangu-mbuha ndumada nimbihu-da tundunya na wai ngerada dàngu tundunya na kanguhuru-da.

¹⁷Da ngara ratu pa-tulihu pandutu-manja tundunya na kalibaru-da, tàka da tau Lewi da madua kambulu ndauda lupa da marihi pa-tulihu pa-ndutungu-maha tundunya na wai ngerada dàngu na kanguhuru-da.

¹⁸Nyuda mbuu ndàbada pa-tulihu pa-ndutungu-maha dàngu ana dàngu papaha-da, dàngu da anguda hawiangu daa la kuru uma, nadu nyuda ba da-rimangu mànu padua bàdi la nimbihu rehi la pa-palaku-ya na wai ngerada na pa-panudangu-ha ndumana i MIRI.

¹⁹La hongada da ratu da ma-ngiangu la parai - paraingu da pa-pandumangu-ha da wàlana i Harungu, jàka ndia la maràda la winggiru-da nuda da paraingu, pa-patunggungu-maha matanggu paberingu pangangu la mbuu ndàbada da tau mini daa la kuru uma ratu, dàngu nimbihu-da da tauka da pa-tulihu tamu la kabihu Lewi.

²⁰La nggubulu Yahunda, i Hanganji Hihikia na-padili-nya la mamola, la ma-deningu na pa-palaku-na, dàngu nahàmu wànya na etina i MIRI Alana.

²¹Na-hàrangu hàla na paràma-na, nadu mbuu ndàbada da paraï rukuna ndumana na Umana i MIRI, dàngu ndumana la panunju-ha da ukuna i MIRI, ba wàngu weli eti-mana ba na-palaku-ha dàngu wàngu mbuha-nanya i MIRI Alana.