Read Kambera 2 LII NDAI 32 Bible Online

2 LII NDAI 32 - Kambera bible

2 LII NDAI 32

¹Ba nahàla-ka i Hihikia pa-palaku-ha da pa-lohangu wàna na tuturu-na lai MIRI, i Hànaheripu hanganji Ahuru kangaburu-nanyaka la Yahunda. Na-nggupulu-ha da paraingu da maningu tindingu dàngu nawua-nja pareta da pamba tanatara-na la pawàhi-ha.

²Ba napi-nyaka paraïna i Hihikia ba patikingu-nanya i Hànaheripu la pa-kangaburu-ya la Yeruhali,

³nyuna dàngu da ngara panggawi-na dabota-ya la pabita-nja mbuu ndàbada da matawai la hambeli paraingu, na-pawuku-da ka màtawa da tau Ahuru àmbu dahunggu wai jàka da tàka la lihina la Yeruhali. Dira danguya na tau na-padundilu la pabita-nja mbuu ndàbada da matawai da ma-lulungu la hambeli paraingu.

⁵Hàla na hanganji hi na-pakapingatu-ya na ngia pa-pajàrungu-na na paraingu, ba na-pahàmu-ha da kangeli-na, ba na-pahadangu lewatu - lewatu la pinu kangeli dàngu na-pahadangu hili hau kangeli la hambeli-na. Hinggilu-da nuda na-pahàmu-ha da tindingu da pa-pahadangu la pinu kabundu tana la pahunga lodu na hahupu memangu-na na paraingu Yeruhali. Nyuna na-paràhangu-mbu pa-pandoi pada - dangu nimbu dàngu temingu.

⁶Nawotu-ha da parawira - parawira la paliku urunja mbuu ndàbada da tau mini daa la paraingu, dàngu hi na-paràha-nja la pa-pauhi la talora la hangga pindu paraingu. Hàla hi napanii-nja,

⁷“Pa-torungu dàngu pi hàmunya la etimi; àmbi mangàdatu-dunya na hanganji Ahuru dàngu da pamba tanatara-na. Na kapàru la ngabanda nyuta narihi-mapa welingu la kapàru la ngabana nyuna.

⁸Nyuna kapàru wàngu-nanya tau, tàka nyuta duta ningu MIRI Alanda la pandula-ta dàngu la pa-kangaburungu hurunda nyuta,” wàna. Ba darongu-yaka na paniina na hanganji-da, toru mbeni-nanyaka na rayatu.

⁹Pi - pira mandaina la hambeli-na nu ba ni bia-nyapa i Hànaheripu dàngu pambana la Lakihu, paràhangu-nanyaka papalewa lai Hihikia dàngu la rayatu Yahunda la Yeruhali, la pa-patàka-nya na lii yiana,

¹⁰“Nyungga Hànaheripu hanganji Ahuru, ka ku-paàra-nja wànggunggai nggikina hi tu-ina ka na toru mbenimi pa-paengangu la Yeruhali na patalànga nggupulu.

¹¹Màla ningu nu paniina i Hihikia ba i MIRI Alami napa na-pahàla kai welingu la kuaha-ma nyuma? Àmbi waiduya, nadu ba panyonga-ma-ananggai. Napa nyuna namàta-ma-anggai hi mimeti la rimbangu dàngu la kandànga.

¹²Nyuna-maka na ma-palàjaru-ha da ngia pa-lumungu dàngu da ngia pawotu maraku lai MIRI, hàla hi na-paràha-nya na tau Yahunda dàngu Yeruhali la pa-lumungu dàngu la patunu dupa la haua ngia pawotu maraku.

¹³Màla nyimi ndai pinya na paruku-nggu nyungga dàngu da boku la mangilu-nggu hangganja da banjaru hawiangu? Ndedi ningu handàkangu da marapu-da da banjaru hawiangu da ma-pahàla-ya na banjaru-na welingu la kuaha hanganji Ahuru!

¹⁴Nggamu-yaka nu welingu lai nyuda na matuya na matuna nu? Nda peku-ana na marapu-mi nyimi la pa-pamara-kai nyimi!

¹⁵Àmbi màta bianya na hanganji-mi la pa-panyonga-kai dàngu la pa-panduba-kai nyimi! Àmbi waiduya! Ba ndedi ningua handàkangu marapu hau banjaru jiapa nda la nggiya na mamàka pa-pahàla-ya na banjaru-na welingu la kuaha-na na hanganji Ahuru. Jiangu-ma ba nda namàka na marapu-mi pa-pahàla-kai nyimi!” wàna.

¹⁶Dangu-mapa kareuku pawunda-da da papalewa Ahuru ba da-paaka-nya i MIRI Ala dàngu i Hihikia atana i MIRI.

¹⁷Na hanganji Ahuru natulihu-mbu huratu la pa-jeriku-ya i MIRI, Ala pamaraku-na na tau Ihirailu. Tuna yia na linguna nuna huratu, “Da marapu-da da banjaru hawiangu nda da-ngalangu-a pa-pahàla-ya na banjaru-na welingu la kuaha-nggu nyungga, tuna numbu na marapu-na i Hihikia ba nda namàka pa-pahàla-ya na banjaru-na welingu la kuaha-nggu,” wàna.

¹⁸Nuda da papalewa Ahuru dawara-manja nuda la hilu Imbarani ba da-pamangàdatu-ha dàngu ba dapamàli-ha da etida da tau Yeruhali da maninja dita la pinu kangeli paraingu, ka peku mudana ba dawàhi-ya nuna na paraingu.

¹⁹Dapanii wànya na rukuna i Ala na pa-marakungu la Yeruhali hama tu-ma-ana ba dapanii wànja da marapu banjaru hawiangu, nu da kahala hada pa-pandoi tau pinu tana.

²⁰Ka hamayangu-danyaka i Hanganji Hihikia dàngu i Wunangu Yahaya anana i Amuhu. Da-warangu ba dakarai pa-ndulangu lai Ala.

²¹Ka paràhangu-nanyaka haàtu papalewa i MIRI na ma-pameti-ha da panjuri dàngu da parawira tau Ahuru. Dàngu makia nda ukuya na hanganji Ahuru beli-nanyaka la paraina. Handàka la hau lodu ba talànga ninya daa la uma marapu-na, ba tau mapira-ha da ana wikina mai-danyaka hi da-pameti wànya hapanda.

²²Tuna nu na àndana i MIRI ba na-pahàla-ya i Hanganji Hihikia dàngu na ma-mandapu-nya la Yeruhali welingu la kuaha-na i Hànaheripu hanganji Ahuru, dàngu welingu la muhu - muhuda hawiangu. I MIRI nawua-nja luri peku luri mànjaku dàngu nda kuhiku-naha paraï nanggara - nanggara la winggiru-da.

²³Nadangu na tau na mamai la Yeruhali da mangàndi tanda maraku lai MIRI dàngu pawotu - pawotuda lai Hihikia, jia-duyaka piti welingu nu nyuna hi natembi-ya paraï mbuu ndàbana na banjaru.

²⁴La manggawa-na nuna i Hanganji Hihikia handauni-nanyaka hidu. Kanjupu mbotuya na hiduna, natika pameti-ka-amangu. Na-hamayangu, tàka i MIRI hi nawua-nya tanda, napa ba na-mandangu.

²⁵Tàka ruku ngambana, nda na-pamalangu-anyapa i MIRI na mawua-nya pa-mandangu wàngu. Ruku tuna nuduka i MIRI hi nahàngga-nya na Yahunda dàngu na Yeruhali.

²⁶Tàka la malamiri i Hihikia dàngu da tau Yeruhali da-pawawangu-ka wikida, jia-duya ba talànga luri-napa i Hihikia, ndedi pa-palaku-ayapa na hukungu.

²⁷I Hanganji Hihikia kanjupu wulu-yaka, dàngu natembi hàlaya tau. Nyuna na-pandoi-ha da kurungu ngia pa-pahàmu-naha da bandana, nu da àmahu rara, mabara, watu - watu mata tawuru, da rungu, temingu dàngu da malanja pa-wilingu hawiangu.

²⁸Nyuna ningu nggundangu - nggundangu pangia-da da ihi tanana, hama tuna: uhu nggàndumu, angguru dàngu mina haitungu; ningumbu oka - okana ndumada da hapi da mbimbina da ma-kanjupu danguha.

²⁹Hinggilu-da nuda na-pahada padangu-mbu paraingu. Da pawulu-na da pawua-nanya paraïna i Ala dabundu làndangu.

³⁰I Hanganji Hihikia nuna-maka na matunya kahiri na wai welingu la mata wai Nggihungu, hi napali-nya la londa wai la unu tana la paraingu Yeruhali. Mbuu ndàbada da paràma-na i Hihikia da-palingu hàla.

³¹Tàka ba jia-yaka na tàkada da tau papalewa welingu la Mbambilu la pa-paàra-nya na mandangu-na welingu la hiduna ba pa-hangàtaru wànguya, i MIRI napuli-ma-anya ka nawàngu eti wikina ka kama wànya na etina.

³²Hawiangu da rukuna i Hanganji Hihikia dàngu na ngera mbuha nanya i MIRI, ni-manjaka da pa-tulihu la Mbuku Puru Pekana i Ala la Wunangu Yahaya anana i Amuhu, dàngu daa la Mbuku Lii Ndai Hanganji Yahunda dàngu Ihirailu.

³³I Hihikia ba nameti, hi datani-nya la ma-pa-kandekalungu la tana pangia reti maràmba. Nggubulu na tau la Yahunda dàngu la Yeruhali kanjupu tembi-danya nyuna ba nalua-yaka pameti. I Manahi anana jia-yaka na ma-hanganji hiluya nyuna.