Read Kambera 2 LII NDAI 33 Bible Online

2 LII NDAI 33 - Kambera bible

2 LII NDAI 33

¹I Manahi hakambulu dàmbu ndau-anapa ba nanjadi hanganji la Yahunda dàngu ba na-katangu pareta la Yeruhali lima kambulu lima mbua ndauna.

²Nyuna nanjala lai MIRI, nadu ba natundu-nya na huri akatu na pakàli wàda da banjaru pambàda wànggana i MIRI welingu la Kanaàngu ba jiaya na tamana na tau Ihirailu la tana lai nu.

³Da ngia palumu - ngia pa-lumungu marapu da pambàda pa-tàlaru-na i Hihikia, amana, na-pahada beli-ma-anja. Na-pahada-nja da ngia pawotu maraku ngia palumu-danya i Mbaàlu, dàngu da-pandoi kahala hadana na marapu kawini Ahera, dàngu ba dalumu-nja da kandunu.

⁴I MIRI mbàda panii-manaka ba lundu nu - nu la Yeruhali jia-mayaka na ngia palumu-nya Nyuna, tàka lai nu la Umana i MIRI, nyuna i Manahi na-pahada-nja da ngia pawotu maraku ndumada da marapu.

⁵La talora-na na Umana i MIRI hapapa - hapapa na-pahada-nja da ngia pawotu maraku ka lumu wànja da kandunu.

⁶Da anana nawotu-ha ka kameti maraku patunu-ha la Lolangu Hinumu. Nyuna na-nggumangu-mbu pa-kitangu muru, pa-manyura, pa-kabeli mata, dàngu pa-paàrangu ngerangu la patau tana. Lalu mbana njalaya lai MIRI hi lupa nawuda-ya na hànggana i MIRI.

⁷Da kahala hada marapu natuha la Umana i MIRI, làti duna na ngerana na pangia nuna mbàda panii-manaka i Ala lai Ndautu dàngu lai Halomu na anana, “Yia na Umanggu la Yeruhali na pambàda pindinggu welingu la hakambulu dua ngaba kabihu banjaru Ihirailu, jia-yaka na pangia pambàda kawuku-nggu ka ngia palumu ningga lundu nu - nu.

⁸Na banjaru Ihirailu jàka danunju-ha mbuu ndàbada da pareta-nggu dàngu jàka datundu-nja da ukunggu da pawua-nanja nyuda i Muha atanggu, napa nda kupuli-anja la pawàngga-ha welingu la tana na pambàda wua-nggunja da boku la mangilu-da,” wàna.

⁹I Manahi-maka na ma-pawiti-nya hi kiri wundana manjala na rayatu Yahunda, marihi akatu welingu la njala pawunda-na na ba - banjaru pambàda wànggana i MIRI welingu la Kanaàngu ba jiaya na tamana na banjaru-na i MIRI la tana nuna.

¹⁰I MIRI nahàngga nàrunya i Manahi dàngu na rayatu-na, ba tuna nda da-patingingu-a.

¹¹Jia-duyaka i MIRI hi natàka ngàndiha da ngara liku uru tanatara Ahuru la pa-kangaburu-ya la Yahunda. I Manahi dayàpa wànya katekaru, datunya nggili bàhi hi dangàndi-ya la Mbambilu.

¹²La dalu pàdangu-na mayila nu, pawawa-nanyaka wikina hanggangu lai MIRI Alana, hi na-hamayangu ba na-kamahi-nya na pa-ndulangu-na.

¹³I Ala nahema hàmuya na hamayangu-na i Manahi, jia-duyaka hi na pabeli-nya la Yeruhali la pahili pareta beli. Rukuna nuna na matumbu pi langatàka-nanyaka i Manahi ba Ala-maya i MIRI.

¹⁴Tunaka nu i Manahi hi na-pajangga-ya na kangeli hambeli-na na Paraingu-na i Ndautu la pahunga lodu. Na-pakiri welinya la hau pa-ngiangu la lolangu lihi matawai Nggihungu pa-ngalangu hu dia lupa la Pindu Bokulu Iyangu dàngu la nuana na paraingu la Opilu ba wàdanya. La nimbihu paraingu maningu kangelingu la Yahunda, na-bànjalu haàtu ngora pabera.

¹⁵Na-payila-nja da kahala hada marapu banjaru hawiangu hamanai da marapu da patuna la Umana i MIRI. Na-nyànggaru-ha da ngia pawotu maraku la marapu da maninja la tundu Umana i MIRI, dàngu la pangia - pangia hawiangu la Yeruhali. Mbuu ndàbada nuda nangàndi-ha la hambeli paraingu hi wàrunja.

¹⁶Tunaka nu hi na-pahàmu-ya na ngia pawotu maraku na ngia pa-lumungu lai MIRI, hàla hi nawotu lai nu kameti maraku papeku dàngu kameti maraku pamalangungu. Na-paràha-nya na tau Yahunda mbuu ndàbana la palumu-nya i MIRI Ala Ihirailu.

¹⁷Na rayatu duna wotu bia-nanyapa kameti maraku la ngia pa-lumungu hawiangu, na nyuna da tanda maraku nuda ndumana i MIRI-mahaka duna.

¹⁸Hawiangu da rukuna i Manahi, dàngu na hamayangu-na lai Ala, dàngu da lii langu pa-pangàndi-na i Ala lai nyuna na pa-patàka-danya paraï da wunangu la tamuna i MIRI, Ala Ihirailu, mbuu ndàbada ni-manjaka da pa-tulihu daa la Mbuku Lii Ndai rukuda da Hanganji Ihirailu.

¹⁹La Mbuku Lii Ndai Ngara Wunangu ni-manyaka na pa-tulihu, nu na hamayangu-na i Manahi dàngu na hema-nanya na hamayangu nuna i Ala, hamanai da rukuda da njalana ba ndedi na-pambelingu, da ngia pamaraku-nanja da marapu dàngu da kahala hadana na marapu kawini Ahera da pa-pandoi-na, lupa da marapu da palumu-na.

²⁰I Manahi nameti, hi taninya la uma hanganji. I Amungu, na anana jia-yaka na ma-hanganji hiluya nyuna.

²¹I Amungu, dua kambulu dàmbu ndau-naka ba na-katangu hanganji la Yahunda, dàngu na-pareta la Yeruhali dàmbu ndauna mandaina.

²²Hama tuna na amana nyuna nanjala-mbu lai MIRI. Dàngu nalumu-nja da marapu da palumu-na na amana dàngu nawotu-nja kameti maraku nuda da marapu.

²³Tàka, na-pahilitu dàngu na amana, i Amungu nda na-pawawangu-a wikina dàngu nda na-kabeli-a lai MIRI; ba tuna narihi-pa na njalana welingu la amana.

²⁴Da panggawi-na i Hanganji Amungu da-pahama kangunduhungu palawa-nya nyuna hi da-pameti-ya la uma hanganji.

²⁵Na nyuna na rayatu la Yahunda da-pameti-ma-aha nuda da tau da ma-pameti-ya i Hanganji Amungu, hàla hi dawotu-ya i Yuhia, na anana pa-hanganji.