Read Kambera 2 LII NDAI 34 Bible Online

2 LII NDAI 34 - Kambera bible

2 LII NDAI 34

¹I Yuhia walu mbua ndau-anapa ba na-katangu hanganji Yahunda, dàngu tailu kambulu hau ndauna ba na-pareta la Yeruhali.

²Nyuna natuya na pahàmu wàna na etina i MIRI; nyuna natundu-nya na hurina i Hanganji Ndautu boku la mangilu-na, dàngu nanunju pawingu-manja da Ukuna i Ala.

³Ba nalua-yaka pawalu mbua ndauna ba na-hanganji, ba kanguraku-mana-nyapa, pakiri welingu-mana-nyaka la palumu-nya i Ala na palumu-na i Ndautu boku la mangilu-na. Pa-làngangu-ka patu mbua ndaungu pa-kiringu-nanyaka pa-palàjaru-ha da ngia palumu - ngia pa-lumungu marapu, da kahala hadana na marapu kawini Ahera lupa da marapu hawiangu.

⁴Da kahala hada dàngu nuda da marapu da-paluju làjaru-ha paraï da tau la wawana i Yuhia, hàla da kabuda hi da-hàbaru-nja la pinu retida da tau da mawotu-nja kameti maraku nuda da marapu. Da ngia pawotu maraku la Mbaàlu dàngu da ngia pawotu maraku dupa da maninja lai nu na-nyungguru-ha.

⁵Tunaka nu i Yuhia hi natunu-ha la pinu ngia pawotu maraku nuda da rinada da ngara ratu da malumu-nja nuda da marapu. Nu ba tunanu paloku-nanyaka la Yahunda dàngu la Yeruhali hi nahili pa-ràkangu beli ka ngia pa-lumungu lai MIRI-ya.

⁶Hili hama tu-manai nu na pawunda-na la parai - paraingu dàngu la ngaba tana da mambàda làjaru la tana ngaba Manahi, Epuraïmu, dàngu Hamiungu, lupa la Nàputali la mbara dia.

⁷Da ngia pawotu maraku dàngu da kahala hadana i Ahera la nggubulu Pa-hanganji Mbara Dia na-nyànggaru-maha paraïna i Yuhia, hàla da kahala hadana dàngu da ngia pawotu maraku dupa na-pakaweraku-ha. Tunaka nu beli-nanyaka i Yuhia la Yeruhali.

⁸La ndaungu pa-hakambulu walu wàna na pareta-na i Yuhia, ba nahàla-ka pa-payila-nya na ruku lumungu marapu la Umana i MIRI hamanai la nggubulu tanana, na-paràhangu tau matailu la pa-pahàmu-ya na Umana i MIRI Ala. Nuda da tau matailu jia-duhaka i Hapàngu anana i Ahalia, i Maaheya na nggumbunuru Yeruhali, dàngu i Yowàhu anana i Yuawàhu na haàtu panggawi mangia dita.

⁹Da tau Lewi, da madai pindu Umana i MIRI, da-pakata-nya na Ratu Bokulu Hilikia, da àmahu da pambàda pauhi-da. Da àmahu nuda welida la tau Epuraïmu dàngu Manahi, dàngu welingu la rayatu hawiangu la Pa-hanganji Mbara Dia, dàngu welingu la rayatu la Yahunda, Mbanyamingu dàngu Yeruhali.

¹⁰Da àmahu nuda napa na Ratu Bokulu Hilikia na-pakata-nja la tau madua haàtu da matanggu tanara-ya na paràma ba pahàmu-ya na Umana i MIRI. Hàlaka nu da àmahu nuda hi dawua-nja,

¹¹da ngara tukangu ai dàngu tukangu mawulu uma, da makei wànja watu dàngu ai da pa-pahàmu wànja da uma da pa-lànjangu hi daruha paraï da hanganji Yahunda.

¹²Da tau da maràma la pa-pahàmu uma tau tànji ailulu-ha. Tau mapatu-ha da tau Lewi da ma-kapala-nja nyuda: i Yahàtu dàngu i Ombanja welingu la kalibaru Marari, i Hakaria dàngu i Mahulàmu welingu la kalibaru Kehàtu. Da tau Lewi, da mapingu pa-katangu malingu pambabu wàngu mbuu ndàbada,

¹³pa-patanggungu-ha la pa-tanara-ha da ma-palaü-nja da paràma wàngu, nyuda-duka da ma-kapala-nja da tau da maràma hangia - hangia, matanggu tulihu-ha mbuu ndàbada, dàngu matanggu dai pindu.

¹⁴Ba talànga paluhu-danjaka nu da àmahu hunggu welingu la ngia pa-pahàmu-ha, i Hilikia nahunggu-ya na Mbuku Ukuna i MIRI, nu da uku da pawua-na i Ala lai Muha.

¹⁵Ka panii-nanyaka i Hilikia lai Hapàngu, “Nyungga kuhunggu-yaka na Mbuku Ukuna i MIRI la Umana i MIRI,” wàna. Ka wua-nanyaka nuna na mbuku lai Hapàngu,

¹⁶tàka i Hapàngu hi nakeiya nuna na mbuku hi nalua la hanganji hi napanii, “Mbuu ndàbana na pareta-mu Tamu Umbu ma-palaku-mahaka.

¹⁷Mbàda piti-maka àmahu da pa-pahàmu la Umana i MIRI, hi ma-pakata-nja da maràma hamanai da ma-hamata-ha,” wàna.

¹⁸Tunaka nu hi nabonja-ya na kareuku-na, “I Hilikia nawua-ngganya na mbuku yiana lai nyungga,” wàna. Hàla i Hapàngu hi nambaha-nya na mbuku nuna na hanganji.

¹⁹Ba narongu-yaka na ihina na mbuku nuna, bàriku-nanjaka da pakina na hanganji ba lalu hawina-ya.

²⁰Ka wuangu-nanyaka pareta na hanganji lai Hilikia, i Ahikàmu anana i Hapàngu, i Àpundongu[14] anana i Mika, i Hapàngu na hakaratarihu nanggara, dàngu i Ahaya ma karaha hanganji. Napanii,

²¹“Luawa kai paàra-nya i MIRI ndumanggu nyungga dàngu ndumana na tauka na maninya la Ihirailu dàngu la Yahunda, rukuna na ihina na mbuku yiana. I MIRI nahàngga-nda nyuta nadu da boku la mangilu-nda ba nda datundu-nja da pareta da pa-tulihu daa la mbuku yiana,” wàna.

²²Ka lua-danyaka i Hilikia, i Ahikàmu, i Àpundongu, i Hapàngu dàngu i Ahaya la pakarai panaungu la haàtu kawini, na ma-tamungu Hulunda. Nyuna wunangu-ya na ma-ngiangu la bidi kotaku la Yeruhali. Na leina i Halumu-ya na tamuna anana i Tikuwa, umbuku-na i Hàrahàhu.[15] Nyuna na ma-paloku-ha da paki lumungu la Umana i MIRI. Ba narongu-ka i Hulunda na paniida nyuda,

²³na-paràha-nja pabeli la hanganji la pa-patàka-nya na lii yiana, “I MIRI, na Ala palumu-na na tau Ihirailu napanii,

²⁴‘Napa Nyungga kuhuku-nya la Yeruhali dàngu mbuu ndàbana na tau mangia-nya wànja da ràtungu da pa-tulihu daa la mbuku nuna na pambaha-danya na hanganji.

²⁵Nyuda da-dunjaku-nggaka Nyungga tàka hi dawotu-nja kameti maraku da pa-alangu hawiangu. Mbuu ndàbana na pawunda-da nawuda-ya na hàngganggu. Kuhàngga-nya la Yeruhali, tàka na hàngganggu nda peku-anapa la pa-pawadaru-ya.

²⁶Tàka jàka jiaya i Hanganji Yuhia, yiana-ya na liinggu Nyungga, i MIRI Ala Ihirailu: Ba murongu-yaka jàka nggàraya na pa-tulihu daa la mbuku,

²⁷mupeka halaera tàka hiu pa-wawangu wikumu la hangganggu. Mbàda pangàdungu-mangguka la pahuku-nya na Yeruhali dàngu na mangia-nya, tàka na nyuna bau rongu-yaka nu na pangàdungu-nggu hii-munyaka hiu bàriku-ha da pàkimu tanda hawina-mu. Mbàda rongu-nggunyaka na hamayangu-mu,

²⁸jia ba tuna, na hukungu-na na Yeruhali napa ndedi pawà-anyapa ba talànga lurimu. Nyumu napa ku-pahia-nggau la pameti mandangu,’ wàna wàminya,” wàna. Ka beli-danyaka da papalewa la hanganji hi da-patàka-nya na lii nuna.

²⁹I Hanganji Yuhia na-paau hàlanja da ma-pangora la Yahunda dàngu la Yeruhali,

³⁰hàla lua kariangu-danyaka la Umana i MIRI. Da-pakikungu da ngara ratu, da tau Lewi dàngu mbuu ndàbana na rayatu, ka mamila-ya dàngu ka mawulu-yakai. La hanggada nyuda mbuu ndàbada, la lihi kambaniru lundungu na pa-patunggungu-ya na hanganji,[16] na hanganji na-ndolaku hi nambaha pakodu-nya mbuu ndàbana na mbuku pa-ràndingu na pambàda hungguda daa la Umana i MIRI. Tunaka nu na hanganji hi natuu pa-ràndingu dàngu i MIRI la pa-manundu lai Nyuna, dàngu la pawànya wàngu mbulungu eti dàngu mbulungu hamangu mbuu ndàbada da pareta dàngu da ukuna, la pa-patutu-nya na hidana na kalaratu pa-ràndingu-na i MIRI dàngu banjaru-na na pa-tulihu daa la mbuku nuna.

³²Mbuu ndàbada da tau Mbanyamingu dàngu mbuu ndàbada da tau hawiangu da maninja la Yeruhali na-paràha-nja pa-paràndingu la patundu-nya na pa-ràndingu. Jia-duyaka da tau la Yeruhali da nunjuha da kalaratu la pa-ràndingu nuna, nu na pa-ràndingu-da nyuda dàngu na Alada da boku la mangilu-da.

³³Da marapu da ma-palabu eti, da maninja la pangia - pangia la ngaba tau Ihirailu, mbuu ndàbada na-palàjaru-ha paraïna i Hanganji Yuhia. Na-paràha-nya na tau pa-pareta-na la palumu-nya i MIRI, Alada da boku la mangilu-da. Ba talànga luri-napa i Yuhia, pa-daingu tuturu-mana na rayatu lai MIRI.