Read Kambera 2 LII NDAI 35 Bible Online

2 LII NDAI 35 - Kambera bible

2 LII NDAI 35

¹Tunaka nu i Yuhia nambabu-nya na Paha la Yeruhali la patembi-ya i MIRI. Da mbimbi ndumana nuna na mbabu parupu-ha la tànggalu hakambulu patu la wulangu kawunga.

²I Yuhia na-paberi-nja wai ngerada da ratu la paràma-da la Umana i MIRI, dàngu na kamahi-nja ka daràma pahàmu-nya.

³I Yuhia nawua-nja pareta da tau Lewi da pa-patunggungu ndumana i MIRI, dàngu la panjadi ngguru la Ihirailu. Napanii-nja, “Tuya na Pàti Pa-ràndingu-na i MIRI na ma-matua daa la Umana i MIRI na pa-pahada-na i Hanganji Halomu anana i Ndautu. Àmbi hili pale - leli-dunyapa. Lumu-nyawa i MIRI Alami dàngu na banjaru Ihirailu na banjaru-na.

⁴Rimangu-ma la Umana i MIRI tundunya na kanguhuru-mi, pa-namatu-nya na pa-biwangu wai ngera na pambàda padaina i Hanganji Ndautu dàngu i Hanganji Halomu na anana.

⁵Patunggu-manja da kanguhuru-mi ka lupa ningu mànuma welingu lai nyimi na mapeku la patula-nya nimbihu-na na kalikapu tau Ihirailu la Umana i MIRI.

⁶Lupangu-ma nyimi kai rupu mbimbi ndumana ba mbabunya na Paha. Jia-duya ba tuna nu hawanjiru-wa kai pa-ràkangu la palumu-nya i MIRI, dàngu payema-manja da kameti maraku ka lupangu wotu-maha badi lai MIRI, màta ba tuna nu ka pekunai duna na tau Ihirailu hawiangu pa-palaku-ya na hupu liina i MIRI la ngaruna i Muha,” wàna.

⁷Ka peku wotuna kameti maraku Paha na tau na maninya la mbabu Paha, i Hanganji Yuhia nahunggu welingu la banda wikina 30.000 mbimbi, ana mbimbi dàngu kamboka kamàmbi, hi lupa jiaha ba 3000-da hapi mini.

⁸Da ngara panggawi-na i Yuhia da-wuangu-mai duda hunggu ndumada da ratu, dàngu da tau Lewi dàngu nggubulu-na na rayatu. Da panggawi da pa-wuangu wai ngera la papinya na Umana i MIRI jiaha i Ratu Bokulu Hilikia, dàngu Hakaria lupa i Yahialu, pa-kadua haàtu-da dawua-nja da ratu 2.600 ana mbimbi dàngu kamboka kamàmbi hi jiaha ba 300-da da hapi mini ndumana na tanda maraku la mbabu nuna.

⁹Da ngara ma-kapipi tau Lewi, nu: i Konanya, i Hamaya, dàngu i Netaneyilu na anguna paluhu, i Hahapia, i Yeyilu, dàngu i Yuhambàtu, da-wuangu hunggu la tau Lewi 5000 ana mbimbi dàngu kamboka kamàmbi hi jiaha ba 500-da hapi mini ndumana na kameti maraku la mbabu nuna.

¹⁰Ba damàtu hàlaka ndumana na mbabunya na Paha, da ratu dàngu da kanguhuru tau Lewi kawàra ngia-danjaka da pangia-da hama tuna ba nawua-nja pareta paraï na hanganji.

¹¹Hàla rupu-danjaka da banda ndumana na mbabunya na Paha; da tau Lewi da mandina-ha, tàka da ngara ratu da ma-paiharu-nja da riada la pinu ngia pawotu maraku.

¹²Nimbihu-na na kalikapu kuru uma da maninja lai nu da-ngalangu heu welingu nuda da banda da pa-payemangu ka kameti maraku patunu-ha. Nu ba tuna nu peku-naka nyuda pawotu kameti maraku tundunya na kalaratu na pa-huratu daa la Mbuku Ukuna i Muha.

¹³Tàka da tau Lewi hi da-handara-nya la epi na kameti Paha, pa-jàngapu-nya na kalaratu, dàngu hi da-manahu-ha da kameti maraku pa-patunggungu daa la wurungu, la kawalu dàngu la kambelaku, tunaka nu hi da-paberi parengga-nja da tolungu la tauka.

¹⁴Hàlaka nu hina-duka hi damangu pa-paloku nduma wikida nyuda da tau Lewi dàngu ndumada da ngara ratu wàlana i Harungu. Nadu, ba lundu rudungu-duna da ngara ratu ba daràma pangalangu la pawotu-ha nuda da banda ka kameti maraku patunu-ha dàngu la patunu-ha da mbokada nuda da kameti maraku.

¹⁵Da ngara mamàhi pa-katangu malingu pambabu wàngu welingu la kalibaru Ahawàpu la kabihu Lewi nimanja la ngia pa-palaku-da wai ngerada da pambàda kawàri-na i Ndautu ndumada nyuda. Yia-dahaka da tamuda nyuda: i Ahawàpu, i Hemàngu dàngu i Yendutungu, haàtu wunangu na pa-patunggungu ndumana na hanganji. Da ngara madaiha da pindu bokulu àmbu da-dunjaku-dunja da ngia padaida, nadu nyuda peku biana ba dambabu-nya na Paha la ngia padaida wàngu pa-ndulangu-da da tau Lewi hawiangu.

¹⁶La lodu nuna nyuda da-paloku hàlaya na hupu liina i Hanganji Yuhia ndumana ba mbabunya na Paha, hamanai da tanda maraku la ngia pawotu maraku.

¹⁷Pihu mbua lodu mandaina nggubulu-na na rayatu Ihirailu da maninja lai nu ba da mbabunya na Paha dàngu na Lodu Remi Roti nda patai wolungu.

¹⁸Na Paha tungu nu ndedi handàkangu-ma duna pahili mbabunya piti welingu ba ninyapa i Wunangu Hamuilu. Nda haàtu-mbu welingu la hanganji - hanganji ma-mangilu ma-handàkangu pambabu-nya na Paha hama tuna ba mbabunya

¹⁹la pa-hakambulu walu wàna nu na ndaungu pareta-na i Yuhia paraïna nyuna wiki nuna na hanganji dàngu da ratu, da tau Lewi, da tau Yahunda dàngu Ihirailu, hamanai na mangia-nya la Yeruhali.

²⁰Nahàla-ka i Hanganji Yuhia pa-paloku hàlaya ndumana na Umana i MIRI; i Neku hanganji Mehiru nairu ngàndiya na pambana la pa-pabera la Kàrakemihu la lihi Luku Epuràtu. I Yuhia na-pamukarungu pandebuku-ya,

²¹tàka i Neku na-pangàndi-nya langu i Yuhia, “Na pabera yiana nda na-jonggaru-akau nyumu, hanganji Yahunda! Nyungga hi kumai nda jiakau nyumua palawa-nggu, tàka jiaha da muhunggu duku, dàngu i Ala na ma-paràha-ngga duku, lu parenggangu pa-paluangu limamu wànangga. I Ala la ngabanggu nyunggaya, jia àmbu ndebuku-duya Nyuna napa Nyuna na-palàjaru-dukau,” wànanya.

²²Ba tuna i Yuhia na-patidungu palawa-nya. Nda nabihu-a patundu-nya jàka nggàra wàna i Ala la ngaruna i Hanganji Neku. Na-panjàda wikina i Yuhia hi nalua patama la pa-kangaburungu la ma-ndidaru la Manggindu.

²³Nu la pa-kangaburungu nggàna-nanyaka pana i Hanganji Yuhia. Hàla paràha-nanjaka da atana paluhu ngàndiya welingu la ngia pa-kangaburungu, nadu ba manua mandàkangu-mananya.

²⁴Dadendi-ya welingu la kareta-na hi da-paleli-nya la kareta hau na maninya lai nu, tunaka nu hi dangàndi-ya la Yeruhali. Lai nu meti-nanyaka hi datani-nya la pangia reti maràmba. Nggubulu-na na rayatu la Yahunda dàngu la Yeruhali hawina-danyaka ruku metina.

²⁵I Wunangu Yerimia na-lawiti-nya hau ludu hii padudurungu pahali-ya i Hanganji Yuhia. Lundu nàhu na ludu nuna pawàngu-mayapa la Ihirailu paraï da tau ludu, ka miniya ka kawini-yakai ba pangàda-nya na hawina-danya i Yuhia. Na ludu nuna pa-patamangu-mayaka la kaloka-da da ludu hii padudurungu.

²⁶Hawiangu da rukuna i Yuhia, na mbuha-nanya i MIRI, na manundu-na la uku - ukuna i MIRI,

²⁷na kababa-na mbuu ndàbana na ruku lurina weli mulangu lundu njàpuna, ni hàla-manjaka da pa-huratu la Mbuku Lii Ndai da Hanganji Ihirailu dàngu Yahunda.