Read Kambera 2 LII NDAI 4 Bible Online

2 LII NDAI 4 - Kambera bible

2 LII NDAI 4

¹I Hanganji Halomu na-paràhangu pa-pandoi hau ngia pawotu maraku parunggu, na nunjuna dàngu na ndàbaru-na da-kawàra hiwa metiru, tàka na janggana patu metiru paradua-na.

²Nyuna na-pandoi-mbu hau karaba kawori welingu la parunggu, na hukutu-na tuna nu: na manjolungu-na 2,2 metiru, na hukutu padua-na 4,4 metiru dàngu na weli winggiru-na 13,2 metiru.

³La halinggi winggiru-na la hambeli pa-mananda wànya huratu hapi ba dua ndalaru-da, palala pa-kariangu-ha dàngu nuna na karaba.

⁴Nuna na karaba pa-bànjalu-ya la pinu wunggu hakambulu dua ngiu hapi parunggu — tailuda da ma-hanggangu hu dia, tailuda hu luru, tailuda la patama lodu, dàngu tailuda la pahunga lodu.

⁵Na timbina na karaba 75 mili-metiru-na. Na hingina hama tuna hingi kaba waiya na ma-hangebalu la hambeli, tika pa-pahama na wàla mangàta ma-hanggebaru-ya. Nuna na karaba na ihina ràkangu 60.000 litaru.

⁶I Hanganji Halomu na-pandoi-mbu hakambulu mbàlu bokulu, lima mbuada da patuu la mbara luruna na Umana i MIRI, dàngu hi lima mbuada da patuu la mbara diana. Da karaba nuda jiaha da ngia pabaha-ha da kadipu - kadipu tolu banda kameti maraku patunu. Na wai la karaba bokulu pa-payemangu-ha da ngara ratu ba dabaha wikida.

⁷Na-pandoi-mbu hakambulu tandai palita àmahu rara tundunya na hada pambàda pakaka hahangu, dàngu hakambulu menja. Mbuu ndàbada da tandai palita dàngu da menja patuha daa la kuru bokulu la Umana i MIRI — lima la patuu kalai, dàngu lima la patuu kawana. Na-pandoi-mbu hangahu moku àmahu rara.

⁹I Hanganji Halomu na-pandoi-mbu talora mbara dalu ndumada da ngara ratu, dàngu hau talora la hambeli. Da rau pindu la pindu boku - pindu bokulu la manggawa dàmbu talora patapu wàngu parunggu-ha.

¹⁰Na karaba patuu la kabihu mbara luruna na Umana i MIRI pa-haritungu la pahunga-ya.

¹¹I Huràmu, na kapala-da da ngara mamàpi pa-karàmaku, na-pandoi kawalu, hakòpu, dàngu moku. Ka hàla-nanjaka pa-pandoi[4] hàlaha da pawàngu la Umana i MIRI pa-jàngapungu na paràndi-na lai Hanganji Halomu. Nuda da pawàngu ba wànda jia-duhaka: Dua mbungu andungu bokulu Dàmbu tubuku andungu mahama mokuha dapatuu la kapuka andungu Da lulu àmahu pa-jilungu la kapuka andungu Patu ngahu njalima parunggu da pa-wandalu kadua ndalaru-nja, la winggiru lulu àmahu pa-jilungu la nimbihu andungu Hakambulu kareta Hakambulu tobu robu bokulu Na karaba parunggu Hakambulu dua hapi parunggu mandema-ya na karaba Da kawalu, da hakòpu dàngu da ranggatu njàkapu I Huràmu na-pandoi-ha nuda mbuu ndàbada da pawàngu la Umana i MIRI welingu la parunggu dàngu pauda-ha hi lupa da-kajilaku. Na-pandoi-ha nuda mbuu ndàbada pa-jàngapu-nya na pareta-na i Hanganji Halomu.

¹⁷Na hanganji na-paràhangu pa-pandoi-ha nuda da malanja la ngia palala la manggawa Hukutu dàngu Harenda la Lolangu Yorundangu.

¹⁸Dira dangu-maha nuda da malanja, hi lupa nda ningu haàtu mapingu padiha-ha jàka pira kiluda da parunggu pawàngu.

¹⁹I Hanganji Halomu na-paràha-mbunja pa-pandoi pakakahu hangia - hangia welingu la àmahu rara ihi mbàngina ndumana na Umana i MIRI. Da pakakahu nuda jia-duhaka: Da ngia pawotu maraku Da menja roti pa-payemangu Mbuu ndàbada da tandai palita dàngu da palita-na welingu la àmahu rara ndai da pa-paroka la hangga Rowa Mahupu Matua, pa-jàngapu-nya na pa-pakaka hahangu Da pa-manandangu wàngu da ma-pahada wàla aingu Da palita Da ngepi wàla epi Da pa-paili wàngu humbu palita Da moku Da kawinga nduma dupa Da kawinga nduma wàla epi Mbuu ndàbada da pindu tama la Umana i MIRI dàngu da pindu Rowa Mahupu Matua patapu wàngu àmahu raraha.