Read Kambera 2 LII NDAI 5 Bible Online

2 LII NDAI 5 - Kambera bible

2 LII NDAI 5

¹Ba nahàla-ka i Hanganji Halomu pa-panjàpu-ya la pa-pahada-nya na Umana i MIRI, mbuu ndàbada da àmahu mabara marara, dàngu da malanja hawiangu da pa-maraku wàna i Ndautu na amana lai MIRI, na-pahàmu-ha la nggunda - nggundangu la Umana i MIRI.

²Tunaka nu i Hanganji Halomu na-paràha-nja mbuu ndàbada da ngora kabihu dàngu kalibaru la banjaru Ihirailu pamai la Yeruhali la pa-paleli-nya na Pàti Pa-ràndingu-na i MIRI welingu la Hiungu, paraingu-na i Ndautu,[5] ka ngàndiya la Umana i MIRI.

³Ka mai hàla-danyaka la lodu remi Maü Ma-paraungu.

⁴Ba da-pauhi ndàbaka da ma-pairungu, tàka da tau Lewi hi dadanda-nya na Pàti Pa-ràndingu,

⁵hi dangàndi-ya la Umana i MIRI. Na Maüna i MIRI dàngu mbuu ndàbada da pawàngu-ka lai nu da-paleli-mbunja paraï da ngara ratu dàngu da tau Lewi la Umana i MIRI.

⁶Tunaka nu i Hanganji Halomu dàngu nggubulu-na na rayatu Ihirailu hi da-pauhi la hangga Pàti Pa-ràndingu, hàla hi dangàndi maraku lai MIRI, dangu ailulu mbimbi dàngu hapi, hi lupa nda pataü-ha padiha-ha.

⁷Tunaka nu da ngara ratu hi dangàndi-ya na Pàti Pa-ràndingu la Umana i MIRI hi da-bànjalu-ya la lumbu kahala hada patau awangu la Rowa Mahupu Matua.

⁸Da ruu kàpada nuda da kahala hada da-tawàlahu palàmbaru-nya na pàti dàngu da ai dukuna.

⁹Da ai duku da-madita ailulu, hi lupa da hupuda peku itaha welingu la hangga Rowa Mahupu Matua, tàka nda peku ita-aha welingu la hambeli. (Lundu nàhu da ai nuda ni-manjapa lai nu.)

¹⁰Nu daa la Pàti Pa-ràndingu nda nggàra hau maningu, hinggilu-da da watu ba dua mbàlada. Da watu nuda i Muha-maka na mambàda patama-nja lai nu la Palindi Hinai, ba jiaya natura-na pa-njanjingu i MIRI dàngu na banjaru Ihirailu, nu ba la ngarangia-ha welingu la Mehiru hanggangu la Kanaàngu.

¹¹Mbuu ndàbada da ratu da maninja lai nu, welingu la nimbihu pamba, mbàda rimangu-madaka la pa-paloku-ya na lii nuna. Mbuu ndàbada da mini ludu dàngu da ma-katangu malingu pambabu wàngu la kabihu Lewi, nu i Ahawàpu, i Hemàngu dàngu i Yendutungu lupa nggubulu-na na kalibaru-da, wotu-mada-nyaka paki tera linangu. Da tau Lewi da-ndolaku la pahunga lodu ngia pawotu maraku ba dàngu katangu-da kahàba dàngu jungga. Da anguda nyuda ningu tau 120-ya na ratu na mahapii taropitu. Na lududa da mini ludu da-panggepi làngingu ba dalingu da taropitu, kahàba dàngu da malingu hawiangu. Yia-dahaka da lawiti lududa da paludu wàdanya i MIRI, “Wotunya i MIRI, ba nahàmu Nyuna. Na mbuhangu-na na-padaingu lundu nu - nu,” wàna. Ba jia-yaka na luhuda da ngara ratu welingu la Umana i MIRI, hi jia hulungu biana na handaraku ba ninya i MIRI nu la Uma hi nda peku pangala-ada-nyapa na lii lumungu.