Read Kambera 2 LII NDAI 6 Bible Online

2 LII NDAI 6 - Kambera bible

2 LII NDAI 6

¹Hàla hamayangu-nanyaka na Hanganji Halomu, “Dou MIRI, Nyumu mu-mbuhangu-mapa dumu pa-ngiangu la kapàta karumangu.

²Nàhu ku-pahada-nggau uma ma-mangarangu, ndumamu ngia pa-ngiangu-mu lundu nu - nu,” wàna.

³Nahàla-ka pa-hamayangu, na hanganji nambaili-nya mbuu ndàbana na rayatu na ma-ndolaku-na lai nu, hàla hi na-kamahi-nja kanyuru welingu lai Ala.

⁴Natungu liina, “I MIRI, àmangu mbàda ràndi-nanyaka na amanggu i Ndautu, ‘Piti welingu ba ku-karia-nya na banjaru-nggu paluhu welingu la Mehiru lundu tàka la lodu nàhu, la tana Ihirailu nda ningu-a hau paraingu papindi-nggu ngia pawulu uma ngia pa-lumungu-ngga, dàngu nda ningumbu haàtu papindi-nggu matanggu iru ngàndiya na banjaru-nggu na Ihirailu. Tàka nàhu kupindi-yaka la Yeruhali ka ngia palumu-ngga Nyungga. Tàka nyumu Ndautu, pindinggu-nggauka la pa-pareta-ya na banjaru-nggu,’ wàna. Pa-wotungu-ya i MIRI, Ala Ihirailu na mambàda patutu-nya na ràndina!” wàna.

⁷Na-pangala-nya na liina i Halomu, “Na amanggu i Ndautu mbàda pakaka-nanyaka la pa-pahada-nya na uma ngia palumu-nya i MIRI, Ala Ihirailu.

⁸Tàka i MIRI napanii-nya nyuna, ‘Na pawuku-mu nahàmu.

⁹Tàka, nda nyumua, na anamu-pa duna napa na ma-pahada-nya na umanggu,’ wàna.

¹⁰Nàhu i MIRI patutu-nanyaka na paràndi-na. Nyunggaka patuna hanganji Ihirailu, mahilu-ya na amanggu, tàka nyungga mbàda pahada-nggunyaka na uma ngia palumu-nya i MIRI, Ala Ihirailu.

¹¹Daa la Umana i MIRI mbàda tu-nggunyaka pangia-na na Pàti Pa-ràndingu, ngia pa-paihi-nja da watu pa-ràndingu-na i MIRI dàngu na banjaru Ihirailu,” wàna.

¹²I Halomu mbàda pandoi-naka nggala parunggu la padua talora-na na Umana i MIRI. Na nunjuna dàngu na ndàbaru-na 2,2 metiru-na, tàka na janggana 1,3 metiru-na. La hangga rayatu na mamàtu, i Halomu nahei dita la nggala, hi na-ndolaku hangganya na ngia pawotu maraku. Jia hi naita hàlaya tau. Tunaka nu patika-nanyaka hi na-pandema-nja da limana, hi na-hamayangu,

¹⁴“Dou MIRI, Ala Ihirailu! La awangu jàka ndia la tanakai nda ningu mahama-nggau Nyumu! Nyumu mu-patutu-nya na paràndi-mu dàngu bau pa-itangu mbuha-munya na banjaru-mu na ma-tuturu dàngu na ma-manundu weli etingu lai Nyumu.

¹⁵Nyumu mu-patutu-nya na paràndi-mu la amanggu i Ndautu. Nuna na paràndi-mu mbàda pahàra-munyaka la lodu nàhu.

¹⁶Nyumu mbàda ràndi-munyaka na amanggu, nu da wàlana jàka langata - tàka-madu ba da-manundu la Ukumu hama tuna nyuna, napa nuangu-manaka duna ba ningu wàla wuana ma-hanganji la Ihirailu. Nàhu, MIRI Ala Ihirailu, ku-kamahi-nggau ka pekuna mbuu ndàbana na paràndi-mu la amanggu, i Ndautu atamu, kau patutu-mbunya.

¹⁸Tàka dou Ala, tuba-manaka ba peku ngiangu-mu la pinu tana yiana la honga tau pinu tana? Na awangu nggubulu-na ndedi na-jàmungu-mbu na lerangu-na ndumamu Nyumu, ka jia-ama-yaka na uma ngia pa-lumungu yiana na pawulu-nggu!

¹⁹Ou MIRI, Alanggu, nyungga ata-mungga! Ba tuna patingi àrunya na hamayangu-nggu, dàngu kau kataku àruya na pa-kamahi-nggu.

²⁰Màla àru rudungu lodu kau mangganya yiana na uma na pambàda pindimu ka ngia pa-lumungu lai Nyumuya. Jiaduya, màla àruki welingu la pangia-mu la awangu kau pa-tingingu dàngu kau jàma àrungga dàngu na banjaru Ihirailu, nu na banjaru-mu, jàka ma-hurungu la uma yiana dàngu ba ma-hamayangu lai Nyumu.

²²Era ningu haàtu pa-panjala ba nanjala la tau haàtu dàngu ka ngàndiya la ngia pawotu maraku la umamu yiana la pa-harangu ba nda tuba njalana,

²³dou MIRI, màla àru kau pa-tingingu la awangu dàngu kau botaya na palakara-da da atamu yiada. Kau hukunya na manjala dàngu kau pahàla-ya na manda njala.

²⁴Jàka era pakàku-nanya muhuna na banjaru-mu na Ihirailu ruku njalada, hàla ka da peka halaera dàngu ka da-maraku-nggau Nyumu ba MIRI-kau, hàla ka damai la umamu yiana hi da-hamayangu pa-kamahi-nggau la pajàma-nja da njalada,

²⁵màla àru kau patingi-nja nyuda welingu la awangu. Màla àruki kau jàmanja da njalada na banjaru-mu yiana dàngu kau karia belinja la tana na pambàda wua-munja nyuda dàngu da boku la mangilu-da.

²⁶Jàka era njalana na banjaru-mu lai Nyumu, tàka hiu hukunja wàngu nda pa-purungu-mu urangu, hàla ka da-pambelingu welingu la njalada dàngu ka da-maraku-nggau Nyumu ba MIRI-kau, hàla hi da-hurungu la uma lumungu yiana, hi da-hamayangu lai Nyumu,

²⁷dou MIRI la awangu, patingi àrunja. Dàngu kau jàma àrunja da njalada da atamu na banjaru Ihirailu. Ajaru àruha ka dawànya na ma-deningu. Hàlaka nu, dou MIRI kau papuru àrunya na urangu la tanamu yiana, na tana na pawua-munya na banjaru-mu la pamàngi-nya lundu nu - nu.

²⁸Era tunanya rimbangu na tana yiana, jàka ndia tàparu, jàka ndia na ruhada da pa-tondungu paraï ngilu mbana, mabohu jàka ndia da kabala, jàka ndia era làndahu-nanya muhu na banjaru-mu, jàka ndia na tungu na panyaki,

²⁹màla àruki kau patingi-nya na hamayangu-da. Jàka ningu haàtu welingu la banjaru-mu na Ihirailu wàngu handuka etina ba na-hamaya-nggamu ba na-pandemangu limana hanggangu la Umamu yiana,

³⁰màla àru welingu la pangia-mu la awangu kau patingi-nja dàngu kau jàmanja. Jiakau Nyumu-a matanda-ya na ihi etina na tau. Jia ba tuna palua-nyawa lima nimbihu-na na tau hama tudana da pawunda - pawunda-na.

³¹ka pekuna na banjaru-mu ba na-mangàdatu-nggau dàngu ba na-patundu mànunggau Nyumu la ngala ngiangu-da la tana na pawua-munja da boku la mangilu-ma.

³²Era ningu tau hangadangu la tana mamarau ka narongu-ya na bunjuku-mu dàngu na kodi makamu, dàngu ba naingu-mana dumu bau rimangu la pa-pandulangu, hàla ka namai la umamu yiana la pa-hamayangu lai Nyumu,

³³màla àruki welingu la pangia-mu la awangu kau patingi-nya na hamayangu-na dàngu kau patutu-nya na pakarai-na. Ba tuna nu mbuu ndàbana na banjaru la pinu tana nggubulu-na datanda-kau dàngu da-karadaku-nggau Nyumu hama tuna na banjaru-mu na Ihirailu. Napa dapinya ba ngia pa-lumungu lai Nyumuya yiana na uma na pawulu-nggu.

³⁴Era wua-munya pareta na banjaru-mu palua pa-pabera lawanya na muhu, hàla jiapa ka nda nggiha na ngia paninja, jàka da-tàngaru hanggangu la paraingu papindi-mu yiana dàngu jàka da-hamayangu hanggangu la uma na pawulu-nggu yiana ndumamu Nyumu,

³⁵màla àruki la awangu Nyumu kau patingi-nya na hamayangu-da, dàngu kau wuanja patalu wàngu nyuda.

³⁶Jàka natu manjala na banjaru-mu — tubana ba nda ningua haàtu manda njala — hàla paraï ruku hànggamu hiu pulinja nyuda la pakàku la muhu dàngu hi ngàndiha pa-tanawangu la tana mamarau jàka ndia ma-mareni,

³⁷màla àruki kau tanaü-ya na hamayangu-da. Tàkaka la tana lai nu jàka era dunjaku-danja da njalada, hi da-hamaya-nggau Nyumu ba dàngu pekada njala ba dawunda ma-akatu, tanaü-àru-kiya na hamayangu-da, ou MIRI.

³⁸Napa la tana nuna jàka weli etida pa-dunjaku-nja da njalada, tàka hi da-hamaya-nggau Nyumu ba dàngu hanggangu-da la tana yiana na pawua-munja da kawunga bokuma, hangganya yiana na paraingu papindi-mu dàngu na uma ngia pa-lumungu na pambàda wulunggu-nggau,

³⁹ka màla àru welingu la pangia-mu la awangu kau patingi-nya na hamayangu-da dàngu kau milanja eti. Jàma àrunja mbuu ndàbada da njalana na banjaru-mu.

⁴⁰Nàhu, dou Alanggu, panau àru-kama dàngu patingi àrunya na hamayangu-ma na pa-patàka-manggau welingu la pa-ngiangu yiana.

⁴¹Hadangu àruwa nàhu, dou MIRI Ala! Kau hada karia-nya na Pàti Pa-ràndingu na ninu maüna na mbihamu, màta àruwa kau tamanya yiana na umamu dàngu kau ngiangu lai yiahu lundu nu - nu. Pa-kanyuru hàlanja da paràma-da da ratu - ratumu, dàngu màla àruki nggubulu-na na banjaru-mu ka da-paohangu nadu bau hàmudu lai nyuda.

⁴²Dou MIRI Ala, àmbu tulaku-duya na hamayangu-na na hanganji na pambàda pindimu yiana. Namuya na mbuha-munya i Ndautu na atamu,” wàna.