Read Kambera 2 LII NDAI 7 Bible Online

2 LII NDAI 7 - Kambera bible

2 LII NDAI 7

¹Ba nahàla-ka pa-hamayangu na Hanganji Halomu, puru-nanyaka na epi welingu la awangu na matunu hàlaha da kameti maraku da pawotu-nya i MIRI. Hàla na handaraku ba ninya i MIRI nahibu-nya nuna na Umana i MIRI,

²hi lupa nda peku tama-danya paraï da ratu ba hapajia-ha.

³Ba naita-yaka paraïna rayatu Ihirailu ba napuru na epi welingu la awangu dàngu na handaraku ba ninya i MIRI na mahibu-nya nuna na Umana i MIRI, ka panggubu-danyaka la tana ba da-maràbaku hi dawotu-nya i Ala, nadu ba nahàmu dàngu ba na-panamungu lundu nu - nu.

⁴Hàlaka patuna nu i Hanganji Halomu dàngu mbuu ndàbana na tau na ma-pauhi lai nu dawotu-nya kameti maraku i MIRI.

⁵Nduma kameti maraku papeku i Halomu nawotu tanda maraku 22.000 hapi dàngu 120.000 mbimbi. Tuna nuduka na hanganji dàngu mbuu ndàbana na rayatu ba nawunda lii la pawotu-ya lai MIRI nu na uma lumungu.

⁶Da ngara ratu ndolaku-danyaka la pangia-da; da-kawàra pa-papangu dàngu da tau Lewi da maludu wotunya i MIRI ba dawàngu malingu pambabu wàngu da pa-pandoi-na i Hanganji Ndautu, ba dàngu ludu-danya na ludu “Na Pa-namungu-na Lundu nu - nu!” pa-jàngapu-nya na hupu liina i Ndautu. Da ngara ratu dapini-ha da taropitu ba dàngu ndolaku hàlana na rayatu.

⁷Hàla daa na padua talora la hanamba uma lumungu na-huharu-nya lai MIRI paraïna i Halomu. Tunaka nu hi nawotu lai nu kameti maraku patunu, tanda maraku uhu nggàndumu dàngu aparu banda nduma kameti maraku papeku. Nawotu-ha lai nu mbuu ndàbada, nadu ba lalu kuduna na ngia pawotu maraku parunggu na pambàda pandoi-na ndumada nuda da tanda maraku mbuu ndàbada.

⁸I Halomu dàngu na banjaru Ihirailu nggubulu-na da-paloku-ya na ngera mbabunya na Lodu Remi Maü Ma-paraungu pihu mbua lodu mandaina. Nadangu ailulu na tau na ma-pauhi la mbabu nuna. Da-pamaingu-ha welingu la mamarau hama tuna la Anda Hamàtu mbara dia lupa tàka la padira Mehiru mbara luru.

⁹Pihu mbua lodu mandaina ba da-pauhi pa-paloku-ya na lii katua-ya na ngia pawotu maraku lai MIRI, tunaka nu hili pihu mbua lodui la paremi-nya na Lodu Remi Maü Ma-paraungu. La lodu malamiri dehina paloku-danyaka na mbabu pa-panjàpu wàdanya

¹⁰tàka la hadangu harii, la tànggalu dua kambulu tailu wulangu pihu, paràha-nanjaka paraïna i Halomu nuda da tau pabeli. Da-nggaüru wànya rukuna mbuu ndàbana na mahàmu na pawunda-na i MIRI la banjaru Ihirailu na banjaru-na, lai Ndautu dàngu lai Halomu.

¹¹Ba nahàla-ka i Halomu pa-palundu hàlanya na ruku pahada-nya na Umana i MIRI dàngu na uma hanganji pa-jàngapu-nya na pambàda pakaka hahana,

¹²i MIRI nahili pa-wuwangu wikina lai Halomu la rudungu. I MIRI napanii, “Na hamayangu-mu kurongu-yaka, dàngu kuyema-yaka ni na uma ba pangia pa-pahinggilu-ya ka ngia pawotu kameti maraku-ya lai Nyungga.

¹³Era nda papuru-nggunya na urangu jàka ndia era paràha-nggunja da kabala pa-pambuta-ha da ihi tanami jàka ndiakai era patàka-nggunya na panyaki pa-nggàbalungu la banjaru-nggu,

¹⁴hàla ka dawànya na tamunggu ba da-pawawangu wikida, ka da-hamayangu lai Nyungga ka da-pambelingu welingu la njalada ka lupa da-dunjaku-nja da pawunda-da da ma-akatu, napa Nyungga welingu la awangu ku-patingi-manja duku ba da-hamayangu. Napa kujàma-manja duku da njalada hi ku-pambokaru beliya na tanada.

¹⁵Nyungga duku napa hamata pangala-manggunya na umanggu yiana dàngu rimangu-manggunya la pa-patingi-nja da hamayangu da pawotu-da welingu la pa-ngiangu yiana.

¹⁶Napa kuwunda-ha nuda mbuu ndàbada nadu na pa-ngiangu yiana ba papindi-manggu-nyaka dàngu ba pa-pahinggilu-manggu-nyaka patuya ngia pa-lumungu lai Nyungga lundu nu - nu. Napa kupanau-maya dàngu ku-tanara-maya duku jiapa nda pirangu.

¹⁷Nyumu, jàka hama tumana na amamu i Ndautu, la paluri kikunya na pambuha-nggu dàngu bau manundu la uku - ukunggu dàngu bau wànya mbuu ndàbana na pa-pareta-nggu lai nyumu,

¹⁸napa ku-patutu-manya duku na paràndi-nggu la amamu i Ndautu, nu ba naingu-mana ba ningu haàtu welingu la wàlana na ma-hanganji la Ihirailu.

¹⁹Tàka nyumu dàngu na rayatu-mu jàka mipangga-ha da uku dàngu da pareta-nggu, dàngu bai lumunja da pa-alangu,

²⁰napa Nyungga ku-paluhu-kai welingu la tana na pambàda wuanggu-nggai. Nyungga kulaku wàru-mbunya yiana na uma na pambàda pamàndu-nggu pangia palumu-ngga Nyungga. La nggi - nggi napa pa-paakangu-ya dàngu pa-rikingu-ya na uma yiana.

²¹Yiana na uma lumungu nàhu kanjupu pa-malilingu-ya, tàka napa la rehi nu nimbihu-da da tau da mali ningu lai nu da-hangàtaru ba daita-ya. Napa dapanii, ‘Nggiki-naka i MIRI hi tunanya nu yiana na tana dàngu yiana na uma?’ hi wàda wàngu.

²²Napa nahema na tau, ‘Rukuna ba da-dunjaku-dunya i MIRI, na Alada nyuda na mambàda karia-nja da boku la mangilu-da paluhu welingu la Mehiru. Nyuda da-marubuku-nja dàngu da-paràndingu pa-tuturu-nja da pa-alangu. Nuna-duyaka hi kiri patàka-nanya yiana na ura pàda i MIRI lai nyuda!’ ” wàda.