Read Kambera 2 LII NDAI 8 Bible Online

2 LII NDAI 8 - Kambera bible

2 LII NDAI 8

¹I Halomu nawulu-ya na Umana i MIRI dàngu na uma hanganji la dalu dua kambulu ndaungu.

²Da parai - paraingu da pawua-na i Hanganji Hiràmu lai nyuna na-pahada belinja, hàla hi na-paràha-nja da tau Ihirailu pa-ndàdiku lai nu.

³Nawàhi-ya na ngabana la Hamàtu dàngu la Homba

⁴dàngu na-pakapingatu-ya na paraingu Tàtumuru la maràda telangu, hàla hi na-pahada belinja mbuu ndàbada da pangia pakahau-nja da pangangu pa-payema hahangu la Hamàtu.

⁵Na paraingu Mbetu-Horungu Mbara Dia dàngu Mbetu-Horungu Mbara Luru na-pahada belinja hi natuha paraingu ma-pakangelingu dàngu pindu bokulu maningu kahorungu-na.

⁶Na-pahada beli-mbunya na paraingu Mbaalàtu, dàngu mbuu ndàbada da paraingu ngia pakahau-nja da pangangu pa-payema hahangu, hamanai da paraingu ngia pa-pakàhangu kareta pabera dàngu njarada. Mbuu ndàbada da pa-pakaka hahana la pa-pahadangu la Yeruhali, la Limbanongu dàngu la nggubulu ngaba pa-kuaha-na, na-palaku hàla-mahaka.

⁷Mbuu ndàbada da wàla tau Kanaàngu da panda pameti tau Ihirailu nu ba da-mandapu-nya nuna na tana, nawari hàlaha paraïna i Halomu la paràma ma-pahàni. Nyuda jia-duhaka da tau Heti, Amori, Perihu, Hewi dàngu Yembuhu. Lundu nàhu da wàla wuada jia-mahapa da maata.

⁹Na tau Ihirailu nda na-paràha-anja la paràma ma-pahàni; nyuda na-panduma-nja la pa-panjuri, parawira, maliku uru kareta pabera dàngu tanatara li la njara.

¹⁰Tau dua ngahu lima kambulu-ha da panggawi da pa-wuangu nduma la papinja da tau da maràma la paràma ma-pahàni la màtu - màtu paroyiku ma-pandoi-ya na tana.

¹¹I Halomu na-paleli-nya na papaha-na, nu na ana hanganji Mehiru, welingu la Paraingu-na i Ndautu la uma pawulu panduma-nanya. Nadu, “Na papaha-nggu àmbu na-ngiangu-du la uma hanganji-na i Ndautu, na hanganji Ihirailu, nadu mbuu ndàbada da pa-ngiangu ngia pa-bànjalu-ya na Pàti Pa-ràndingu ba pangia matua-ya,” wàna.

¹²I Halomu nawotu kameti maraku patunu lai MIRI la pinu ngia pawotu maraku na pa-pahada-na la hanamba Umana i MIRI.

¹³Nuda da kameti maraku nawotu-ha tundunya na ukuna i Muha nduma nimbihu-da da lodu remi: lodu Hangahu, lodu remi Wulangu Bidi, dàngu da matailu-da da lodu remi nimbihu ndaungu: nu na lodu remi Roti nda Patai Wolungu, lodu remi Muti, dàngu lodu remi Maü Ma-paraungu.

¹⁴Pa-jàngapu-nja da kalara - kalaratu-na i Ndautu amana, i Halomu na-aturu-nja patanggu-da hau lodu - hau lodu da ngara ratu dàngu tau Lewi da maludu wotunya i MIRI dàngu da ma-pambapa dànja da ngara ratu la pa-paloku-ya na paràma ba wunda lii lumungu. Dàngumbu da ngara madaiya na Umana i MIRI na-kawàri-ha la kaliba - kalibaru pa-patunggu-nja da pindu boku - pindu bokulu, pajàngapu-nya na ngerangu welingu lai Ndautu atana i Ala.

¹⁵Mbuu ndàbada da papanau wàna i Ndautu la ngara ratu dàngu tau Lewi da ngerada da nggundangu, hamanai da ngerada hawiangu-ka, dakiku pawingu-manja.

¹⁶Ka palundu-nanyaka na paroyiku pa-hadangu uma na pa-pakaka hahana i Halomu. Nggubulu-na na paràma, piti welingu na kawunga bànjalu watu uma lundu palundu-nya na Umana i MIRI, paràma pa-hàmungu-maya.

¹⁷Hàlaka patuna nu i Halomu lua-nanyaka la Ehiungu-Nggembiru dàngu la Elutu, la parai - paraingu ngia pa-palabungu la hingi wara la Njobu wai la Akamba tana Endumu.

¹⁸I Hanganji Hiràmu na-pangàndi-nja da kapalu da pa-palaku-da paraï da tau lai nyuna wiki pa-kariangu tau kapalu ma-ndàmangu. Da-paliru pa-kariangu la Opiru dàngu da tau lai Halomu, ba dalua papiti 15.000 kilu àmahu rara welingu lai nu hi dangàndi-ha lai Halomu.