Read Kambera 2 LII NDAI 9 Bible Online

2 LII NDAI 9 - Kambera bible

2 LII NDAI 9

¹Na hanganji kawini tana Heimba narongu-yaka na bunjuku-na i Halomu. Ka maidu-nanyaka la Yeruhali la pakama-nya i Halomu ba nawàngu pa-paàra-nya ma-kalutu - kalutu. Nu ba namai kanjupu danguha da tau ma-karia-nya dàngu ota da ma-ngejaru ngàndiha da pa-pabukungu: da rungu, da watu mata tawuru, dàngu dangu ailulu àmahu rara. Hàla ba da-pahàmburu-ka dàngu i Halomu, tungu-nanyaka lii na hanganji kawini ba na-paàra hàlanya na ràka pa-kanandi-na.

²Mbuu ndàbada da paàrangu nahema hàla-maha duna i Halomu, nda ningua hau duna ma-kalutu lai nyuna.

³Na hanganji kawini hakahii wiki-mana-nyaka jàka nggikina na manggàna-na i Halomu. Naita-ya na uma hanganji pawulu-na i Halomu,

⁴naita-ha da huri ràmada da panggawi uma hanganji, dàngu da pakida ba jia ndàba-maha dàngu da umada. Naita-ha da pangangu pa-payemangu, dàngu da pakida da ma-paloku da ma-paloku-ya na mbabu; naita-mbuha da kameti maraku pawotu-na i Halomu la Umana i MIRI. Mbuu ndàbada nuda na-hangàtaru-nja dàngu na-maratangu-nja paraïna hanganji kawini tana Heimba.

⁵Ka panii dàna-nyaka i Hanganji Halomu, “Mbuu ndàbana na parongu-nggu la tana la parainggu na rukumu nyumu dàngu na pingu na manggàna-mu, langatà - tàka na deningu!

⁶Nda kuwai-aya làti la mangilu-na, tàka ba ku-lundungu-ka, ba kuita mata wikinggu-nyaka mbuu ndàbana, hinaka hi kupi pa-ihiku-nya. Langatàka mbuu ndàbada da parongu-nggu ndedi na-paradua-mbuya jàka nggàraya na paita-nggu nàhu. Làngatàka na manggàna-mu dàngu na wulumu Umbu narihi bokulu-ipa welingu na parongu-nggu.

⁷Wangu-madaka duda da panggawi da malumu-nggau dàngu da maràma mànu lai nyumu Umbu hi peku ronguda welingu lai nyumu wiki mbuu ndàbada da lii pa-pekangu da pa-manggàna wàngu!

⁸Pa-wotungu-ya i MIRI, na Alamu Umbu! Ba nawotu-kauka nyumu pa-hanganji la pa-pareta wànya na tamuna Nyuna, pa-itangu-mana-nyaka ba hàmu nda ukuya lai nyumu. Ba ruku namu-nanya na banjaru Ihirailu dàngu ba nawuku-ya ka daingu ninja, jia-duyaka hi nawotu-kau nyumu pa-hanganji lai nyuda, ka peku pa-ndolaku-munya na uku dàngu na ma-deningu,” wàna.

⁹Tunaka nu na hanganji kawini Heimba hi na-pakata-nya i Halomu da pawotu - pawotu da pangàndi-na, nu ba 4000 kilu rihida da àmahu rara dàngu ba hau daa bia-daka da watu mata tawuru hi jiaha da rungu. Nda nahili ngalangu-apa i Halomu rungu hàmu tungu nu, mahama-nja da pawua-na na hanganji kawini Heimba lai nyuna. (

¹⁰Da tauna i Hanganji Hiràmu dàngu da tauna i Hanganji Halomu da mangàndi àmahu rara welingu la Opiru lai Halomu, dangàndi-mbu watu mata tawuru dàngu ai nitu.

¹¹Da ai nuda jia-duhaka da patuna panongu i Halomu la Umana i MIRI dàngu la uma hanganji-na, dàngumbu na-pandoi-ha jungga dàngu jungga lamba ndumada da kanguhuru maludu. Ndedi handàkangu paningu matungu nu la tana Yahunda.)

¹²Hinggilu-da da himbalu-da da pawotu da pakàli wàna i Halomu, nawua-mbunya na hanganji kawini welingu la tana Heimba mbuu ndàbada da pakarai-na. Tunaka nu kabeli-nanyaka duna na hanganji kawini la tanana dàngu mbuu ndàbada da karia-na.

¹³Nimbihu ndaungu i Hanganji Halomu ba na-ngalangu tika 23.000 kilu àmahu rara,

¹⁴ndedi padiha-ha da hilu katiku-da da ngara tau danggangu. Ba hapajia-ha da hanganji Arapu dàngu da nggumbunuru Ihirailu dawua-mbunya àmahu rara dàngu àmahu bara.

¹⁵I Halomu na-pandoi 200-da da temi bokulu welingu la àmahu rara patuku. Da àmahu rara pawàngu nduma nimbihu temingu ràkangu pihu mbua kiluda.

¹⁶Na-pandoi-mbu 300 temingu marihi màrahu. Da àmahu rara pawàngu nduma nimbihu-da nuda da temi kudu ràkangu tailu kiluda, mbuu ndàbada àmahu rara patuku-ha. Nuda da temingu natuha la Rowa Omangu Limbanongu[6] ba wàdanya.

¹⁷Na hanganji na-pandoi-mbu hau kanjàka hanganji ma-bokulu na pa-pandoi welingu la nggedingu dàngu hi pa-mananda wànya àmahu rara ihi mbàngina.

¹⁸Na kanjàka nuna ningu limana dàngu la hapapa - hapapa-na ningu kahala hada hingana. Nuna na kanjàka ningumbu ba nomuda da ana nggàjina, dàngu hau lata wihi patapu wàngu àmahu rara. Nu na lata wihi na-panuangu dàngu na kanjaka-na.

¹⁹La hupuda nu da ana nggàji nimbihu-da la kalai la kawada ninguma kahala hada hinga — mbuu ndàbada hakambulu dàmbuda. Ndedi ningu handàkangu ka ningu kanjàka matungu nu, jiapa la nggi hanganji-ya.

²⁰Mbuu ndàbada da paunu wàna i Halomu pa-pandoi welingu la àmahu rara juaha dàngu mbuu ndàbada da pawàngu la Rowa Utangu Limbanongu pa-pandoi welingu la àmahu rara ihi mbàngi-naha. Ba ngaru-napa i Halomu da àmahu bara nda ningu-a wilida.

²¹I Halomu ningu kapalu bokulu danguna da ma-palirungu la libu muru nggailaru dàngu da kapalu-na i Hanganji Hiràmu. Tailu mbua ndaungu handàkangu nuda da kapalu ba dabeli ngàndi àmahu marara, mabara, nggedingu, buti dàngu manu maràku.

²²I Hanganji Halomu narihi na wuluna, narihi na manggàna-na welingu la nggi hanganji bia la pinu tana.

²³Mbuu ndàbada da hanganji da-rinjungu hàla pamai lai Halomu parongu lii panaungu ma-tanjiku na pawua-na i Ala lai nyuna.

²⁴Nimbihu-da nyuda, nga - ngàndi-madanya pawotu-da lai Halomu. Dangàndi malanja àmahu marara, mabara, ngaü, madàka, rungu, njara dàngu mbanggalu. Tuna numa nimbihu ndaungu.

²⁵I Hanganji Halomu ningu 4000-da da oka njara dàngu kareta-da. Da njara pabera-na ningu 12.000 ngiuda. Hawiangu natuha la Yeruhali, tàka da rihida natuha la parai - paraingu ngia pa-pakàhangu kareta pabera-na.

²⁶Nyuna na-kuaha ndàbaha da hanganji la manggawa ngaba Luku Epuràtu lupa la tana Pilitingu dàngu la padira Mehiru.

²⁷Nu la rehi pareta-na i Halomu, la Yeruhali-ma duna da àmahu bara beri hama tu-ma-ana na watu, tàka da ai kajuu Limbanongu kanjupu danguha hama tuna na ai kapilitu.

²⁸I Halomu na-patamangu njara welingu la Mehiru dàngu welingu la hau tana - hau tana.

²⁹Hawiangu na rukuna i Halomu piti weli mulangu lundu hupu njàpuna, mbàda ni-manyaka la Mbuku Lii Ndaina i Wunangu Natàngu dàngu la Mbuku Lii Pa-wunangu-na i Ahia tau Hilu, dàngu la Mbuku Lii Pabowangu-ya i Wunangu Indu, na mawotu-mbuya na ruku pareta-na i Yerumbiamu, hanganji Ihirailu.

³⁰Patu kambulu ndauna i Halomu ba na pareta la Yeruhali dàngu la nggubulu Ihirailu.

³¹Tunaka nu meti-nanyaka hi taninya la Paraingu-na i Ndautu. Hàlaka i Rehambiamu anana, nyunaka na mahilu-ya la pa-hanganji.