Read Kambera EHIRA 10 Bible Online

EHIRA 10 - Kambera bible

EHIRA 10

¹Ba talànga hamayangu pa-kariangu hiina dàngu pekana njala i Ehira la hanamba Umana i MIRI, dira danguya na tau Ihirailu mamai pa-pauhi, mini kawini dàngu anakeda. Danggili-nggunya pa-kariangu hii kaladaku-da.

²Tunaka nu, i Hakanya anana i Yahialu welingu la kaloka uma Elàmu napanii dànya i Ehira, “Njala-mama-nyaka lai MIRI ba ma-kanoma kawini tau nàmu. Jiapa-kai ba tuna nu ningupa pa-monungu ndumana na tau Ihirailu.

³Màlawa ka ta-harangu la hanggana i Ala ba wàngga ndàba-ndahaka nuda da kawini dàngu da ana-daka. Kikunya na panaungu-mu wàmaka dàngu da panaungu-da da tau hawiangu da ma-pawili-nya na pareta-na i Ala. Tuturu-nya na Ukuna i Ala wàmaka.

⁴Nyumuka bàdi ma-kukutungu. Nyuma duma, ka tandula pahàmu-nya wàmanggau. Kukutu pa-langatàkangu-ma lundu nanjàpu,” wàna.

⁵Pa-kiringu-nanyaka i Ehira pa-kukutungu. Na-paràha-nja pa-harangu da ngora ratu dàngu da tau Lewi dàngu da tau Ihirailu hawiangu la panunju-ya na lii kamahingu-na i Hakanya.

⁶Ba dahàla-ka pa-harangu, hadangu-nanyaka i Ehira welingu la hanamba Umana i MIRI hi natama la pangia-na i Yuhanàngu anana i Eliyahipu hi natodu lai nu.[16] Nda nabihu-a pangangu pa-ngunungu paraï pa-hawina ba na-pangàda-nya na pawunda-da da tau tanawangu.

⁷Tunaka nu hi pakada-nya na lii pa-bobaru la nggubulu Yeruhali dàngu Yahunda nduma mbuu ndàbana na mabeli welingu la tanawangu, ka pauhi la Yeruhali.

⁸Jàka nggamuya na manda mai la tailu mbua lodu, napa pawàhi-ha mbuu ndàba da manguna, tàka nyuna nda padiha-ayapa la panggolu. Datuu tanda limada nu la lii pa-bobaru da ma-pangora-ka.

⁹La hambeli tailu mbua lodu, la tànggalu dua kambulu, la wulangu hiwa, mbuu ndàbana na mini na ma-ndàdiku la ngabana la Yahunda dàngu la Mbanyamingu damai la Yeruhali hi da-pauhi la hanamba Umana i MIRI. La rehi nu dira kawalu-ya na urangu. Ta - tàtana mbuu ndàbana na tau paraï pa-maringu dàngu paraï pa-karàngi na pauhi.

¹⁰Ka ndolaku-nanyaka i Ehira hi napanii dànja, “Nyimi mbutami mbàda wunda-mika manjala dàngu hi bonjaya na njala la Ihirailu bai kanoma kawini tau nàmu.

¹¹Ba tuna, pekawa njalami lai MIRI, Ala na pa-rubuku-da da bokunda la mangilu, dàngu wunda-yawa na pahàmu eti wàna. Wiliru-nya na tau nàmu na ma-ngiangu la tananda dàngu wàngga-hawa da papaha-mi da tau nàmu,” wànanja.

¹²Hema pa-kodungu-danyaka da tau, “Nunju-manyaka na panaungu-mu,” wàda.

¹³Hàlaka hi dahili panii, “Na tau na maninya yiahu dira danguya, tàka hi dira kawalu-ya na urangu. Nda ma-torungu-a pa-ndolaku tuma yia la hambeli. Tàka na lii yiana nda peku panjàpu mema-aya la hau dàmbu lodu, ba dira danguma-kama madili-ya na njala yiana.

¹⁴Màtawa da liku uruma ka da-ndàdiku la Yeruhali papanii wànya yiana. Tàka da mani - ningu papaha tau nàmu la paraida ka damaiha la rehi pa-kawuku, karia-da da liku uru dàngu da hakimu la parai wikida. Tuna nuka bàdi hi nda nahili hànggada i Ala rukuna yiana,” hi wàda.

¹⁵Nda haàtu-a matuu kareuku-na pa-pandia-ya na pawuku, hinggilu-na i Yunatàngu anana i Ahaïlu dàngu i Yaheya anana i Tikuwa, dapalai karia-nja paraï da tau madua da tau Lewi, i Mahulàmu dàngu i Hambitaï.

¹⁶Tàka da tau da mabeli welingu la tanawangu pa-daingu-madanya la pa-pahàra-nya nuna na pawuku, tuu-dunaka i Ratu Ehira hi napindi[17]-ha da manda pirada da tau la njonga ngora banjaru, hi natuha da tamuda la huratu. La tànggalu hau wulangu hakambulu pa-kiringu-danyaka pa-kanuturu-ya na rukuna yiana.

¹⁷La tailu mbua wulangu ma-pandàkingu hàla-danyaka pa-kanuturu-ha mbuu ndàbada da mini da ma-kanoma kawini tau nàmu.

¹⁸Yiana-ya na huratu-da da tau da-maningu papaha tau nàmu: Da ratu, pa-tulihu-ha dàngu kalibaru-da: Na kalibaru Yehua dàngu da angu dedida, da anana i Yuhandàku: i Maaheya, i Eliyehiru, i Yaripu dàngu i Nggandalia.

¹⁹Nyuda danjanji-ya pawàru-nja da papaha-da, dàngu la pawotu maraku heu mbimbi bumbu nduma kameti maraku jàmangu njalada.

²⁰Kalibaru Imiru: i Hanani dàngu i Hambanja.

²¹Kalibaru Harimu: i Maaheya, i Elia, i Hamaya, i Yahialu dàngu i Uhia.

²²Kalibaru Pàhuru: i Eliyowinai, i Maaheya, i Ihimailu, i Netaneyilu, i Yuhambàtu dàngu i Elaha.

²³Da tau Lewi: i Yuhambàtu, i Himei, i Kalaya (i Kalita wàda-nyakai), i Patahia, i Yunda dàngu i Eliyehiru.

²⁴Da matanggu ludu: i Eliyahipu Da madai pindu bokulu Umana i MIRI: i Halumu, i Telimu dàngu i Uri.

²⁵Da tau Ihirailu hawiangu: Kalibaru Paruhu: i Ràmuya, i Yehia, i Màlakia, i Miyamingu, i Eliahàru, i Màlakia dàngu i Mbanaya.

²⁶Kalibaru Elàmu: i Matanya, i Hakaria, i Yahialu, i Àpindi, i Yeremutu dàngu i Elia.

²⁷Kalibaru Hatu: i Eliyowinai, i Eliyahipu, i Matanya, i Yeremutu, i Njambatu dàngu i Ahiha.

²⁸Kalibaru Mbembai: i Yuhanàngu, i Hananya, i Hambai dàngu i Àtalai.

²⁹Kalibaru Mbani: i Mahulàmu, i Malaku, i Andaya, i Yahupu, i Hialu dàngu i Yeramutu.

³⁰Kalibaru Pahàtu-Muapu: i Àtana, i Kelàlu, i Mbanaya, i Maaheya, i Matanya, i Mbahalialu, i Mbinui, i Manahi.

³¹Kalibaru Harimu: i Eliyehiru, i Yihia, i Màlakia, i Hamaya, i Hamiungu, i Mbanyamingu, i Malaku dàngu i Hemaria.

³³Kalibaru Hahumu: i Màtanai, i Matata, i Njambatu, i Elipahelitu, i Yerimai, i Manahi dàngu i Himei.

³⁴Kalibaru Mbani: i Maandai, i Àmuràmu, i Uilu, i Mbanaya, i Mbendiya, i Keluhu, i Wanya, i Maremutu, i Eliyahipu, i Matanya, i Màtanai, i Yaahai.

³⁸Kalibaru Mbinui: i Himei, i Helimia, i Natàngu, i Andaya, i Màkanàtambai, i Hahai, i Harai, i Ahareyilu, i Helimia, i Hemaria, i Halumu, i Amària dàngu i Yuhupu.

⁴³Kalibaru Nembu: i Yeyilu, i Matiha, i Njambatu, i Hambina, i Yandai, i Yoilu dàngu i Mbanaya.

⁴⁴Mbuu ndàbada da tau nuda mbàda kanoma-daka kawini tau nàmu, tàka da papaha-da dawàru-nja hi wàngga pa-karia-nja da anada.