Read Kambera EHIRA 3 Bible Online

EHIRA 3 - Kambera bible

EHIRA 3

¹La wulangu pihu, nda - ndàdiku-danyaka da tau Ihirailu la parai wikida. La tànggalu hau la wulangu nuna pauhi-danyaka la Yeruhali,

²tàka i Yehua anana i Yuhandàku dàngu da anguda da ratuka dàngu i Herumbambilu anana i Halatialu dàngu da angu dedina, da-pahada belinya na ngia pawotu maraku la Ala tau Ihirailu. Hi peku tunuda kameti maraku la pinuna nunjuha da ngerangu pa-tulihu la huratu ukuna i Muha, atana i Ala.

³Jiapa ka da-mangàdatu-nyakai[4] na tau mangu tanangu lai nu, pahada-madanya na ngia pawotu maraku la pangia-na la mangilu. Ka pakiringu-danyaka pawotu kameti maraku patunu la mbaru dàngu la malingu.

⁴Dambabu-nya na Lodu Remi Maü Ma-paraungu, nunjuya na kalaratu; tàka nimbihu lodu dawotu-ha da kameti maraku da pa-pandumangu la lodu nuna.

⁵Hinggilu-na nuna naingu-mana nawotu-da kameti maraku patunu dàngu kameti maraku la Lodu Remi Wulangu Bidi, dàngu la mbuu ndàbada da lodu remi hawiangu da pawunda-da la palumu-nya i MIRI. Dawotu-mbu maraku nunjuya nawàngu eti wikida lai MIRI.

⁶Jiapa-kai ka ndedi pawulu beliya na Umana i MIRI, tàka la tànggalu hau wulangu pihu tunu-mana-nyaka kameti maraku na rayatu ndumana i MIRI.

⁷Na rayatu dahunggu àmahu pahewa wàngu tukangu watu dàngu tukangu ai. Da-pangàndingu-mbu pangangu, pa-ngunungu dàngu mina haitungu la parai - paraingu la Tiruhu dàngu la Hindungu pa-panjepangu wàngu ai kajiu Limbanongu welingu la paraingu nuda. Nuda da ai da paliinja la tehiku ba dangàndi-ha la Yapu. Mbuu ndàbada nuda rayatu maràma-ha la papina i Korihu na maràmba Perihia.

⁸La wulangu padàmbu wàna, la ndaungu padàmbu wàna la hambeli belina na tau Ihirailu la Yeruhali, pa-kiringu-danyaka pawulu beliya na Umana i MIRI. I Herumbambilu, i Yehua dàngu da angu banjaru-da, da ratu, da tau Lewi, na-kababa-na, mbutana na mabeli weli la tanawangu, daràma. Da tau Lewi da madua kambulu ndauda matua-da dàngu la ditana pa-pandumangu-ha la paliku urunya na paràma ba wuluya na Umana i MIRI.

⁹Tàka i Yehua, na tau Lewi dàngu da anana dàngu da angu dedina dàngu i Kàtumialu-mbu dàngu da anana (na kalibaru Haundauya)[5] jia ndàbaha ma-hamata-ya na paràma ba wuluya na Umana i MIRI. Nyuda da-pambapa dànja paraï da tau Lewi welingu la kalibaru Henandàtu.

¹⁰Ba da-pakiringu-ka da mawulu uma patuya na latana na Umana i MIRI, da ratu dahau kalembi malai dàngu katangu-da taropitu hi da-ndolaku la pangia pa-pandumangu-ha. Da tau Lewi welingu la kalibaru-na i Ahawàpu da-ndolaku-mbu lai nu dàngu katangu-da anamongu kudu. Dawo - wotunya i MIRI nunjuya na kalaratu pambàda wàngu piti welingu la ndaungu lurina na Maràmba Ndautu.

¹¹Na rayatu naludu-nya na ruku wotunya i MIRI ba hili be - belinya na lawiti panjàpu wàna, “I MIRI nahàmu; dàngu nambuha-nanya na Ihirailu lundu nu - nuya,” ba wàda. Mbuu ndàbana na rayatu da-kayaka dàngu dawotu-nya i MIRI, ba mbàda tuu-duyaka na latana na Umana i MIRI.

¹²Dadangu la njonga ratu, la njonga tau Lewi, la njonga ngora banjaru ma-kaweda mambàda itaya na Umana i MIRI na ma-wungangu. Nu ba daita-ya ba tunya latana na Umana i MIRI, hii kaladaku-danyaka. Tàka hawiangu na tau na maninya lai nu da-kayaka mbaha eti,

¹³hi lupa nda papingu paheka-nya na ma-kayaka mbaha eti dàngu na mahii. Dira pawàndingu-ha hi lupa ronguha welingu la mamarau.