Read Kambera EHIRA 4 Bible Online

EHIRA 4 - Kambera bible

EHIRA 4

¹Da muhu tau Yahunda dàngu tau Mbanyamingu mbàda rongu-daka rukuna na tau na mabeli welingu la tanawangu, ba wulu-danya na Umana i MIRI, na Ala Ihirailu.

²Tuna nuduka hi dalua lai Herumbambilu dàngu da ngora banjaru pa-patàkangu kareuku, “Pahia-nggama duma pa-pambapangu pawulu-ya na Umana i MIRI, nadu ba lumu-mamanya na Alami, hama tuna nyimi. Makàli wotuma duma hunggu lai Nyuna, piti welingu la ndaungu pa-mandapu-nanggama yiahu i Ehàru-Handungu na maràmba Ahuru,” wàna.

³Tàka i Herumbambilu, i Yehua dàngu da ngora banjaru dahema, “Nggàra maihi wànya na pambapangu-mi nyimi pawulu-nya Umana na MIRI Alama. Pahada meha-manya duma nunjuya na hupu liina i Korihu, maràmba Perihia, lai nyuma,” wàdanja.

⁴Ka pakiringu-danyaka da tau da mambàda nii mangilu-nja la tana lai nu, pa-pamàli-ya na eti tau Yahundi dàngu da-pamangàdatu-ha, ka dajiaka-nya nawulu-danya na Uma.

⁵Wua kangunguhu-danjaka pawua juangu da mapawai ngaba la pareta Perihia ka da-pabeta-nya na pawuku tau Yahundi. Nuna nu pangala tilangu-mananya la ngala pareta-na na Maràmba Korihu lundu la pareta-na na Maràmba Ndariu.[6]

⁶La ndaungu pareta-na na Maràmba Ahaweru, pakàla wàngu-danyaka huratu da muhuda da tau la Yeruhali dàngu la Yahunda.

⁷Hamangui la ndaungu pareta-na i Àratahàtahu, na hanganji bokulu Perihia, jia beli-mayai na matungu nu: i Mbihulàmu, i Mitirendàtu, i Tambeyilu dàngu da anguda da-pangàndingu huratu la maràmba. Nu na huratu da-tulihu-ya la hilu Aràmu[7] dàngu hi haleli-ya ba mbahaya.[8]

⁸I Àratahàtahu na-ngalangu-mbu huratu rukuna na paraingu Yeruhali. Nu na huratu pa-pangàndi-na i nggumbunuru Rehumu dàngu i Himuhai na matanggu tulihu la porupinihu dàngu da anguda, nu da hakimu dàngu mbuu ndàbada da ma-pawai ngaba Perihia hawiangu welingu la Eriku, la Mbambilu dàngu la Huhàngu, la tana Elàmu,

¹⁰dàngu da banjaru hawiangu da pambàda palaü-na i Àhanapàru Ma-bokulu hi na-paràha-nja pa-ndàdiku la parai Hamaria dàngu la paraingu hawiangu la porupinihu Epuràtu Patama Lodu.

¹¹Na linguna na huratu tuna nu, “Ndumana na Maràmba Àratahàtahu, welingu la atana ma-mandapu-nya la Epuràtu hahupu Patama Lodu, tambi wàmanggau.

¹²Pi-mamunya Tamu Umbu na rukuna na tau Yahundi, da ma-hadangu welingu la hau parai - hau paraingu la kuru pareta-mu Tamu Umbu, nàhu ndàdiku-danyaka la Yeruhali hi datura beliya na paraingu ma-akatu na makàli katadaku. Mbàda pa-kiringu-daka pa-pahada belinja da kangeli, nda namandai-apa na-palundu-danya nu na paràma-da.

¹³Jàka na-hàrangu-ka na tura beli-danya na paraingu dàngu jàka da-lundungu-ka da kangeli, nda dabihu-apa pa-wuangu hilu katiku, ka japu-duna-nyaka na pangala-na na pareta.

¹⁴Nyuma duma, ma-pangàda-nya na hàmu-munggama Tamu Umbu, hi nda ma-mbuhangu paita-ya na kawawaku-mu Tamu Umbu. Jia-duyaka hi ma-kamahi-nggau,

¹⁵kau paràhangu pakinju-ha da huratu ndai welingu la bo - boku la mangilu-mu Tamu Umbu. Welingu la ihida da huratu napa upinya, na tau la parai Yeruhali ba nakàli katadaku, dàngu weli àmangu-maka ba naingu-na na-pa-kawawaku-naha da maràmba dàngu da ma-pareta la porupinihu. Ma-kalutu-mànu-maya ba pareta-ha nyuda. Tuna nuduka hi nyungguru-ya nuna na paraingu.

¹⁶Mapii hàmu-manya jàka tura beli-yaka na paraingu dàngu jàka da-hadangu-ka da kangeli-na ndau màka-apa pa-pareta-ya yiana na porupinihu Epuràtu Patama Lodu,” wàna.

¹⁷Na maràmba na-pangàndingu hemana, “Ndumana i nggumbunuru Rehumu dàngu i Himuhai na matanggu tulihu la porupinihu, dàngu da anguda nyuda da ma-ndàdiku la Hamaria dàngu da paraingu hawiangu la Epuràtu hahupu Patama Lodu.[9] Tambi wànggunggai.

¹⁸Na huratu pa-pangàndi-mingga, mbàda haleli-yaka hi mbaha-ngganya.

¹⁹Nunjuya na hupu liinggu, mbàda ninguka ma-manginjiru-ya, deningu-mana piti weli a-àmangu na tau Yeruhali nakàli rawaku-ha da maràmba dàngu nadangu lai nyuda na ma-katadaku dàngu na-ma-pakunggalungu.

²⁰Ningu maràmba ma-kaborangu àmangu da ma-katangu pareta lai nu dàngu da-pareta-ya nggubulu-na na porupinihu Epuràtu hahupu Patama Lodu hi dakei mbewa dàngu hilu katiku.

²¹Jia ba tuna, iwuangu-wa pareta ka da-pànjangu paràma ka àmbu tura beliya na paraingu lundu ningu hili hau hupu liinggu.

²²Luu pahàra-nyaka bàdi na pareta-nggu ka àmbu hama hukana na ma-kawawaku-ngga!” wàna.

²³Ba hàlaka pambaha-nja na huratu-na i Àratahàtahu nyuda i Rehumu dàngu i Himuhai lu laku-danyaka la Yeruhali pahàni-ha da tau Yahundi ka da-pànjangu patura beliya na paraingu.

²⁴Na paràma ba wuluya na Umana i MIRI pa-papànja-nyaka, nda pa-pangala-anyapa lundu la padàmbu ndau wàna na pareta-na i Ndariu, maràmba Perihia.