Read Kambera EHIRA 5 Bible Online

EHIRA 5 - Kambera bible

EHIRA 5

¹La rehi nu da tau madua da wunangu, i Hanggai dàngu i Hakaria anana i Indu datungu lii wànya na tamuna na Ala tau Ihirailu la tau Yahundi ma-ngiangu la Yahunda dàngu la Yeruhali.

²Ba darongu-yaka na paniida nu da wunangu pa-kadua-da, i Herumbambilu anana i Halatialu dàngu i Yehua anana i Yuhandàku lu pa-kiringu-danyaka pawulu beliya na Umana i MIRI la Yeruhali, dàngu pa-mbapangu-da nu da wunangu pa-kadua-da.

³Tàka i Tàtanai, na nggumbunuru porupinihu Epuràtu Patama Lodu, dàngu pa-hamangu-na i Hetaru-Mbòhunai dàngu da anguda lu mai-danyaka la Yeruhali, hi da-paàra-nja da tau Yahundi, “Nggamu ma-paràha-nggai pawulu-ya yiana na Uma lumungu?” wàda.

⁴Da-paàra-mbunja[10] da tamuda mbuu ndàbada da ma-pambapangu pawulu-ya na Umana i MIRI.

⁵I MIRI duna hamata dàngu mangga-mananja da ngora tau Yahundi, hi lupa dabota-ya parai da maningu wai ngabangu la pareta Perihia, ba nda nggàra-a pawunda jàka ndedi da-pangàndi-nya huratu i Ndariu dàngu jàka ndedi da-ngalangu hemana.

⁶Yiana-duyaka na lii langu pa-pangandi-danya na maràmba,

⁷“Ndumana na Maràmba Ndariu. Màla àruki nyumu Tamu Umbu ka na-mambiru na pareta-mu!

⁸Ka napinya i Tamu Umbu wàma, ba mbàda lua-maka la porupinihu Yahunda dàngu la paita-ya na Umana i MIRI, Ala Mabokulu, ba pawulu beli-yaka wàngu wa - watu bokulu dàngu da kangeli pa-pandàningu wàngu ai. Dira màpihu-ya na paràma dàngu nda na-tarandudi-a.

⁹Tunaka nu hi ma-paàra-nja da ngora banjaru jàka nggamu ma-pahia-nja pawulu beliya na Uma lumungu dàngu la pa-pamàtu-ya.

¹⁰Ma-paàra-mbunja da tamuda ka peku patàka-manya i Tamu Umbu jàka nggamuha da mangora-nya na paràma.

¹¹Dahema, ‘Nyuma duma atana i Ala kama na ma-kuwaha-ya na pa-nggubulu awangu. Wulu beli-manya na Umana i MIRI na pawulu dàngu na pa-pamàtu la pira kambulu ndaungu ma-làpahu paraïna na haàtu maràmba bokulu tau Ihirailu.

¹²Tàka da bokuma ba datu-yaka na pahàngga wàna i Ala ma-kuwaha la awangu, jia-duyaka hi na-pajàma-nja la kuwaha-na i Nembukatunehàru, maràmba Mbambilu wàla tau Kàhandimu. Nyuna na-nyungguru-ya na Uma, hi na-dundilu-ya na banjaru-ma la Mbambilu.

¹³Tunaka nu njadi-nanyaka maràmba Mbambilu i Korihu, tàka la ndaungu kawunga pareta-na wuangu-nanyaka pareta pawulu beliya na Umana i MIRI.

¹⁴Dàngu na-wuangu beli-mbuha da kanaingu àmahu rara àmahu bara da pawàngu la Umana i MIRI, da pambàda pitina i Nembukatunehàru welingu la Yeruhali, hi na-patama-nja la uma lumungu la Mbambilu. Nyuna i Korihu nawua-ha nuda da kanaingu la haàtu ma-tamungu Hehimbahàru, na pambàda wotuna pa-nggumbunuru la Yahunda.

¹⁵Na maràmba na-paràha-nya papiti-ha da kanaingu, pangàndi beliha la Umana i MIRI la Yeruhali, dàngu pawulu beliya na Uma.

¹⁶Ka mai-nanyaka i Hehimbahàru la Yeruhali hi naàki-nya latana na Umana i MIRI. Piti welingu la rehi nu lundu nàhu ba na-pairihungu nawulu-danya na Uma, tàka ndedi na-lundungu-a.’

¹⁷Pekuna jàka wàmu tamu umbu, ma-kamahi-nggau ka hajiwaru-ha da huratu la kanai huratu pareta la Mbambilu. Nu pekuna la papinya jàka tuba deningu-na ba ningu hupu liina na Maràmba Korihu pawulu beliya na Uma lumungu la Yeruhali. Tunaka nu, makarai lii langu rukuna na botangu-mu nyumu tamu umbu na rukuna na lii yiana,” wàda.