Read Kambera EHIRA 6 Bible Online

EHIRA 6 - Kambera bible

EHIRA 6

¹Ba tunaka nu la hupu liina na Maràmba Ndariu, hajiwaru-dahaka da huratu la kanai huratu pareta da pa-pahàmu la Mbambilu.

²Tàka na pa-tulihu rukuna nuna nda la Mbambilu-a na ngia pahunggu-ya, tàka la parai Àhameta la ngabana la Mendia. Nu na pa-tulihu, pa-tulihu la huratu pa-kuluru-ya, tuna yia,

³“La ndaungu kawunga-na ba na-pareta i Korihu, na-wuangu pareta ka wulu beliya na Umana i MIRI la Yeruhali, ngia pangàndi-na hunggu dàngu ngia patunu-na kameti maraku na tau. Na janggana na Uma dua kambulu pihu metiru-mana bàdi, na kaba matana dua kambulu pihu metiru-mbunai.

⁴Ba pahada-nja da dindingu-na tuna nu bàdi: ba hàla patailu ndànida da watu la pinuna tu - tumanya handàni ai. Da hewa ndumana nuna, kanai banda pareta matanggu-nya.

⁵Hamangui da kanaingu àmahu rara dàngu àmahu bara da pawàngu la Umana i MIRI da pambàda pitina welingu la Yeruhali na Maràmba Nembukatunehàru, pabeli-njaka bàdi la pangia-da, wàna daa la huratu,” wàna.

⁶Tunaka nu pa-ngàndingu-nanyaka huratu hemana i Ndariu, “Ndumana i Tàtanai, na nggumbunuru Epuràtu Patama Lodu, dàngu i Hetaru-Mbòhunai hamanai da panggawi la Epuràtu Patama Lodu. Àmbu kuwaru-duha da tau Yahundi,

⁷dàngu àmbu pabeta-nja na wulu-danya na Uma lumungu-da. Màta bianya na nggumbunuru Yahunda dàngu da ngora Yahundi ka dawulu beliya na Uma.

⁸Wànya yiana ku-paràha-nggai kai pambapa dànja la paràma wulu Uma. Tuna nu na pa-mbapangu-mi: Mbuu ndàbada da àmahu ndumana nuna, lupangu-ma pitiha welingu la hilu katiku pareta la porupinihu Epuràtu Patama Lodu dàngu kai wuanja da tau, àmbu pa-mangenahu-duha.

⁹Hinggilu-da nuda, nggàra bia pa-kalana-da da ratu la Yeruhali, hama tuna kamboka hapi mini, mbimbi mini dàngu ana mbimbi nduma hunggu kameti maraku lai Ala ma-kuwaha la awangu, dàngu uhu nggàndumu, mehi, angguru dàngu mina haitungu, lupangu nimbihu lodu bai wuanja wàngu nda kanjàdi-na.

¹⁰Pahàra ndàbanja nuda ka peku wotuda hunggu kameti maraku pa-mànjaku eti wàna i Ala ma-kuwaha la awangu, dàngu ka dakarai wai maringu wai malala ndumanggu nyungga dàngu ndumada da ananggu.

¹¹Kuwua-nggai pareta, na tau na mapangga-ya yiana na botangu butuhu hapungu kambaniru umana, padàka-ya na hupuna, hanjokaru lumbu làpahu-nya la ihina nu na tau. Na umana nyànggaru-maya ka tuya pa-bundungu.

¹²I Ala na mambàda lehaya la Yeruhali patuya ngia palumu-nya Nyuna, ka na-patàlaru àru-kiha da maràmba dàngu da banjaru da matoru mbeni papangga-ya yiana na botangu dàngu da ma-pakakangu ànga pa-weharu-ya na Umana i MIRI la Yeruhali. Nyunggama, Ndariu, ma-wuangu-ya yiana na pareta. Pahàra pahàmu-nyawa,” wàna.

¹³Na pareta-na na Maràmba Ndariu, pahàra pahàmu-madanya paraï da i Tàtanai na nggumbunuru Epuràtu Patama Lodu, dàngu i Hetaru-Mbòhunai dàngu da angu-daka.

¹⁴La pa-mbapangu-da i Wunangu Hanggai dàngu i Hakaria, pangala-madanya pawulu-ya na Umana i MIRI paraï da ngora tau Yahundi. Da-palundu parengga-nya na paràma wulu Uma nunjuya na hupu liina na Ala tau Ihirailu dàngu na pareta-na i Korihu, i Ndariu dàngu i Àratahàtahu, da maràmba Perihia.

¹⁵La tànggalu tailu wulangu Andaru la panomu wàna na ndaungu pareta-na i Maràmba Ndariu, hàla-danyaka pawulu-ya na Umana i MIRI.

¹⁶Tunaka nu, katua mbaha eti-danyaka na Umana i MIRI paraï da tau Ihirailu, da ratu, da tau Lewi, dàngu mbuu ndàbada da tau da mabeli weli la tanawangu.

¹⁷La rehi nu dawotu hunggu lai MIRI hangahu hapi mini, 200 mbimbi mini dàngu 400 ana mbimbi. Ndumana na kameti maraku jàmangu njala, dawotu hakambulu dua ngiu kamàmbi mini, he - heu nduma hau kabihu - hau kabihu tau Ihirailu.

¹⁸Tàka ndumana na lumungu la Umana i MIRI da-pabiwa-nja da ratu, hamanai da tau Lewi nunjuya na kalaratu pa-tulihu la mbukuna i Muha.

¹⁹La tànggalu hakambulu patu wulangu hau la ndaungu na ma-pandàkingu, da tau da mabeli weli la tanawangu dambabu-nya na Paha.

²⁰Mbuu ndàbada da ratu dàngu da tau Lewi mbàda wunda-danyaka na hawari wiki, hi da-yarahu. Tàka da tau Lewi hi da-hambàli-ha da banda kameti maraku Paha ndumada da ratu, ndumada nyuda wiki dàngu mbuu ndàbada da mabeli welingu la tanawangu-ka.

²¹Nuda da kameti maraku dangaanja paraï da mbuu ndàbada da tau Ihirailu mabeli welingu la tanawangu dàngu da tau mangu tanangu lai nu da mamàta-nya na huri luri manjala, da ma-hurungu palumu-nya i MIRI, na Ala Ihirailu.

²²Pihu mbua lodu mandaina ba dambabu mbaha etinya na Lodu Remi Roti Nda Patai Wolungu. Dira hàmuha da etida, rukuna i MIRI ba na-pamuluru-ya na etina na maràmba Ahuru[11] hi nandula-ha la paràma ba wulu beliya na Umana i MIRI, na Ala Ihirailu.