Read Kambera EHIRA 7 Bible Online

EHIRA 7 - Kambera bible

EHIRA 7

¹La pira mbua ndaungu la malamiri, la ndaungu pareta-na i Àratahàtahu na maràmba Perihia, ninya na haàtu mini na ma-tamungu Ehira welingu la ana umbuku-na i Harungu na Ratu Bokulu. Na nitu ngia paweli-na jàka taweli kapuka-nya tuna nu: i Ehira i Haraya i Aharia i Hilikia

²i Halumu i Handuku i Ahitupu

³i Amària i Aharia i Marayutu

⁴i Haràhaya i Uhi i Mbuki

⁵i Ambihua i Pineha i Eliahàru i Ratu Bokulu Harungu

⁶Ma-hakola janggaya i Ehira dàngu na-tanjiku na pinguna rukuna na Uku pawua-na i MIRI, Ala Ihirailu lai Muha. Ruku pa-kanyuru-nanya i Ehira paraïna i MIRI, Alana, na maràmba nawua-nyaha da pakarai-naka. La papihu wàna na ndaungu pareta-na na Maràmba Àratahàtahu, hadangu-nanyaka welingu la Mbambilu hi nalaku la Yeruhali i Ehira dàngu hajuru-na na tau Ihirailu, nu da ratu, da tau Lewi, da matanggu ludu dàngu da madai pindu la Umana i MIRI dàngu da maràma.

⁸Da-hadangu welingu la Mbambilu la tànggalu hau wulangu hau, ruku pa-ndulangu-na i Ala, datàka la Yeruhali la tànggalu hau wulangu lima.

¹⁰Nyuna i Ehira mbàda ma-nginjiru hàmu-nahaka da Ukuna i MIRI, la pa-pahàra-nja dàngu la papakei-nya na banjaru Ihirailu rukuna mbuu ndàbana na huri dàngu na kalaratu-ka.

¹¹Yiana-ya na huratu ndokumenu pawua-nanya i Ehira na ratu na ma-tanjiku la uku, paraïna na Maràmba Àratahàtahu,

¹²“Welingu lai Hanganji Àratahàtahu ndumana i Ratu Ehira na ma-tanjiku la Ukuna i Ala ma-pareta la awangu.[12]

¹³Ku-wuangu pareta la pa-pahia-nja palaku karia-nggau, mbuu ndàba da ratu, da tau Lewi dàngu da tau Ihirailu hawiangu la kuru pareta-ngguka da ma-rinjungu pabeli la Yeruhali.

¹⁴Nadu nyungga dàngu da mapihu da ama bokulu-nggu ma-paràha-nggau la Yeruhali dàngu la Yahunda la pa-kanuturu-ya dàngu la pa-tàngaru-ya, jàka pa-namatu langatàka-duya na Ukuna i Ala pa-pakatangu-kau.

¹⁵Nyungga dàngu da ama bokulu-nggu, ka wotu maraku àmahu rara dàngu àmahu bara la Ala tau Ihirailu, na Ala na ma-ngiangu la Yeruhali wàma. Ngàndi-hawa nu da tanda maraku-ma.

¹⁶Ngàndi-mbuha mbutada da àmahu rara dàngu da àmahu bara da pa-kangutu-mu la nggubulu tana Mbambilu dàngu mbutada da hunggu tau Ihirailu dàngu da ratuka ndumana na Umana i MIRI na Alada la Yeruhali.

¹⁷Àrapu pahàmu-nja pakei wàngu hapi mini, mbimbi bumbu, ana mbimbi, uhu nggàndumu dàngu angguru. Wotu-hawa mbuu ndàbada nuda la ngia pawotu maraku la Umana i MIRI la Yeruhali.

¹⁸Da àmahu bara dàngu da àmahu rara da marihi, malanja wànja nyumu dàngu da angumu, hama tuna na pambuha-na na Alamu.

¹⁹Wotuha la Uma Ala la Yeruhali mbuu ndàbada da kanaingu pawuangu-kau da pa-lumungu wàngu la Uma Ala.

²⁰Dàngu hawiangu da pawàngu la Umana i MIRI, karai bia welingu la kanai banda pareta.

²¹Mbuu ndàbada da ma-hamata kanai banda pareta la porupinihu Epuràtu Patama Lodu, mbàda wua-nggunjaka pareta, nggàra biaya na pakarai-na i Ratu Ehira na ma-tanjiku la Ukuna i Ala ma-kuwaha la awangu, lu wua mema-manya,

²²lundu tuna nu na danguda: àmahu bara lundu 3.400 kilu, uhu nggàndumu lundu 10.000 kilu, angguru 2.000 litaru, mina haitungu lundu 2.000 litaru, dàngu mehi tuda pawàngu.

²³Imàpima bai paloku-ya mbuu ndàbana na pawàngu ba wàna i Ala ma-kuwaha la awangu ndumana na Umana, ka àmbu nahàngga-ngga nyungga, jàka ndia da tau da ma-pareta taliunggu nyungga.

²⁴Àmbi karaidu hilu katiku la ra - ratuka, la tau Lewi, la matanggu ludu, la madai pindu bokulu, la maràma, dàngu nggamu biaya na ma-paindangu la Umana i MIRI.

²⁵Oi angu mbuha Ehira, wa-manya na manggàna na pambàda wua-nanggau i Ala, dàngu wotuwa liku uru dàngu hakimu - hakimu la pa-pareta-ya na tau la porupinihu Epuràtu Patama Lodu da maluri namatu-ya na Ukuna na Alamu. Papeka-nya na Uku la mbuu ndàbana na tau mandedi pinya.

²⁶Na ta - tauka na manda namatu-ha da Uku Alamu, jàka ndia da uku pareta, lu huku pameti-maya, jàka ndia tanawa-nya, jàka ndia rambanja da bandana, jàka ndia puhiya la uma kapàtangu,” wàna.

²⁷Tàka i Ehira, “Wotu-nyawa i MIRI, na Ala pa-marubuku-da da boku la mangilu-nda! Ba mbàda juju-nanyaka na etina na maràmba, hi na-mbuhangu pa-hamata pa-ihiku-nya na Umana i MIRI la Yeruhali.

²⁸Ruku ndula-nangga i Ala hi nambuha-ngga na maràmba, da ama bokulu-na dàngu da maningu waingaba la pareta-na; i MIRI Alanggu na ma-pahaka-ngga ura, hi peku pauhi-nggunja da ma-pangora Ihirailu pabeli la Yeruhali,” wàna.