Read Kambera EHIRA 9 Bible Online

EHIRA 9 - Kambera bible

EHIRA 9

¹Ba pahàra-njaka nuda mbuu ndàbada, ninja da ngora banjaru Ihirailu da mamai lai nyungga. Ba datàka-ngga dapanii-ngga, da tau Ihirailu hamangui da ratu dàngu tau Lewi ba nda daleha-a wikida welingu la banjaru la winggiru-da, nu da banjaru Amungu, Muapu, Mehiru, Kanaàngu, Heti, Perihu, Yembuhu dàngu Amori. Jiapa da ratu dàngu da tau Lewimbu tuda numbu. Nyuda mbuu ndàbada dawunda ma-iraku hama tuna na pawunda-da nuda da banjaru.

²Da mini Yahundi ba dalalei dapiti kawini tau nàmu hi lupa nda na-lehangu-apa na banjaru manguna i MIRI. Tàka da ma-mangilu dehi pawunda ma-hamangu jiaha da ma-pangora dàngu da-mapawai ngaba la Ihirailu.

³Ba kurongu-yaka na matungu nu dira halaya na etinggu hi ku-bàriku-ha da pakinggu dàngu ku-ràmbitu-ya na lungginggu hamangui da ruu ngoranggu, hi ku-mandapu dàngu làjaru etinggu.

⁴Daingu mandapu tunggu numa lupa la rehi wotu kameti maraku la malingu. Ka mai-danyaka da tau hi da-langgungguru-ngga. Mangàdatu-danyaka ba dangàda-ya na-pangàdungu-na na Ala Ihirailu ruku njalada da tau da mabeli welingu la tanawangu.

⁵Ba pakiringu-ka pawotu kameti maraku malingu hadangu-nggunyaka welingu la ngia pa-hawina-nggu dàngu paki kahira-nggu, ku-patika dàngu ku-pandemangu limanggu lai MIRI Alanggu,

⁶“Ou Alanggu, ku-makia pa-tangara la hanggamu. Da njalama dira pa-bundungu-ha la katiku-ma lupa da-jonggaru awangu.

⁷Welingu la bokuma la mangilu lundu nàhu, ba manjala nyuma banjaru-mu. Rukuna nuna-maka nyuma, da maràmba-ma, da ratuma, hi nabera-kama maràmba tau nàmu. Da-pameti-kama, daramba-nggama hi dangàndi-kama pa-tanawangu dira pawawa-da-nggama, hama tuna la lodu nàhu.

⁸Tàka nàhu ou MIRI Alama, hina-makipa namàja-munggama eti. Bau pamara-ha welingu la ata da manda pirada da anguma la paluri mambiru la pangia paleha yiana. Uwua-nggama luri bidi.

⁹Ba ata kamapa, ndau dunjaku-nggama. Uwundaya na pamila wàda-nggama eti da maràmba Perihia, hi pahia-nggama paluri dàngu pawulu beliya na Umamu na ma-tanyungguru. Uwua-nggama ngia pamara-ma yiahu la Yahunda dàngu la Yeruhali.

¹⁰Tàka nàhu, ou MIRI Ala, ba tumaka nu, nggikina wàma-aka? Hili nda ihilii-manjaika da pareta-mu,

¹¹na pawua-mu-nggama la ngaruda da wunangu da atamu. Dapanii-nggama na tana na pa-ngiangu ba wàma nda na-yarahu-a nadu mbutana na ma-mandapu-nya welingu la hupu pa-ràpangu la hupu dawunda ma-iraku dàngu ma-kajari.

¹²Da wunangu dahiri-nggama palalei-mangoma pa-haüru dànja da tau nuda, jàka ndia la pa-pambapa dànja ka natoma dàngu ka na-lànyapu na lurida. Jàka ma-tuturu, napa ma-kapingatu dàngu hi mangala-nya na ihina na tana hi ma-pakangeha-nja da ana umbuku-ma lundu nu - nu.

¹³Mbàda njala-maka dàngu mapangga-ha da Ukumu, dàngu hi mbàda hukumu-nggama. Tàka mapinya, ou Alama, na hukungu na pa-palimba-mu-nggama nda hama mbotu-ana na ma-paràkangu làti lai nyuma, tàka jiangu bia bau pamara-kama.

¹⁴Ba tuna, nggiki hamana ihu hi jia nda ihilii bia-manja da pareta-mu dàngu hi malalei mangoma, pa-haüru dànja nuda da tau akatu? Jàka mawunda-ya nuna, lupangu-maka ba dira hànggamu-nggama hi lupa upa-muburu kama, tàka hi nda haàtu-mbu pa-pahia-mu paluri.

¹⁵Ou MIRI, Ala tau Ihirailu, Nyumu ma-padeningu-kau, tàka ba tuna, pahia-biamu-nggama paluri. Mapeka-ha da njalama lai Nyumu; nda ningua ngerama pa-doparu la hanggamu,” wànggu.