Read Kambera NAHEMIA 1 Bible Online

NAHEMIA 1 - Kambera bible

NAHEMIA 1

¹Yiana-yaka na pa-patàka-na i Nahemia anana i Hakalia na ruku para - ràma-naka. La wulangu Kihiliu la padua kambulu wàna na ndaungu yàpana pareta i Àratahàtahu na maràmba Perihia, nyungga yia, Nahemia, ningga la Huhàngu, na parai puhu pareta.

²Nu, ka mai-nanyaka na angu dedinggu i Hanani, namai karia-nja ba nda pirada da anguna welingu la Yahunda. Hi ku-paàra-nja jàka nggi - nggiki-naka nu na paraingu Yeruhali hamanai da tau Yahundi da mabeli welingu la tana Mbambilu ngia pa-tanawangu-da.[1]

³Ka panii-danyaka ba daharui mayila da tau da mabeli-ha la tanada,[2] ba na-paaka-nja tau hangàdangu la wingguru-da. Dàngumbu, ba taweharu hàla-mada-nyaka da kangeli-na na paraingu Yeruhali, hamanai ba ndedi pa-pahàmu-mbuha da pindu bokulu-na pa-kiringu ba tunuha la rehi na ma-làpahu.

⁴Ba kurongu-yaka nu, ka uhuku-nggunyaka hi kuhii. Na-hawina malo - lodu na etinggu. Ka rotu-nggunyaka wikinggu hi ku-hamayangu lai Ala,

⁵“Dou MIRI Ala ma-kawaha la awangu. Nyumu Ala ma-bokulu-kau dàngu ma-mangàdatu-nggau ba ma-hurungu la hanggamu. Nyumu dumu ba daingu-mamu bau tuturu dàngu bau yàpa-maya na panjanji-mu la tau mambuha-nggau hamanai na ma-tuturu-nya na lii pareta-mu.

⁶Pa-taraku-kingga mata dou MIRI, ukatàmbalu patingi-kinya na hamayangu pa-patàka-nggunggau la rudungu la lodu ndumana yia na banjaru Ihirailu, nu da atamu. Ku-pajia-ya ba njala-mama-nyaka nyuma yia banjaru Ihirailu; nyungga dàngu da bokunggu la mangilu ba njala-mbuma-nyaka.

⁷Mbàda akatu-maka la hanggamu ba mapangga-ya na lii paretamu. Nda ma-tuturu-anja da lii ukumu da pa-patàka-mu-nggama la ngaruna i Muha, na atamu.

⁸Dou MIRI, upangàda-kinya na pulu na paniimu na patiki-na i Muha na pa-paràha-mu, nadu nyuma yia banjaru Ihirailu, jàka nda ma-tuturu-nggau Nyumu, ba lupangu-ma upa-tanyala-nggama la hongada da banjàru hawiangu.

⁹Na nyuna jàka mahili beli lai Nyumu hi ma-tuturu-nya na lii pareta-mu, ka hili pauhi beli-dumu-nggamaka nyuma yia mambàda tanyalangu, jiapa-kai ka la hupu tana-kama. Hiu pabeli-nggama la pangia pambàda pindimu ngia palumu-manggau.

¹⁰Dou MIRI, nyuma yia atamu-nggama, banjaru-mu Nyumu-kama pambàda pahàla-mu wàngu àtalu kapàru-mu ma-kanjupu wirungu.

¹¹Ukatàmbalu patingi-kinya na hamayangu-nggu hamanai na hamayangu-da hawiangu da atamu da ma-mbuhangu patembi-kau. Undula àru-kika ka peku mila-kinangga eti la lodu nàhu na maràmba,” hi wànggu. La rehina nu nyungga-maka ma-paloku-nya pa-unungu na maràmba.