Read Kambera NAHEMIA 10 Bible Online

NAHEMIA 10 - Kambera bible

NAHEMIA 10

¹Na ma-kawunga tuu tanda limana jiaya i Nggumbunuru Nahemia anana i Hakalia. Hàlaka hi na-pandàkingu i Hendikia. Hàlai-ka nu hi dahili pa-ndàkingu-mbui patuu tanda limada yiada da tau da ma-pandàkingu:

²Da ratu i Haraya, i Aharia, i Yerimia, i Pàhuru, i Amària, i Màlakia, i Hatuhu, i Hambanya, i Malaku, i Harimu, i Maremutu, i Ombanja, i Ndanialu, i Ngginitungu, i Mbaruku, i Mahulàmu, i Ambia, i Miyamingu, i Maahiya, i Mbilinggai dàngu i Hamaya.

⁹Da tau Lewi i Yehua anana i Ahanya, i Mbinui wàla wua kalibaru Henandàtu, i Kàtumialu, i Hambanya, i Hondia, i Kalita, i Palaya, i Hanàngu, i Mika, i Rehupu, i Hahapia, i Hakuru, i Haripuya, i Hambanya, i Hondia, i Mbani dàngu i Mbeninu.

¹⁴Da liku uru banjaru i Paruhu, i Pahàtu-Muapu, i Elàmu, i Hatu, i Mbani, i Mbuni, i Àhanggàtu, i Mbembai, i Andunia, i Mbikiwai, i Andingu, i Atiru, i Hihikia, i Anjuru, i Hondia, i Hahumu, i Mbehai, i Haripu, i Anatutu, i Nembai, i Màkapia, i Mahulàmu, i Hehiru, i Mehihambeyilu, i Handuku, i Yandua, i Pelaha, i Hanàngu, i Anaya, i Hohia, i Hananya, i Hahupu, i Halohi, i Piliha, i Hombiku, i Rehumu, i Hahàpana, i Maaheya, i Ahia, i Hanàngu, i Anàngu, i Malaku, i Harimu dàngu i Mbaana.

²⁸Nyuma, rayatu Ihirailu, ratu - ratu, tau Lewi, madai pindu bokulu Umana i MIRI, da ma-katangu malingu pambabu wàngu dàngu da maràma-ka la Umana i MIRI, da papaha-mbuma dàngu da ana matua-ma da matoma kanandingu-da dàngu mbuu ndàbana na tau na ma-tuturu-nya na Ukuna i Ala dàngu na ma-kahika wikina welingu la tau hangàdangu ma-ndàdiku la tanama.

²⁹Nyuma mbuu ndàbama ma-paoringu wikima la liku uruma dàngu ma-harangu la paluri nunjuya na Ukuna i Ala na pambàda wuana-nggama la limana i Muha, atana. Màla àruki ka naràtu-nggama i Ala jàka nda ma-patutu-nya yiana na panjanji-ma. Ma-harangu pa-patutu pa-padeni-nya mbuu-naka na lii pareta, na uku dàngu na kalaratu-na i MIRI, na Alama.

³⁰Ma-harangu la panda lalei mangoma pa-korungu la tau hangàdangu ma-ngiangu la tanama.

³¹Jàka ningu tau hangàdangu ma-mbuhangu pa-danggangu uhu nggàndumu jàka ndia nggà - nggàra bia lai nyuma la lodu Hangahu jàka ndia la lodu matua hawiangu-kai, nda makei-aha. La nimbihu ndaungu papihu wàna, nda mahili ràma-aha da wokama dàngu nda mahili pahuru-anja da ma-wutangu lai nyuma.

³²Nimbihu ndaungu nyuma haàtu - haàtu ba mahunggu àmahu bara lima nggaràmu palumu wànya na Umana i MIRI.

³³Ma-payema-nja da pa-lumungu wàngu la Umana i MIRI, hama tuna: da roti pa-payemangu, da uhu nggàndumu tanda maraku nimbihu lodu, da banda nduma kameti maraku patunu nimbihu lodu, da tanda maraku matua hawiangu, da kameti maraku jàmangu njalana na tau Ihirailu, hamanai ngga - nggàra bia palumu wànya na Umana i MIRI.

³⁴Nyuma rayatu, da ratu dàngu tau Lewi-ka, matuu undi nimbihu ndaungu la papi wànya nggi kalibaru-ya na ma-paloku ai mutungu ndumada da kameti maraku da pawotu lai MIRI na Alama, tundunya na lii Kalaratu Uku.

³⁵Nimbihu ndaungu mangàndi la Umana i MIRI uhu nggàndumu pa-kawunga muti dàngu wua ai ma-kawunga rara la pingi aima.

³⁶Napa mangàndi-ha da kawunga anama mini la ratu la Umana i MIRI la pa-huharu-nja lai Ala, tundunya na kalaratu Uku. Mawotu-mbuha da ana hapi, da ana mbimbi jàka ndia da ana kamàmbi-ma da ma-kawunga dedi.

³⁷Napa mangàndi-manja da ratu la Umana i MIRI da kanguta pa-haürungu welingu la uhu nggàndumu pa-kawunga muti hau ndau - hau ndaungu, hamanai da hunggu maraku hawiangu hama tuna da angguru, da mina haitungu dàngu mbuu ndàbada da wua ai hangia - hangia. Da hunggu maraku hangia la hakambulu welingu la ihi wokama mangàndi-maha napa la tau Lewi da matanggu kangutu-nja da hunggu maraku hangia la hakambulu la parai tau tungu woka.

³⁸Tàka na haàtu ratu wàla wuana i Harungu lupangu-ma na-karaha-ha da tau Lewi ba talànga kangutu-danja nu da hunggu maraku. Dàngu da hangia la hakambulu welingu la hunggu maraku-ka nu mbuu ndàbada, lupangu-ma dangàndi-ha paraï tau Lewi la kurungu pangangu la Umana i MIRI.

³⁹Lupangu-ma da rayatu Ihirailu dàngu tau Lewi dangàndi-ha da hunggu ma-padaingu nu da uhu nggàndumu, angguru dàngu mina haitungu la kurungu pangangu, ngia pa-pahàmu-ha da kanaingu Umana i MIRI. Lai numbuha da-ndàdiku ningu da ratu da ma-talànga paloku, da madai pindu bokulu Umana i MIRI hamanai da maludu-ka. Nda ma-jàmangu-ma duma pa-anggaraa-ya na Umana na MIRI-ma.