Read Kambera NAHEMIA 12 Bible Online

NAHEMIA 12 - Kambera bible

NAHEMIA 12

¹Yiada-haka da ratu dàngu da tau Lewi da mabeli welingu la tanawangu karia-da i Herumbambilu anana i Halatialu dàngu na Ratu Bokulu Yehua:

²Da ratu: I Haraya, i Yerimia, i Ehira, i Amària, i Malaku, i Hatuhu, i Hakanya, i Rehumu, i Maremutu, i Indu, i Ngginitoi, i Ambia, i Miyamingu, i Maanja, i Mbilingga, i Hamaya, i Yuyaripu, i Yandaya, i Halu, i Amuku, i Hilikia dàngu i Yandaya. Nyuda jia-haka da ratu kapala la rehina i Yehua.

⁸Da tau Lewi: Da ma-kapipi maludu pa-malangungu, jiaha: i Yehua, i Mbinui, i Kàtumialu, i Haripuya, i Yahunda dàngu i Matanya.

⁹Da anggota kalikapu maludu da mawunda ludu hema, jiaha: i Mbàkumbukuya, i Uni dàngu da angu kalibaru-na.

¹⁰Yiana-yaka na juru wàla wuana na Ratu Bokulu Yehua: i Yehua, i Yuyakimu, i Eliyahipu, i Yuyanda,

¹¹i Yunatàngu, i Yandua.

¹²Yiada-haka da tamuda da ratu kapala dàngu da kalibaru-daka ba talànga katangu-na Ratu Bokulu i Yuyakimu: [Ratu] — [Kalibaru] i Maraya — Haraya i Hananya — Yerimia i Mahulàmu — Ehira i Yuhanàngu — Amària i Yunatàngu — Meliku i Yuhupu — Hambanya i Àtana — Harimu i Helikai — Marayutu i Hakaria — Indu i Mahulàmu — Ngginitungu i Hikiri — Ambia ...[19] — Minyamingu i Pilitaï — Muanja i Hamua — Mbilingga i Yunatàngu — Hamaya i Màtanai — Yuyaripu i Uhi — Yandaya i Kalai — Halai i Hembiru — Amuku i Hahapia — Hilikia i Netaneyilu — Yandaya.

²²Da huratu tamuda da kapala kuru uma tau Lewi dàngu da kuru uma ratu pambàda tulihu-haka la rehida yiada da Ratu Bokulu: i Eliyahipu, i Yuyanda, i Yuhanàngu dàngu i Yandua. Nu na pa-tulihu na-lundungu-ka ba talànga maràmba Perihia-ya i Ndariu.

²³Tàka rukuda da kapala kuru uma kalibaru tau Lewi pa-tulihu-ha lundu la ndaungu lurina i Yunatàngu-a umbuku-na i Eliyahipu.

²⁴La limada i Hahapia, i Haripuya, i Yehua, i Mbinui[20] dàngu i Kàtumialu, pabiwa-ha la kalika - kalikapu-da da tau Lewi. Handàka - handàka ningu dàmbu kalikapu mangera-nya la pawotu hailangu lai MIRI dàngu la pa-pamalangu-nya Nyuna ba dapahe - hemangu tundunya na kalaratu-na i Maràmba Ndautu, atana i Ala.

²⁵Da madai pindu Umana i MIRI da pa-pandumangu padaiha da kurungu pangangu la lihi pindu bokulu Umana i MIRI, jiaha: i Matanya, i Mbàkumbukuya, i Ombanja, i Mahulàmu, i Tàlumungu dàngu i Akupu.

²⁶Na ndaungu lurida nyuda jiaya ba ngaru-napa i Yuyakimu anana i Yehua, umbuku-na i Yuhandàku dàngu ba ngaru-mbunapa i Nggumbunuru Nahemia dàngu i Ratu Ehira na ma-tanjiku la uku.

²⁷Ba katua-ya na kangeli paraingu Yeruhali, ka paau-danjaka da tau Lewi welingu la ngia pa-ndàdiku-da, ka peku nimbunja ba mbabunya nu na matumbu wàngu ludu wotu pa-malangungu-da dàngu wàngu malingu pambu wàngu nu da jungga lamba dàngu jungga.

²⁸Ka pauhi-danyaka da maludu welingu la kuru uma - kuru uma tau Lewi, da ma-ndàdiku winggiru-nya na paraingu Yeruhali-kai, hamanai welingu la parai - paraingu ma-winggiru-nya la Netopa-kai,

²⁹welingu la Mbetu-Ngginggàlu, la Nggemba dàngu la Àhamawitu.

³⁰Da ratu dàngu da tau Lewi dawunda-ya na kalaratu hawari nduma wikida, hàlaika nu ndumana na rayatu, ndumada da pindu bokulu dàngu ndumana na kangeli paraingu.

³¹Ku-paràha-nja da liku uru Yahunda pahei la pinu kangeli ka da-kapipi-ha da dua pajuru bokulu da ma-pajuru winggirungu paraingu ba dàngu ludu wotu pamalangu-danya i Ala. Na hau pajuru na-pajurungu la pinu kangeli ma-hanggangu la kawana, la Pindu Bokulu Kangudu.[21]

³²I Hohaya nalaku la kajia maludu, dandàki-ya paraï da hawiangu da liku uru tau Yahunda.

³³La ndutuda nyuda nàhunja da ratu da mahapi taropitu: i Aharia, i Ehira, i Mahulàmu, i Yahunda, i Mbanyamingu, i Hamaya dàngu i Yerimia. Hàlaka nu hi nàhunya i Hakaria anana i Yunatàngu, umbuku-na i Hamaya. Hawiangu da boku la mangilu-na jiaha: i Matanya, i Mika, i Hakuru la kalibaru Ahawàpu.

³⁶La ndàkida nàhunja da angu kalibaru-da: i Hamaya, i Ahareyilu, i Milalai, i Nggilalai, i Maaï, i Netaneyilu, i Yahunda dàngu i Hanani. Dangàndi hàla nyuda paludu wàngu, hama tuna na paludu wàna i Maràmba Ndautu, atana i Ala. I Ratu Ehira, na ma-tanjiku la Ukuna i Ala, nàhunya la ngora ma-pajurungu.

³⁷Ba datàka-ka la Pindu Bokulu Wai Tapanjiru, da-wikitungu hi da-kandekalu la panongu paraingu-na i Ndautu, dali ningu la umana i Ndautu, hi dabeli-ha la kangeli la Pindu Bokulu Wai la ngaba pahunga lodu paraingu.

³⁸Na hili hau pajuru maludu da-pajurungu la pinu kangeli ma-hanggangu la kalai, nyungga dàngu na rayatu hawiangu ma-maràngga ndàkiha. Ma-pajurungu mali ningu la Lewatu Kadu Aü lupa tàka la Kangeli Mbàlaru.

³⁹Hi mali ningu la Pindu Bokulu Epuraïmu, la Pindu Bokulu Ndai, la Pindu Bokulu Iyangu, la Lewatu Hananeyilu dàngu la Lewatu Mia lupa tàka la Pindu Bokulu Mbimbi. Na juruma nyuma na-pànjangu la lihi Pindu Bokulu Madai la lihi Umana i MIRI.

⁴⁰Nu ka tàka-danyaka da dua pajuru maludu la lihi Umana i MIRI. Hinggilu-da da liku uru daa la pajuru-nggu,

⁴¹da-kikungu-mbu da ratu da mahapi taropitu. Nyuda jiaha: i Eliyakimu, i Maaheya, i Minyamingu, i Mika, i Eliyowinai, i Hakaria dàngu i Hananya;

⁴²la ndàkida nyuda nàhunja i Maaheya, i Hamaya, i Eliahàru, i Uhi, i Yuhanàngu, i Màlakia, i Elàmu dàngu i Ehiru. Da maludu daludu la pa-kapipi-na i Yihiràhaya.

⁴³La loduna nu dadangu da kameti maraku da pawotu lai MIRI. Dira mbaha etiya na rayatu maa ba nawua-dunya mahàmu paraïna i Ala. Da kawini dàngu da anakeda da-kikungu-mbu pambabu, na talia nggoru mbaha etida ba daludu parongu-mbuya la mamarau.

⁴⁴La rehina nu ningu tau pa-patanggungu la pa-hamata-ha da kurungu pangangu da ngia pa-pakàpa-ha da hunggu maraku nduma Umana i MIRI, jia-mbuha da hunggu da hangia la hakambulu dàngu da kawunga ihi woka la nimbihu ndaungu. Nyuda da tau ma-hamata lupangu-ma da-pauhi-nja da hunggu welingu la woka la winggiru-da da paraingu. Nu da hunggu maraku hi wuanja da ratu dàngu da tau Lewi, nunjuya na Kalaratu Uku. Da tau Yahunda datembi-ha da ratu dàngu da tau Lewi,

⁴⁵maa ba nyudadu da ma-palaku-ya na kalaratu hawari dàngu da kalaratu hawiangu na pa-karuhi-na i Ala. Da ma-katangu malingu pambabu wàngu dàngu da madai pindu Umana i MIRI da-palaku-mbuya na pa-patanggungu-ha, kikunya na kalaratu-na i Maràmba Ndautu dàngu i Halomu, na anana.

⁴⁶Pa-kiringu ba naluri-pa i Maràmba Ndautu dàngu i Ahawàpu na mamàhi la malingu pambabu wàngu, da maludu mbàda ludu-danjaka da weliku ludu wotungu lai Ala.

⁴⁷La rehina i Herumbambilu dàngumbu i Nahemia, mbuu ndàba-naka na rayatu Ihirailu dawotu hunggu la pa-pamàtu-ya na paluri wàda hau lodu - hau lodu da maludu dàngu da madai Umana i MIRI. Na rayatu nawotu hunggu nduma tau Lewi, tàka da tau Lewimbui duda dawua-nja ndumada da ratu kikunya na pa-pandumangu-ha.