Read Kambera NAHEMIA 13 Bible Online

NAHEMIA 13 - Kambera bible

NAHEMIA 13

¹Ba diha-nyaka na ukuna i Muha na rayatu, ka hunggu-danyaka yiana na lii kalokangu, ‘Da tau Amungu dàngu tau Muapu nda peku pa-oringu-ada dàngu banjaru-na i Ala;

²nadu ba daluhu welingu la Mehiru da tau Ihirailu, nda dawua-nja pangangu dàngu wai pa-unungu paraïda nu da dua banjaru. Tàka ba hewa biada-nya i Mbiliamu la paràtu-nya na tau Ihirailu, na nyuna na Alanda nyuta na-panjilu-nya nuna na ràtungu hi na-pambeli-ya wai maringu,’ ba wàna.

³Ba darongu-yaka nu paraï tau Ihirailu, ka kahika-danjaka da tau hangàdangu mbuu ndàba-daka welingu la honga panggolu Ihirailu.

⁴Ba ndedipa nu, na Ratu Eliyahipu, na pa-patanggungu la pa-hamata-ha da kurungu pangangu la Umana i MIRI, na-paluangga mai dànya i Tombia.

⁵Nawua-nya hau kuru bokulu nyuna i Tombia paraïna i Eliyahipu na pa-pahinggilu làti ka ngia pa-pahàmu-ha da hunggu uhu nggàndumu, kaminyangu, da paràma wàngu la Umana i MIRI, da hunggu nduma ratu, da hangia la hakambulu welingu la uhu nggàndumu, angguru dàngu mina haitungu, da pa-paberingu la tau Lewi, la ma-katangu malingu pambabu wàngu dàngu la madaiya na pindu bokulu Umana i MIRI.

⁶Nu ba natumbu nuna, nda ni-angga la Yeruhali, nadu la patailu kambulu dàmbu wàna na ndaungu pareta-na i Àratahàtahu,[22] maràmba Mbambilu, luanggu-nya la Mbambilu pa-lapuru la maràmba. Mandai-mapa hi napuli-ngga

⁷la pabeli la Yeruhali. Ba kuhili tàka belika yiahu, ka katàtaku-nggunyaka ba kupi-nyaka i Eliyahipu ba mbàda wua-nanya hau kurungu la Umana i MIRI nyuna i Tombia.

⁸Ka dira mbeni-kaka, hi ku-kawuka-nja la hambeli mbuu ndàba-daka da malanja-na i Tombia.

⁹Hàlaka hi ku-paràha-nja la pawunda-ya na kalaratu hawari ndumada nu da kurungu. Ba hàla-yaka nu ka patama beli-nggunjaka mbuu ndàbada da hunggu uhu nggàndumu dàngu kaminyangu hamanai da pa-paloku wàngu la Umana i MIRI.

¹⁰Hinggilu-nai nu, kupinja da maludu ma-katanja da malingu pambabu wàngu dàngu da tau Lewi ba mbàda laku wàru-danyaka na paraingu Yeruhali hi dabeli la wokada haàtu - haàtu, ba nda na-pambinu-duya na nduma lurida paraïna rayatu.

¹¹Ka hàngga-nggunjaka da liku uru maa ba nda da-ihili-dunya na Umana i MIRI. Ka paau beli-nggunjaka da tau Lewi dàngu da makata-nja da malingu pambabu wàngu hi ku-paràha-nja pahili palaku-ya na wai ngerada.

¹²Hàlaka nu ka hili pakiringu-nanyaka na rayatu Ihirailu mbuu ndàbada la pawotu-ha da hangia la hakambulu welingu la uhu nggàndumu, angguru, mina haitungu, hi dangàndi-ha la ku - kurungu pangangu.

¹³Ka patanggu-nggunjaka yiada da tau da patiki pa-ndàkingu la pa-hamata-ha da kurungu pangangu: na Ratu Helimia, i Handuku na ma-tanjiku la Uku dàngu i Pandaya tau Lewi. I Hanàngu anana i Hakuru na umbuku-na i Matanya ku-patanggu-nya pandula-ha nyuda. Kupi-manja ba tau ràka pa-monungu-ha nyuda, hi peku paberi pahàmu dànja nu mbuu ndàbada la angu ràma-daka.

¹⁴Dou Alanggu, unamu-kiha mbuu ndàbada da pambàda palaku-nggu ndumana na Umamu hamanai na palumu wànya.

¹⁵La rehina nu kuita-ha ba ningu hawiangu tau Yahunda mapohu angguru la lodu Hangahu. Ningumbui hawiangu ma-pabuku-nja uhu nggàndumu, angguru, wua angguru, wua kapilitu dàngu malanja hawiangu da kalandai-da hi dangàndi-ha la Yeruhali. Kuhiri-nja pa-danggangu la Yeruhali.

¹⁶Ba mapira-ha da tau welingu la Tiruhu ma-ndàdiku la Yeruhali dangàndi iyangu dàngu malanja hangia - hangia pa-danggangu la Yeruhali la lodu Hangahu, la padangga-nja la tau Yahundi.

¹⁷Hi kumbeni-nja da liku uru tau Yahunda hi kupanii-nja, “Ka ndai pàda-manya dimi nu ba wunda-minya njala bokulu bai pa-kajari-ya na lodu Hangahu?

¹⁸Ruku njala tungu yia-maka hi nahuku-nja da boku la mangilu-nda paraïna i Ala dàngu hi na pa-taweharu-ya yiana na paraingu. Màla nu hili mbuhangu-minyaipa pabonja-ya na mbenina i Ala la tau Ihirailu bai pa-kajari-ya na lodu Hangahu?” hi wànggunja.

¹⁹Jia ba tuna hi kuwua-nja pareta, ka màtawa la nimbihu pa-kiringu-da da lodu Hangahu nu la lodu Njumatu la rudungu, lu bita parengga-nja da pindu bokulu paraingu jàka na-malingu[23]-ka, dàngu nda peku-a la pa-bunggahu-ha jàka ndedi na-làpahu na lodu Hangahu, la lodu Haputu la rudungu. Kutuha da taunggu la pindu - pindu bokulu la pa-hamata-ya ka àmbu ningu malanja pa-danggangu patama ngàndi daa la paraingu la lodu Hangahu.

²⁰Tàka talànga handàka ningu bia tau danggangu dàngu matanggu danggangu malanja matodu la hambeli kangeli la lodu Njumatu la rudungu.

²¹Hi ku-paninja, “Nda ningu linguna bai patiangu lundu waihangu-na lai hiana. Irimangu, jàkai hili handàkangu-mapa pawunda-ya na matuna nu, nda jia jàma-anggunggai!” hi wànggunja. Pa-kiringu nu nda dahili mai ndoku-apa la lodu Hangahu.

²²Ka paràha-nggunjaka da tau Lewi la pa-palaku-ya na kalaratu hawari wiki dàngu la padaiha da pindu bokulu, pa-hamata-ya ka peku maraku-nanya tau na lodu Hangahu. Ka hamayangu-nggunyaka, “Dou Ala, unamu-àru-kika rukuna na lii nunambu, dàngu umila-kingga etimu kikunya na bokulu pa-namungu-mu,” wànggunya.

²³Nu kuita-mbuhai ba dadangu da tau Yahundi da ma-kanoma kawini welingu la tau Àndutu, Amungu dàngu Muapu.

²⁴Hawiangu da anada nda dapingu-apa hilu Yahundi, mbulungu na hilu Àndutu-ma-aka jàka ndia na hilu hawiangu.

²⁵Kumbeni-nja dàngu kuhara-nja. Ningu papalu-nggu dàngu pa-hànditu-nggu lunggi. Tunaka nu hi ku-paràha-nja pa-harangu la parongu-na i Ala ba nda dahili lalei mangoma pa-korungu-apa, nyuda wikikai hamanai da anada-kai.

²⁶Hi kupanii, “Ka nda jia-aya na njala yiana-mbu na pawunda-na i Maràmba Halomu? Nda ningua maràmba yia la pinu tàna marihi-nya pa-bokulu nyuna. Nambuha-nya paraïna i Ala hi nawotu-ya la pa-maràmba-nya na nggubulu Ihirailu-ka mbuu ndàbana. Jiapa-kai ba tuna na-pamanda bianya kawini tau tàka pawunda manjala.

²⁷Dira akatu-ya na pawunda-mi! Bai toru mbeni bia nyimi pa-rawaku-ya i Ala bai kanoma kawini tau tàka!” hi wànggunja.

²⁸I Yuyanda anana na Ratu Bokulu Eliyahipu-ya, tàka na haàtu na anana i Yuyanda natuya la yia anana i Hànambalàtu ma-pawelingu la paraingu Mbetu-Horungu. Jia ba tuna hi kuwàngga-ya i Yuyanda welingu la Yeruhali.

²⁹Ka hamayangu-nggunyaka, “Dou Alanggu, upatanda-kinja nggiki hamada nu da tau nuda ba da-pakajari-ya na ngaba ratu dàngu na panjanji-munja da ratu dàngu tau Lewi!” wànggu.

³⁰Tuna nuduka ba ku-paili-ya na banjaru Ihirailu welingu la mbuu ndàbana na ma-pawelingu la tau tàka. Kuwua-nja kalaratu da ratu dàngu tau Lewi, hi ni - ninguma wai ngerada haàtu - haàtu.

³¹Kupanii wàmbunya, màtawa la re - rehi ningu ula ka ningu hahangu padua ai mutungu nduma hunggu kameti maraku, hamanai na rayatu duna ka nangàndi hunggu maraku kawunga ihi woka. La hupu njàpuna, ku-hamayangu, “Dou Alanggu, upatanda-kinja yiada yia mbuu ndàbada dàngu kau mila-kingga eti,” wànggu.