Read Kambera NAHEMIA 2 Bible Online

NAHEMIA 2 - Kambera bible

NAHEMIA 2

¹La hau na lodu, pa-làngangu patu mbua wulangu, nu la wulangu Nihàngu, ba talànga nganguna na Hanganji Àratahàtahu, ku-ringulangu ba ku-paloku-nya wai angguru. Ndedima kukàli ringulangu la hanggana hama tuna la lodu nu.

²Jia ba tuna, “Ka nggikina hiu ringulangu tàka nda hidu-munyai? Lupangu-maka-duna ba ningu pa-handuka-mu,” hi wànangga na hanganji ba na-paàra-ngga. Ka katàtaku-nggunyaka,

³“Malangu rihi-kimu Tamu Umbu lundu nu - nu! Ka nggikina hi nda na-hawina na etinggu, jàka kuita-ya na paraingu ngia patani-nja da bokunggu la mangilu ba kambera jua-haka nàhu, hamanai da pindu bokulu-na ba dakehi-ka la epi,” hi wànggunya ba kuhema-ya.

⁴Nanapa-ya na maràmba, “Ka nggàra-yaka nu na pawuku etimu?” hi wànangga ba na-paàra-ngga. La eti hamaya-manggunya i Ala ma-kawaha-ya na awangu,

⁵hi kupanii-nya na maràmba, “Jàka jiaya la etimu, Tamu Umbu, hiu mbuhangu pa-kataku-ya na pa-karainggu atamu, kau paràha àru-kingga pa-kabeli la tana Yahunda la pa-pahada belinya na paraingu ngia patani-nja da bokunggu la mangilu,” wànggunya.

⁶Na maràmba na ma-uhuku papera dànya i Tamu Ràmbu, na-pajia-ya na pa-karai-nggu. Na-paàra-ngga pira mandainggu pa-ndàdiku lai nu dàngu pirangu na rehi kabeli-nggu, hi kupanii-nya na tànggalu pambàda kawuku-nggu.

⁷Hàlaka hi kukarai huratu pangàndi-nja da nggumbunuru la porupinihu Epuràtu patama lodu,[3] ka da-pamuda-ya na laku-nggu lundu tàka la tana Yahunda.

⁸Hinggilu-nai nu, kukarai-mbunya huratu ndumana i Ahawàpu, na madaiya na omangu pareta, ka peku wua-nangga ai nduma pindu bokulu ngia pa-torungu la lihina na Umana i MIRI, dàngu ndumada da kangeli paraingu dàngu pawulu wànya na uma ngia pa-ngiangu-nggu. Na-kataku hàla-maha da pa-karai-nggu nyuna na maràmba, ma ba i MIRI Alama mandula-ka.

⁹Laku-nggunyaka la Epuràtu patama lodu, ba da-karia-ngga da parawira hamanai da tanatara li la njara da pa-paràha-na na maràmba palaku karia-ngga. Ba kutàka-ka lai nu hi ku-patàka-nya na huratu-na na maràmba la nggumbunuru mbuu ndàbada.

¹⁰Na nyuna ba darongu-yaka paraï da i Hànambalàtu, tau Mbetu-Horungu, hamanai i Tombia tau Amungu ba mainggu pa-palànyapu-ya na tau Ihirailu, ka dira karau-haka da etida.

¹¹Ka laku pangalangu-nggunyaka hi kutàka la Yeruhali, hàla hi tailu mbua lodunggu pa-pànjangu.

¹²La ngalana nu nda kupanii-maya la ta - tauka ba i Ala na mapuru pekangga la pa-pahada belinya na paraingu Yeruhali. La haromu rudu hi ku-hadangu pawànda angunggu palaku la hambeli paraingu. Hinggilu-na na kalandai pa-kaliti-nggu, nda mahili ngàndia banda pa-kaliti hawiangu.

¹³Rudungu biaya-pa, ba matuu kajia-ya na paraingu ba mali ningu la Pindu Bokulu Lolangu la patama lodu. Malaku hanggangu hu luru, la Pindu Bokulu Kangudu, li ningu la Matawai Ularu. Ba talànga lakuma nu hi ku-tàngaru pahàmu-nya na kambera kangeli paraingu hamanai da pindu bokulu da mambàda mutungu la epi.

¹⁴Hàlaka hi ma-hadangu welingu la tuba pahunga lodu paraingu hi ma-hanggangu hu dia, la Pindu Bokulu Wai Tapanjiru dàngu la Tàma Maràmba. Tàka nda ningua lai nu ànda ngia palina na kalandai pa-kaliti-nggu, ba lalu danguha da watu ma-tanyungguru.

¹⁵Jia ba tuna, ka puru-manyaka la Lolangu Kindurungu, hi malaku pangalangu nu la rudungu, hi makinju-ya na kangeli paraingu. Hàlaka nu hi ma-wikitungu beli la paraingu mali ningu la Pindu Bokulu Lolangu.

¹⁶Nda ninguma haàtu ngora rayatu mapinya nggi kulaku ningu, dàngu nggàraya na pa-lakunda-nggu. Nadu lupa tàka la rehi nu ndedi nggà - nggàrama papanii-nggunya na angu banjaru-nggu, la ratukai, la ngora rayatu-kai, jàka ndia la panggawi-kai mbuu ndàbada, hamanai la ta - tauka ma-pambapangu napa, pa-pahada-nya na paraingu Yeruhali.

¹⁷Nu kupanii-nja, “Itàngaru-yawa na harui mayila-nda! Na paraingu Yeruhali kambera jua-mayaka, dàngu da pindu bokulu-na mutungu-mada-nyaka la epi. Maiwa ka ta-pahada belinya na kangeli-na na paraingu Yeruhali ka àmbu na hili paaka-nda tau,” hi wànggunja.

¹⁸Hi kupanii-nja nandula-nangga i Ala dàngu nggàraya na papanii-nangga na maràmba. Danapa-ya nyuda, “Màlawa ka ta-pakiringu pa-pahada-ngu!” wàdangga ba dahema-ka. Hi da-hawanjiru paràma.

¹⁹Ba darongu-yaka na pa-lakunda-ma paraï da i Hànambalàtu, i Tombia dàngu i Nggehimu na tau Arapu, ka riki-dangga-maka ba da paaka-nggama. “Ka nggàra-yaka dimi nu na paràma-mi? Ka mbuhangu-minya pa-katadaku la maràmba-ka nu?” wàda-nggama.

²⁰Kunapa-ya nyungga, “I Ala na ma-kawaha-ya na awangu, Nyuna wikima matunya wuana na paràma-ma. Nyuma duma atana-nggama dàngu pakiringu-mamanya pa-pahadangu. Tàka nyimi dimi nda ningua ngabami la pa-mangungu ngga - nggàra la Yeruhali. Hamanai jàka na-pabanjaru wànya tau na paraingu Yeruhali, nda patiki-mbuha da tamumi nyimi,” hi wànggu ba ku-hemaha.