Read Kambera NAHEMIA 4 Bible Online

NAHEMIA 4 - Kambera bible

NAHEMIA 4

¹Ba narongu-yaka i Hànambalàtu ba pahàmu-manya na kangeli paraingu nyuma tau Yahundi, ka mbeni dira matiki-yaka, hi na-pakiringu pa-paaka-nggama.

²“Ka nggàra-yaka nu na paràma-kida da tau Yahundi kambànga da manda nggàra papida nu? Ka ma-pahada beli-kinya yiana na paraingu wàdaka ihu nu? Ba dakaka-ya la etida, damàka ihu nu pa-panjàpu-ya na paràma-da la dalu hau lodu, ba wàngu pawotu kameti maraku-a? Da-ngalangu bia ihu patuha watu kangeli da kalatu pabundu kangudu mutungu?” wàna ba na-paaka-nggama la hangga angu ràmana dàngu tànatara Hamaria.

³Na-kataku-ya i Tombia na ma-ndolaku la lihina, “Tàngaru-ya nu na kangeli na pa-pahada-da! Ahu rumba-a namàka-mbu pa-puluru-ya!” wàna.

⁴Ka hamayangu-nggunyaka, “Dou Ala, mu-patingi-kinya ba da-paaka-nggama! Pajengi-nyawa la katiku wikida nyuda nu na lii paakangu-da. Màtawa da manguda ka napiti rambanja tau hamanai nyuda wiki ka karia-nja la tana tau ba pa-tanawa-nja.

⁵Àmbu jàma-dunja da akatu-da, àmbu romba-dunja da njalada, maa ba da-paaka-du-nggama nyuma ma-pahada-nya na paraingu,” hi wànggu.

⁶Ka pahàmu pangala-manyaka na kangeli, ndedi nggi mandaina ka hàla-manyaka pa-pahàmu ndàbaya na kangeli, lupa na-paberi ma-nduangu na janggana. Nadu ba ràma paweli etingu-mananya duna na rayatu.

⁷Ba dahili ronguika nu i Hànambalàtu, i Tombia dàngu da tau welingu la Amungu dàngu Àndutu, hamanai da tau Arapu, ba narengga na pahàmu-manya na kangeli Yeruhali dàngu hi pakiringu-manyaika pahulu-nja da mambowa la kangeli, ka mbeni dira matiki-danyaika.

⁸Ka pa-hamangu-danyaka la pa-hànjalu-ya na Yeruhali ka peku tumbuna na lii kanyaüru.

⁹Jia ba tuna ka hamayangu-manyaka la Alama dàngu hi madaiya na paraingu la rudungu la lodu.

¹⁰Tàka da tau Yahunda da-pakiringu pawunda-ya yiana na ludu hali handuka eti, “Njàpu-mana-nyaka na àtalu kapàru-nda ba taduku ngàndi, tàka da kangudu hi dangu biada-nyaipa la pa-bundungu. Tatika nda tamàka paràma-ya yiana na paràma, la pa-pahada-nya na kangeli-na yiana na paraingu,” wàda.

¹¹Ba talànga tunaka nu pa-kakangu-danyaka da muhuma la patuu harabànda-kama, la pa-pameti-kama, ka peku pànja-manya na paràma-ma.

¹²Tàka da tau Yahundi da ma-ndàdiku la lihida, damai mànu papanii-nggamanya nggàraya na pawuku-da nuda da muhu.[7]

¹³Jia ba tuna hi ku-paberi-nja hapanda, nimbu dàngu pana na rayatu, kutuha la hambeli kangeli da pandedi hàlama paràma. Kutuu-ha lai nu pa-namatu-nya na kalibaru-da.

¹⁴Ba kuita-yaka mangàdatu-na na rayatu, “Àmbi mangàdatu-dunja da muhu! Inamuya bàdi i MIRI na maàtalu kapàru! Mi-patarangu-ma ndumada da angu dedimi, da anami, da papaha-mi dàngu da umami!” hi wànggu hàlanja nyuda dàngu da mini pangora hamanai da liku uruda.

¹⁵Ka rongu-danyaka da muhuma ba mbàda pi-manyaika na pawuku etida. Ka pàda-danyaka la etida bai Ala wiki-maka duna ma-pabeta-nya na pawuku etida. Tunaka nu beli hàla-manyaka paràma ba ma-pahàmu-ya nuna na kangeli.

¹⁶Na nyuna pakiringu la loduna nu na beri mandua-ada da taunggu da maràma, tàka hili beri mandua-mai na mamangga rimangu ba dàngu hauda kalembi pabera dàngu kawanangu-da nimbu, temingu dàngu pana. Da liku urui duda pandula weli etingu-madanya la rayatu

¹⁷da ma-pahàmu-ya na kangeli. Da maduku-ha da pa-pahadangu wàngui duda daràma wàngu hapapa limada, tàka da hapapa limadai dayàpa madàka.

¹⁸Da tukangu watui duda bànggingu-madanya hapanda ba daràma. Da mapini taropitu na papi wàndanya ba ningu muhu, hanii mànu-mada la lihinggu.

¹⁹Hi kupanii-nya na rayatu, da mini pangora dàngu da liku uruka, “Yiana na paràma pangala-manda-nyaka ba ta-palaku-ya, tàka hi tanyalangu-ndanyai ba ta-pamaraungu haàtu dàngu haàtu la kangeli.

²⁰Jia ba tuna, jàkai ronguya na lingu taropitu, ipauhi pa-renggangu-ma yiahu la lihima. Na Alanda jiaya na mabera-ya na muhu hiluta nyuta,” hi wànggunja.

²¹Tuna nuka na paràma-ma, ba ma-pakiringu la mbaru hada rudungu hi lupa dahunga da kandunu la awangu. Na rayatu hawiangu da-pahàmu-ya na kangeli, tàka hawiangui da-rimangu ba dàngu kawanangu-da nimbu.

²²La rehina nu mbuu ndàba da maràma dàngu angu pa-mbapangu-da, ku-paràha-nja patodu la Yeruhali. Jia ba tuna, dai-manyaka paraingu la rudungu, hi tàka la lodu ma-pahada-nya na kangeli.

²³Nyungga wiki, dàngu da angu ràmanggu, da tau la lihinggu dàngu da madidi karaha-ka, wotu mànu-mamanya paki ràma, la rudungu-kai, la lodukai. Mangga rima mànungu-mamanya ba ma-katangu madàka.[8]