Read Kambera NAHEMIA 5 Bible Online

NAHEMIA 5 - Kambera bible

NAHEMIA 5

¹Ndedi nggi tuna mandaina nadangu na tau Yahundi, mini-yakai, kawini-yakai da ma-pakiringu pahali ura mila ruku pawunda-da da tau nu da angu banjaru-da.

²Ningu mapanii, “Dadangu da ananggu. Ningu bàdi uhu nggàndumu ka peku lurima,” wàda.

³Hawiangui, “Ku nggadi lerangu wokanggu, woka angguru dàngu umama ka peku keima uhu nggàndumu pangama ka àmbu mameti rimbangu,” wàdai.

⁴Hawiangui, “Nyuma mbàda pinjangu-maka ndui pa-mbayaru wànja da hilu katiku wokama dàngu woka angguru-ma na pa-panggàna-nanggama na maràmba.

⁵Ka nda tau Yahundi-mbu-kama duma nyuma yia? Ka nda hama-ada da anama nyuma dàngu da ana tau Yahundi hawiangu? Jiapa-kai ba tuna mapuli lera bianja da anama panjadi ata. Ningumbu anama kawini pambàda danggama panjadi ata. Nda hili ninguma ànda hauma maa ba mbàda nggadi-duma-njaka da wokama dàngu da woka angguru-ma,” ningu na mawàna.

⁶Ba kurongu-yaka na hawina-da nu, ka mbeni làngatàka-nggunyaka,

⁷hi kubota-ya jàka nggiki wàngguka bàdi. Ka hàngga-nggunjaka da mini pangora dàngu da liku uru, “Nyimi kapidihu-minya angu dedi wikimi!” wànggunja. Tunaka nu hi ku-pauhi ndàbanja la pabata-ya nu na lii na matumbu,

⁸hi kupanii, “Dira matiki-ta la pahiulu-ha da angunda patau Yahundi da madangga lerangu wikida la tau hau banjaru. Tàka nàhu nyimi wikima-ai ma-runggatu-ha pa-danggangu wikida lai nyimi, tàka làti wàmu tau Yahundi-mbukai nyimi!” hi wànggunja. Pàdi wàda bia da liku uru.

⁹Hi kuhili panii, “Nu na pawunda-mi nda nahàmu-a! Lupangu-ma bàdi làti bai luri mangàdatu-nya i Ala. Jàka luri timi nu làti ndai pahia-anja manggawangu da muhunda da manda ningu miringu la pa-paaka-nda nyuta.

¹⁰Nyungga wiki dàngu da angu dedinggu hamanai da angu ràmanggu mbàda wua pinja-manyaka ndui dàngu uhu na rayatu. Nda mahili karai beli-ahapa duma.

¹¹Màtambui dimi nyimi kai podahu-ha da wutangu[9] rayatu lai nyimi, da wutangu ndui jàka ndia uhu nggàndumu-kai, da wutangu angguru jàka ndia mina haitungu-kai. Pabeli parengga-njawa da woka, da woka angguru, da woka haitungu dàngu da umada!” wànggunja.

¹²Danapa-ya da liku uru, “Na lii panaungu-mu nu jiangu-ma matundu-nya. Napa ma-pabeli hàla-manja duma da pambàda kei-maka hamanai nda nggà - nggàra-a pa-karuhi-ma lai nyuda,” wàda. Ka paau-nggunjaka da ratu, hi ku-paràha-nja da liku uru nu kawai la pa-harangu la hangga ratu, ba palaku làngatàka-madanya na pambàda tikida.

¹³Tunaka nu hi ku-wàkahu-ya na tera borunggu[10] hi ku-kàmbahu-nya, “Tuna numa i Ala ba na-kàmbahu-nya na tau manda patutu-nya na panjanji-na. Na tau tungu nu namila tanjàriku-ma, na uma dàngu da mangu-naka napiti-ha paraïna i Ala!” hi wànggunya. Mbuu ndàba na kabungguru, “Amingu!” wàda ba dahema, hi dawotu-nya i MIRI. Nu da liku uru da-patutu-manya na panjanji-da.

¹⁴Hakambulu dàmbu ndau-ngguka pa-nggumbunuru la Yahunda, piti welingu la padua kambulu ndau wàna lupa la patailu kambulu dàmbu ndau wàna ba na-pareta na Maràmba Àratahàtahu. La ngalana nu ba nggumbunuru-ka, nda ana piti-manggu ngganji nggumbunuru, nyunggakai dàngu da angu dedi-nggukai.

¹⁵Da nggumbunuru ma-mangilu-ngga, da-pambotu-nya wai ngera na rayatu. Nadu ba da-karuhi patu kambulu àmahu bara hau lodu[11] pakei wàngu pangangu dàngu angguru. Hamanai da panggawi-mbuda da-kapidihu-ya na rayatu. Tàka nyungga nda ku-palaku-aya na matuna nu, maa ba ku-mangàdatu-nya duku i Ala.

¹⁶Mbuu-naka na àtalu kapàru-nggu ku-palaku-ya la pa-pahada wànya na kangeli, dàngu nda hawutu-ma tana papiti-nggu wunda njilinggu, jiapa-kai mbuu ndàbana na tau la lihinggu daràma dambungga la paràma yiana.

¹⁷Hangahu lima kambulu-ya na tau Yahundi dàngu da mini pangora da pakàli wuanggu pangangu la umanggu, ndedia kudiha-ha da ariyaa welingu la hau banjaru la lihima.

¹⁸Hau lodu - hau lodu lupangu-ma ku-payemangu patanggu wikinggu heu hapi, nomu ngiu mbimbi wutu dàngu manu dangu. La hambeli-na nu, handàkangu la hakambulu lodu lupangu-ma ba pa-yemangu angguru bidi. Jiapa-kai ba tuna nda ku-mbuhangu-ma pa-karuhi ngganji nggumbunuru, maa ba kupi-dunya ba toma-manaka mbotuna na patanggu-na na rayatu.

¹⁹Ku-kamahi-nggau dou Ala, kau pangàda àru-kinya mbuu ndàba na pawunda-nggu la banjaru yiana dàngu kau pa-kanyuru àru-kika.